გამოფენა, პერფორმანსები, ვორქშოპები — რა გელოდებათ თბილისის თანამედროვე ხელოვნების ბაზრობაზე

გაზაფხულზე თბილისი კულტურული მოვლენების ცენტრში ისევ მოექცევა და ტრადიციისამებრ, თანამედროვე ხელოვნების საერთაშორისო ბაზრობას უმასპინძლებს. თანამედროვე ხელოვნების საერთაშორისო ბაზრობა — TAF ExpoGeorgia-ში 11-14 აპრილს გაიმართება და ევროპისა და აზიის ქვეყნებიდან ხელოვნებით დაინტერესებულ ადამიანებს კიდევ უფრო დააახლოებს, რადგან ეს ის ადგილია, სადაც ახალი ხელოვანებისა და იდეების აღმოჩენა ყველა სტუმარს შეუძლია.

TAF 2024-ზე წარმოდგენილი იქნება როგორც ადგილობრივი და საერთაშორისო გალერეები, ისე დამოუკიდებელი ხელოვანები, რომლებსაც საშუალება ექნებათ, თავიანთი ნამუშევრები ფართო აუდიტორიას გააცნონ. ხელოვნებით დაინტერესებულ ადამიანებს კი, არაერთი ახალი ნამუშევრის ნახვა და მათ ავტორებთან პირისპირ გასაუბრება შეეძლებათ. გარდა ამისა, TAF 2024-ზე ასევე შეხვდებით კურატორებს, კრიტიკოსებს, კოლექციონერებს, საერთაშორისო მედიასა და სტუმრებს მსოფლიოს სხვადასხვა ქვეყნიდან, რომლებსაც აზრებსაც გაუზიარებთ და უფრო მეტიც, სამომავლო პარტნიორები სწორედ მათ შორის შეიძლება იპოვოთ.

Tbilisi Art Fair, რომლის გენერალური სპონსორები SOLO და Visa არიან, საქართველოში უკვე მეოთხედ ტარდება და რეგიონში თანამედროვე ხელოვნების ყველაზე მასშტაბურ პლატფორმას წარმოადგენს. Tbilisi Art Fair-ის სტუმრებს გამოფენები, ვორქშოპები, Taf Talks სერია და სხვადასხვა ტიპის აქტივობები ელოდებათ, რომლებიც თანამედროვე ხელოვნების პოპულარიზაციასა და მსოფლიო არტსცენებს შორის თანამშრომლობის წახალისებას ისახავს მიზნად. თანამედროვე ხელოვნებით დაინტერესებული ადამიანები Tbilisi Art Fair ნამდვილად არ უნდა დააკლდნენ, რადგან წლევანდელი ღონისძიება კიდევ უფრო მეტ და მრავალფეროვან პროგრამებს მოიცავს.

გამოფენები

TAF-ის საგალერეო სივრცე 30 მონაწილე ქართულ და საერთაშორისო გალერეებს დაეთმობა. გალერეების მიერ წარმოდგენილი ნამუშევრების ნახვას კი TAF-ის სტუმრები მე-11 პავილიონში (ექსპოჯორჯია) შეძლებენ. სტუმრებს მრავალფეროვანი და საინტერესო ნამუშევრების დათვალიერების შესაძლებლობა ექნებათ, რადგან მონაწილეებს შორის არიან გალერეები, არტ სალონები, კონცეპტ-არტ მაღაზიები და გამომცემლობები. საგალერეო სივრცის გამოფენაში მონაწილეობის მსურველთა რეგისტრაცია ნებაყოფლობითია, მათგან კი საუკეთესოებს არტ დირექტორი გამოფენამდე 2 თვით ადრე შეარჩევს. რაც შეეხება ხელოვანების ინდივიდუალურ ნამუშევრებს,  მე-5 პავილიონში (ექსპოჯორჯია) 40-მდე ქართველი და უცხოელი დამწყები არტისტის ნამუშევრები გამოიფინება. ამ შემთხვევაშიც მონაწილეებს ჟიური გამოფენამდე 2 თვით ადრე შეარჩევს.

TAF-art talks საგანმანათლებლო შეხვედრების სერია

TAF 2024-ს საგანმანათლებლო ხასიათი ექნება და თანამედროვე ხელოვნების აქტუალური თემების შესახებ მსოფლიოს ცნობილ არტისტებთან, კურატორებთან და გალერისტებთან შეხვედრების სერია ჩატარდება. ბაზრობის ფარგლებში იგეგმება პერფორმანსები, ვორქშოპები TAF TALKS, TAF KIDS | SOLO KIDS, TAF | SOLO HOBBY და სხვა, რომლებიც როგორც ხელოვანებისთვის, ასევე თანამედროვე ხელოვნების მოყვარულებისთვის ბევრ საინტერესო თემას შეეხება. მოწვეულ სპიკერებს შორის არიან კურატორები, არტ მედიის წარმომადგენლები, ციფრული პლატფორმების წარმომადგენლები, კოლექციონერები, არტისტები და ასევე სახელოვნებო ინსტიტუციების წარმომადგენლები. ასე რომ, ხელოვნებით ტკბობასთან ერთად თუ საინტერესო ფაქტების გაგება გსურთ და ახალ ინსპირაციებსაც ეძებთ, TAF 2024 სწორედ საამისო ადგილია.

პარალელური პროგრამა რეწვის მიმართულებით

წელს TAF-ის პარალელური პროგრამის ფოკუსი იმ ხელოვანებზეა, რომლებმაც თავიანთ შემოქმედებაში არჩევანი რეწვაზე შეაჩერეს და ამ დარგს შინაარსობრივად და მიზნობრივად ემსახურებიან. ეს ხელოვანები ისტორიის ახლებურად გადმოცემას სწორედ რეწვის მეშვეობით ცდილობენ, რათა წინაპრების ტრადიციები თანამედროვე ხელოვნების სფეროში თარგმნონ. ტრადიციული მრეწველობის თანამედროვე ხელოვნებაში თარგმნას TAF-ის მონაწილე არაერთი ქართველი და უცხოელი ახალი თაობის ხელოვანი ცდილობს, რომლებიც ტექსტილის, მოზაიკის, ნაქარგის თუ სხვა მიმართულებით ამ კონცეფციით შესანიშნავ ნამუშევრებს ქმნიან. აქვე უნდა აღინიშნოს, რომ ფრანგულ გალერეა Odile Ouizeman-თან თანამშრომლობით, გამორჩეული ხელოვანის, Ulla Rosen Winbladh Culioli-ის, (ულა როსენ უინბლად კულიოლი?) ნამუშევრების მსოფლიო პრემიერა საქართველოში გაიმართება. სწორედ ხელოვნებით დაინტერესებული ქართველები გაეცნობიან პირველები ულას ნამუშევრებს, რომელიც ხელოვნების სამყაროსთვის სრულიად ახალი აღმოჩენაა.

ახალი შესაძლებლობები

TAF 2024 გამოფენილი ნამუშევრების დათვალიერებისა და სხვა აქტივობებში ჩართვის გარდა, მომავალი საქმიანი ურთიერთობების დასამყარებლადაც იდეალური შესაძლებლობაა. სწორედ TAF 2024-ია ის სივრცე, სადაც მსოფლიოში ცნობილი კოლექციონერები, საერთაშორისო არტმედია, კურატორები, დილერები და ამასთანავე, ადგილობრივი ხელოვნების პროფესიონალები დამსწრეებს შეხვდებიან, რას იმასაც ნიშნავს, რომ ახალი შესაძლებლობებისკენ ფართო გზა იხსნება. ამის დასტურია ისიც, რომ 2022 წელს თბილისის თანამედროვე ხელოვნების ბაზრობას 12000- ზე მეტი დამთვალიერებელი ჰყავდა, რომელთაგან 1200 უცხოელ დამთვალიერებელს შორის, მსოფლიოში ცნობილი კოლექციონერები, კურატორები, ცნობილი მუზეუმების წარმომადგენლები და ფონდები იყვნენ.

ამასთანავე, TAF-ზე ყოველწლიურად საერთაშორისო და ადგილობრივ მედიაში უამრავი სტატია იწერება, რომელთა შორისაცაა ცნობილი გამოცემები Ilgiornaledellarte (იტალია) The Artnewspaper (ბრიტანეთი), Le quotidien (საფრანგეთი) და სხვა. გალერეებისა და დამოუკიდებელი არტისტების ინფორმაციით კი, 2022 წლის გამოფენაზე 4 დღის განმავლობაში 120-ზე მეტი ნამუშევარი გაიყიდა, მათი ჯამური ღირებულება კი 550 000 ევრო იყო. ასე რომ, თუ ხელოვნების სფეროში ახალ საქმიან შემოთავაზებებსა და საინტერესო წინადადებებს ელით, TAF-ს არც ამ წელს უნდა დააკლდეთ.

არ გაჩერდე, გააგრძელე კითხვა