Lala პლატფორმაა, რომელიც მუსიკის ონლაინ გაკვეთილების ჩატარების საშუალებას იძლევა. ამ სტარტაპს 3 დამფუძნებელი ჰყავს და ისინი თავდაუზოგავად შრომობენ თავიანთი პლატფორმის განვითარებაზე.
Lala-ს შესახებ უფრო დეტალურად მისივე თანადამფუძნებელს, დიმა ფუხოვს გავესაუბრეთ:
– როგორ დაიწყეთ Lala-ზე მუშაობა?
სიმღერის გაკვეთილებს 2020 წლიდან ვატარებ და გარდა ამისა, ჩემს სამეგობროში საკმაოდ ბევრი მღერის. 2022 წლის დეკემბერში, ჩემმა მეგობარმა, რომელიც არის ფორტეპიანოს სტუდენტი, აღნიშნა, რომ ის ეძებს ონლაინ ინსტრუმენტს მისი ონლაინ გაკვეთილების ხარისხის გასაუმჯობესებლად. სწორედ მაშინ დავიწყეთ მუშაობა მუსიკის ონლაინ გაკვეთილების პლატფორმის შექმნაზე დროის დაზოგვის მიზნით.
– ვინ არიან დამფუძნებლები და როგორია მათი გამოცდილება ამ სფეროში?
მე, დიმა ფუხოვი, აღმასრულებელი დირექტორი – მაქვს ინჟინერიაში მუშაობის გამოცდილება: კერძოდ, 8 წელი ვმუშაობდი MLOps-ში და 2022 წლიდან ვოკალის გაკვეთილების ჩატარებაც დავიწყე.
ნიკა ვოლუნეცი, CPO – ის პროფესიონალი მომღერალია და სიმღერას ასწავლის სტუდენტებს.
ვსევლოდ კანტორი, COO – უკრავს ფორტეპიანოზე ბავშვობიდან და აქვს $15 მილიონიანი ბრუნვის მქონე ბიზნესში მუშაობის გამოცდილება.
– გვითხარით დეტალურად რას სთავაზობს თქვენი სტარტაპი მომხმარებელს და რა პრობლემას წყვეტს იგი?
ჩვენი გადაწყვეტა აადვილებს მუსიკის ონლაინ სწავლებას ონლაინ ინტეგრირებული მასალების მიწოდებითა და მოსწავლის პლეერის მენეჯმენტით, რაც მასწავლებლებს აძლევს შესაძლებლობას, მეტი დრო დაუთმონ სწავლებას და ნაკლები დრო – მომზადებას.
– როგორ გახსენდებათ სტარტაპზე მუშაობის ადრეული ეტაპი?
თავდაპირველად, ჩვენ შევქმენით პროდუქტი მხოლოდ საკუთარი თავისთვის, რათა რუტინული დავალებები გაგვემარტივებინა. მაგრამ შემდეგ შევამჩნიეთ, რომ ნიკას ქსელში ვოკალური მწვრთნელებიც იყენებდნენ ჩვენს პროგრამულ უზრუნველყოფას. სწორედ მაშინ მივხვდით, რომ მას, როგორც სერიოზულ პროდუქტს ჰქონდა პოტენციალი და შესაბამისად, დავიწყეთ მისი განვითარება.
– რა სირთულეებს წააწყდით ამ პროცესში?
ჩვენი მთავარი გამოწვევა განვითარებასთან დაკავშირებით არის დრო – ჩვენ გვინდა, სწრაფად მივაღწიოთ დიდ წარმატებას, მაგრამ ჩვენი გუნდი შედარებით პატარაა. თუმცა, ვცდილობთ, მაქსიმალურად გამოვიყენოთ ჩვენი რესურსები და თავდაუზოგავად ვიმუშაოთ.
– რა ეტაპზეა ამჟამად სტარტაპი?
ამჟამად, ჩვენი სტარტაპი MVP-ის შემდგომ ეტაპზეა და მაქსიმალურად ორიენტირებული ვართ ჩვენი აუდიტორიის გაზრდაზე.
– რატომ გადაწყვიტეთ 500 Georgia-ს პროგრამაში მონაწილეობის მიღება?
ჩვენი მეგობრები სწორედ ამ პროგრამის მონაწილეები იყვნენ და ბევრი კარგი რამ გვითხრეს მის შესახებ – ამიტომ გადავწყვიტეთ ჩვენც შეგვეტანა განაცხადი!
– როგორია თქვენი მოლოდინი პროგრამასთან დაკავშირებით?
იმ გამოწვევების დასაძლევად, რომელთა წინაშეც ვდგავართ დასაწყისში, ჩვენ ვეძებთ ხელმძღვანელობას გამოცდილი მენტორებისგან.