როგორც ალბათ უკვე იცით, 11-დან 14 აპრილამდე, ექსპო ჯორჯიას საგამოფენო სივრცე მეოთხედ უმასპინძლებს თბილისის ხელოვნების ბაზრობას (TAF). ბაზრობა მსოფლიოს სხვადასხვა ქვეყნიდან ჩამოსულ ხელოვანებს, ხელოვნების მოყვარულებს, გალერეებს, კურატორებს და მედიის წარმომადგენლებს გააერთიანებს. მე-5 და მე-11 პავილიონებში ოთხი დღის განმავლობაში ქართველი და უცხოელი, დამწყები და გამოცდილი ხელოვანების ნამუშევრები იქნება წარმოდგენილი. ამასთან, აქ შეხვდებით არტ-სალონებს, კონცეპტ-არტ მაღაზიებსა და გამომცემლობებს. გამოფენებთან ერთად კი, მოეწყობა საგანმანათლებლო შეხვედრების სერიაც.
თბილისის ხელოვნების ბაზრობის მთავარი ხიბლი სწორედ ესაა: მრავალფეროვნება ერთ სივრცეში. ამასთან, ის ახალი კავშირების დამყარების, ახალი პროექტების გაჩენის და უცნობი გალერეების აღმოჩენის შესაძლებლობებსაც ქმნის.
თუმცა, როცა ღონისძიება ასეთი დატვირთულია საინტერესო ამბებით, უთუოდ დაგჭირდებათ გზამკვლევი, მით უფრო, თუ VIP-სტუმრობას აპირებთ. VIP ბილეთები SOLO კლუბის წევრებისთვის იქნება ხელმისაწვდომი, ეს შესაძლებლობა კი მოიცავს საინტერესო ტურებს, რომელთა ფარგლებშიც ქალაქის გამორჩეულ სტუდიებს და საგამოფენო სივრცეებს ეწვევით. პროგრამა კი ასეთია:
11 აპრილი
VIP სტუმრები, რასაკვირველია, პირველები ნახავენ გასახსნელად მომზადებულ სივრცეს. თქვენ ამის საშუალება 11 აპრილს, 12-დან 14 საათამდე გექნებათ. მოგვიანებით, გაიმართება შეხვედრა VIP სტუმრებთან და მედიასთან, საღამოს კი ფესტივალი ოფიციალურად აიღებს სტარტს და VIP წვეულებაც მოეწყობა.
12 აპრილი
ყველაზე საინტერესო ამბები სწორედ 12 აპრილს, პარასკევს დაიწყება. ფესტივალის პირველი გალერეა LC Queisser იქნება, რომელიც 16 საათიდან, მაზნიაშვილის 10-ში ქეთუთა ალექსი მესხიშვილის სოლო გამოფენას წარადგენს. იმავე ლოკაციაზე გამართავს გამომცემლობა კონა სოფიო მედოიძის წიგნის, Bastard Sun-ის, და ფილმის პრეზენტაციას. ეს წიგნი თავს უყრის 1990-იანი წლების შემდეგ გადაღებულ ფოტოებს, პატარა ჩანახატებსა და მოთხრობებს.
12 აპრილს ასევე მოეწყობა თედო რეხვიაშვილის სოლო გამოფენა Silk Factory-ში და მე-20 საუკუნის შვედი ხელოვანის, ულა როზენ ვინბლად კულიოლის, განმაცვიფრებელი გობელენების წარდგენა თბილისის თანამედროვე ხელოვნების მუზეუმში.
დღის დასასრულს კვლავაც წვეულებაა დაგეგმილი.
13 აპრილი
მოემზადეთ, რადგან უქმეები კიდევ უფრო დატვირთული იქნება. შაბათი დღე ძველი თბილისის თანამედროვე ხელოვნების გაცოცხლებას დაეთმობა. ამიტომ ისტორიულ ქუჩებში განთავსებულ არაერთ საინტერესო სივრცეს ეწვევით. გაითვალისწინეთ, რომ ქალაქის ეს ტური წინასწარ რეგისტრაციას საჭიროებს.
მოგზაურობა კი დილის 11-ის ნახევარზე, კვლავაც ექსპო ჯორჯიადან დაიწყება. საღამოს 4 საათისკენ მორიგ გალერეებსა და სტუდიებში სტუმრობის ჯერიც დადგება: Kurorti, 6 Room Flat, ნინო კინწურაშვილის სტუდია და ვორქშოპი თანამედროვე გრაფიკის ცენტრში.
18 საათიდან ძველთბილისური ტური ინგოროყვას ქუჩაზე გადაინაცვლებს, სადაც „ტრადიცია ინოვაციას ეწყმის“. ამ პატარა, მაგრამ მრავლისმომცველ მონაკვეთში ქალაქის მდიდარი მემკვიდრეობის წარმოდგენას შეეცდებიან გალერეა 4710, E.A. Shared Space, Art Beat, Gallery Fotoatelier, Corridor, Escapist, ათინათის კულტურული ცენტრი, ბაია გალერეა და Raum Space.
14 აპრილი
ფესტივალის ბოლო დღეც საინტერესო ვიზიტებით დახუნძლული იქნება. კვირა დღე უკვე თანამედროვე ქართული ხელოვნებისა და არქიტექტურის წარმოდგენას დაეთმობა.
ტური სტარტს 12 საათიდან, საპარლამენტო ბიბლიოთეკის არქივიდან აიღებს. მოგვიანებით, გადაინაცვლებთ ქართული სახვითი ხელოვნების მუზეუმში, სადაც კურატორი კოტე ბოლქვაძე გიმასპინძლებთ.
14:30-დან კი მერაბ გუგუნაშვილის სტუდიაში ვიზიტია დაგეგმილი. დღის და ფესტივალს დასასრულს, თბილისის სამხატვრო აკადემიის მუზეუმსაც ეწვევით.
TAF-ის ფარგლებში ექსპო ჯორჯიაში დაგეგმილი პროგრამებისა და ღონისძიებების შესახებ მეტს კი ამ ბლოგიდან გაიგებთ.