ჩვენი ბოლო შეხვედრის შემდეგ, საქართველოს ბანკი ცენტრალურ და აღმოსავლეთ ევროპაში წლის საუკეთესო ციფრულ ბანკად დასახელდა. ამასთან, მობილბანკი ყოველთვიური 1.3 მილიონი მომხმარებლით ყველაზე პოპულარული ქართული ციფრული პროდუქტი გახდა.
მნიშვნელობა არ აქვს, რისთვის იყენებ მობილბანკს — გადახდებისთვის, განსაკუთრებული შეთავაზებებისთვის თუ სულაც ინვესტიციებით ვაჭრობისთვის — აპლიკაცია მუდმივად ახლდება და შენზე მორგებული კიდევ უფრო მეტი ფუნქციონალი ემატება. აქ ერთ სივრცეშია თავმოყრილი ყველა საბანკო თუ არასაბანკო სერვისი, რომელიც ყოველდღიურობას გვიმარტივებს.
მობილბანკში კი კვლავაც სიახლეებია და ამაზე, ტრადიციულად, ჩვენს ბლოგში მოგიყვებით.
აპლიკაციას დაემატა მანქანის სივრცე
მანქანის სივრცე მობილბანკის უახლესი ფუნქციონალია, რომელსაც ადვილად იპოვი „ჰაბის“ განყოფილებაში და რეგისტრაციასაც სირთულეების გარეშე გაივლი: მიუთითებ პირად ნომერს, მანქანის ნომერს, ტექ. პასპორტის ნომერს და დაეთანხმები წესებსა და პირობებს.
ავტომფლობელებისთვის შექმნილ ამ სივრცეში თავმოყრილია ინფორმაცია საპატრულო და ვიდეოჯარიმებზე, თბილისი პარკინგის და ზონალური პარკირების საშვებზე.
მომსახურების სააგენტოსგან მიღებული ინფორმაციით, მანქანის სივრცე წუთში ერთხელ ახლდება; ასე რომ, პირდაპირ აქედან გაიგებ გამოწერილ ჯარიმაზე — მით უმეტეს, რომ ამ დროს შეტყობინებაც მოგივა. ამასთან, ნაჩვენები იქნება ჯარიმების რაოდენობა და ჯამურად გადასახდელი თანხა; აქ შეგიძლია ჩამონათვალი გახსნა და თითოეული ჯარიმა ნახო კიდეც და ამ სივრციდან გადაიხადო.
აღსანიშნავია, რომ როგორც საპატრულო ჯარიმებზე, მანქანის სივრციდან რამდენჯერმე მოგივა შეტყობინება, რომელიც გაცნობებს, რა დრო რჩება ვადის ამოწურვამდე.
ასევე ნახავ, თბილსიში პარკირების მოქმედი საშვი თუ გაქვს და როდემდე აქვს მას ვადა. ამასთან, მანქანის სივრციდანვე შეგიძლია საშვის შეძენის ინიცირება.
სივრცეში რამდენიმე ავტომობილის დამატებაც შეიძლება: თითოეულს შეურჩევ შესაბამის ფოტოს ან ემოჯსაც. 1-ელ ივნისამდე მანქანის სივრცით სარგებლობა უფასო იქნება, მერე კი, თითოეული მანქანის მომსახურების საკომისიო მხოლოდ 1 ლარი გახდება.
მობილბანკზე სხვა სიახლეებს შეგიძლია თვალი ადევნო ჩვენს ბლოგზეც.