როგორ უნდა შექმნა პორტფოლიო Miami Ad School Europe-სთვის

ალბათ გაიგებდი, რომ Miami Ad School Europe-ში (MASE) ჩასარიცხად და ნიკა გუჯეჯიანის სახელობის სტიპენდიის მოსაპოვებლად კონკურსი უკვე გამოცხადდა. წელს მეხუთედ შეირჩევა ქართველი ახალგაზრდა, რომელსაც ბერლინში, მსოფლიოს საუკეთესო კრეატიულ სკოლაში, Art Direction-ისა და Copywriting-ის მიმართულებებით სრულიად უფასოდ სწავლის შესაძლებლობა მიეცემა. აპლიკაციების მიღების ბოლო ვადა 12 მაისია. გამარჯვებული ივნისის დასაწყისში დასახელდება. თუმცა, მანამდე მნიშვნელოვანია, ვიცოდეთ, რა და როგორ გავაკეთოთ.

აპლიკაციის შესავსებად რა ნაბიჯების გავლა გჭირდება, ამას ჩვენი სხვა ბლოგიდან გაიგებ. ამ ბლოგში კი აპლიკაციის ყველაზე მნიშვნელოვან  კომპონენტზე, პორტფოლიოზე, ვკონცენტრირდებით და გეტყვით, რაზე უნდა გაამახვილო ყურადღება მისი შექმნისას.

რა არის პორტფოლიო

პორტფოლიო ვიზუალური რეზიუმეა: მასში ჩანს შენი ინტერესები, შემოქმედებითი ხედვა და უნარები. ეს არის რჩეული ნამუშევრების კოლექცია, რომელიც შენს სავიზიტო ბარათად იქცევა.

„პორტფოლიოს შეკვრა სარეკლამო კამპანიის მოფიქრების, მისი განხორციელების პროცესს ჰგავს“, — გვეუბნება არტ დირექტორი ხატია არველაძე, — „ჯერ ვფიქრობთ იდეაზე, კონცეფციაზე, შემდეგ კი, ამ იდეის ქვეშ ვაქცევთ სხვადასხვა ნამუშევარს“.

ხატია ამბობს, პორტფოლიოს შეკვრისას, პირველ რიგში საკუთარ თავს სწორად ფორმულირებული დავალება უნდა მივცეთო — „მნიშვნელოვანია გვქონდეს კონკრეტული მიზანი ან კონკრეტული ამოცანა, რომელსაც პასუხი უნდა გავცეთ ჩვენი პორტფოლიოთი. ზუსტად უნდა ვიცოდეთ, რა ‘პრობლემა’ უნდა გადავჭრათ ჩვენი პორტფოლიოთი“.

ჩვენს შემთხვევაში, ამოცანა MASE-ის კომისიის წევრებისთვის თავის მოწონებაა. აი, ამ მხრივ კი, როგორც სკოლის მმართველი დირექტორი საბინ გეორგი აღნიშნავს, ქართველი აპლიკანტების პორტფოლიოებში თვალშისაცემია ნამუშევრებში ასახული ეროვნული მოტივები. მათში ხშირად ქართული ტრადიციების, ქართველი ხალხისა თუ ობიექტების ხაზი იგრძნობაო, ამბობს გეორგი.

„როდესაც ნათლად გავუწერთ ჩვენს თავს დავალებას, შემდეგ უკვე ვიწყებთ იდეაზე ფიქრს: ვინ ვართ და როგორ გვინდა, რომ ჩვენი სამიზნე აუდიტორია გვხედავდეს, რა ემოციას დავტოვებთ მათში“, — აღნიშნავს ხატია.

ემოციის გამოსაწვევად, საჭიროა, საუკეთესოსთან ერთად, მრავალფეროვანი ნამუშევრები გავაერთიანოთ. მაგალითად, დიზაინის მიმართულებით, ურჩევენ ხოლმე, გამოიყენონ სხვადასხვაგვარი პროექტები: ბრენდინგი, ვებდიზაინი, ბეჭდური მასალა.

როგორ შევკრათ პორტფოლიო

პორტფოლიოს შეკვრისას, თანაბრადაა მნიშვნელოვანი იდეა და მათი შესრულების ტექნიკური ხარისხი. ხოლო ნამუშევრების რაოდენობას რაც შეეხება, ხატიას თქმით, ეს ინდივიდუალურია.

„მნიშვნელოვანია, გავითვალისწინოთ, რომ პირველი 5-6 ნამუშევარი, რომელსაც ნახავს ჩვენი სამიზნე აუდიტორია, უნდა იყოს საუკეთესო. თუ 5 ნამუშევრით ვერ მოვახდინეთ შთაბეჭდილება, ესე იგი, რაღაც სწორად ვერ გაგვიკეთებია“, — ამატებს იგი.

ამიტომ, აუცილებელია ნამუშევრების სწორად შერჩევა. „უნდა გავითვალისწინოთ, რა არის ჩვენი ძლიერი მხარე და რა განხრით უფრო გვსურს მუშაობა“.

ხატია იმასაც ამატებს, რომ მნიშვნელოვანია, მარტივი ინტერფეისი გვქონდეს, რათა აუდიტორიას ნავიგაციისთვის და მნიშვნელოვანი დეტალების, მაგალითად, საკონტაქტო ინფორმაციის სანახავად დროის დაკარგვა არ მოუწიოს. ამ მიზნით, სასურველია სწორი სათაურების, დაყოფილი სექციებისა და დიზაინის ელემენტების თანმიმდევრული გამოყენება — ანუ იმგვარად, რომ აუდიტორიამ ნავიგაცია ინტუიციურად შეძლოს. ამასთან, უმჯობესია სადა ფერთა პალიტრისა და ადვილად აღსაქმელი ფონტების გამოყენება.

დასასრულს, შეგახსენებთ პორტფოლიოს მნიშვნელოვან ელემენტებს, რომლებიც არ უნდა გამოგრჩეს: გამხსნელი გვერდი, რომელიც შენს სახელსა და ფოტოსურათს მოიცავს, ერთგვარი სარჩევი, სადაც სექციებზე ინფორმაცია იქნება თავმოყრილი, ბიოგრაფიული და საკონტაქტო მონაცემები.

სხვათა შორის, MASE-ის წარმომადგენლები აპლიკანტებს ურჩევენ, აქტიურად გამოიყენონ არატრადიციული მედიუმებიც: მაგალითად, მოკლე ვიდეოები, ანიმაციები, თუნდაც ინსტაგრამგვერდი ან პირადი ვებსაიტი.

არც ის დაგავიწყდეს, რომ აპლიკაცია რეზიუმესაც მოიცავს. უფრო დეტალურ ინფორმაციას MASE-ისა და ნიკა გუჯეჯიანის სახელობის სტიპენდიაზე კი აქ გაიგებ.

არ გაჩერდე, გააგრძელე კითხვა