დათო ალავიძე H1Ta
რას ნიშნავს იუთუბერობა?
იუთუბერობა არის იდეა, რომელიც ძლიერ და წარმატებულ ადამიანს გამოხატავს
- აქ შეგიძლია აკეთო ის, რაც გიყვარს
- საყვარელი საქმე აქციო შენს პროფესიად
- პროფესია კი გაუზიარო მილიონობით ადამიანს და ამან მოგიტანოს ფინანსური სარგებელი
მაგალითად, თუ ხარ მეტყევე, შეგიძლია გადაიღო ვლოგი − „როგორია მეტყევე ადამიანის ერთი დღე“ − და ამან მოგიტანოს მილიონობით შემოსავალი.
რატომ გახდი იუთუბერი?
იუთუბერობა მომავლის პროფესიაა, რომლის აღმოჩენამაც საკმაოდ დიდი გონებრივი აფეთქება გამოიწვია ჩემში. მას შემდეგ იუთუბერობა ყველაზე საამაყო სტატუსად მიმაჩნია:
- აქ არ გყავს უფროსი
- აქ არ გაქვს სამუშაო გრაფიკი
- არ აქვს მნიშვნელობა, სად ხარ, რომელ ქვეყანაში, სოფელსა თუ ქალაში
- არ აქვს მნიშვნელობა შენს ასაკს
- და არც იმას, თუ რას საქმიანობ, მთავარია, გიყვარდეს ის, რასაც აკეთებ
თუ ვიდეოებს წინასწარ გადაიღებ და ავტომატური გამოქვეყნების ფუნქციაზე დააყენებ, შეგიძლია წახვიდე დასასვენებლად რამდენ ხანსაც გინდა; ამ შემთხვევაში არხი მაინც განაგრძნობს განვითარებას.
როგორ შეიძლება იქცეს იუთუბერობა შემოსავლის წყაროდ?
ანაზღაურების მოდელიც არ ჰგავს ხელფასის აღების ნაცნობ მეთოდს −
როცა ერთ თვეს ვმუშაობთ და თვის ბოლოს ვიღებთ ხელფასს.
აქ ანაზღაურებას იღებ ყოველი თვისას ერთად, რაც კი ოდესმე გიმუშავია.
მაგალითად, თუ მე ამ თვეში დავიწყე იუთუბერობა და გადავიღე, პირობითად, 5 ვიდეო, ამ თვის ბოლოს ავიღებ 5 ვიდეოდან გამომუშავებულ თანხას. შემდეგ თვეში, თუ კვლავ 5 ვიდეოს გადავიღებ, მეორე თვის ბოლოს ავიღებ უკვე 10 ვიდეოდან გამომუშავებულ თანხას და ასე, დაუსრულებლად.
წლების შემდეგ მე ვიღებ თანხას ასობით ან ათასობით ვიდეოდან; იმ ვიდეოდანაც კი, რომელიც სულ პირველად დავდე იუთუბზე.
მე, როგორც იუთუბერი, ვარ გუგლის ოფიციალური პარტნიორი; ეს კი იმას ნიშნავს, რომ ჩემს არხზე თითოეული ნახვა რაღაც თანხას გამოიმუშავებს. ამას გარდა, მაქვს კოლაბორაციები სხვადასხვა ბრენდთან.
არსებობს ასევე დონაციის ფუნქცია და ახლა ვმუშაობ საკუთარი „მერჩის“ შექმნაზეც, რომელიც ახლო მომავალში გაეშვება.
რომელი ინდუსტრიები იყენებენ ამ სივრცეს ყველაზე აქტიურად და რისთვის?
მსოფლიოში განვითარებული ინდუსტრიებიდან, ფაქტობრივად, ყველა მათგანი იყენებს იუთუბს თუნდაც პატარა კონტენტის შესაქმნელად, იქნება ეს საკუთარი სფეროს პოპულარიზაცია, რეკლამა და სხვ.
იუთუბზე გაკეთებულ რეკლამას, იუთუბერთან კოლაბორაციას, არ აქვს ალტერნატივა, რადგან ეს გულისხმობს „ორგანულ ნახვას“; „ორგანული ნახვა“ კი ნიშნავს, რომ იუთუბერებს ხალხი საკუთარი სურვილით, ინიციატივით უყურებს. სხვა პლატფორმაზე იხდი ფულს, რომ ნახვები მოგემატოს, აქ კი პირიქითაა.
როგორ დაიწყე ეს საქმიანობა? რა ან რა დრო დაგჭირდება ამ პროფესიის შესასწავლად?
იუთუბერობა ვისწავლე იუთუბზე.
მაგრამ რადგან ქართულად ვქმნი კონტენტს, მჭირდებოდა ქართული იუთუბის შესწავლა; ამასთვის კი ჩემს მეგობარ ზურასთან გავიარე კონსულტაციები, რომელიც 10 წლის იყო. მან იდეალურად ჩამომიყალიბა, თუ რა ხდებოდა ამ სფეროში, რისთვისაც დიდი მადლობა ზურას.
მაგრამ რადგან ქართულად ვქმნი კონტენტს, მჭირდებოდა ქართული იუთუბის შესწავლა; ამასთვის კი ჩემს მეგობარ ზურასთან გავიარე კონსულტაციები, რომელიც 10 წლის იყო. მან იდეალურად ჩამომიყალიბა, თუ რა ხდებოდა ამ სფეროში, რისთვისაც დიდი მადლობა ზურას.
იუთუბერი შეიძლება იყოს ერთი ადამიანი ან შეიძლება მუშაობდეს მთელი გუნდიც. თუ ერთი ადამიანი ხარ, რამდენიმე პროფესიის სწავლა გიწევს რაღაც საბაზისო დონეზე; გუნდის შემთხვევაში კი გადანაწილებულია, რაც ალბათ უკეთესია.
იუთუბერობისთვის საჭიროა:
- სცენარის აგება
- კამერასთან ურთიერთობა, მეტყველება
- განათების გამართვა
- ხმის სწორად ჩაწერა
- ხმის რეჟისურა (ჩემს პრაქტიკაში ეს ყველაზე რთულადსასწავლი რამ გამოდგა, რასაც ახლაც ვცდილობ დავხვეწო, შემდეგ მოდის მონტაჟი
- სწორად ატვირთვა − აქ იგულისხმება სწორი „თეგები“, მიმზიდველი სათაური, ვიდეოს აღწერა, „თამბნეილი“ და ა.შ.
რამდენად მოთხოვნადია ეს პროფესია მსოფლიო და ქართულ ბაზარზე?
როგორც პროფესიად, იუთუბერობა, დაახლოებით, 10 წლის წინ ჩამოყალიბდა.
ქართველი ბავშვების ძალიან დიდი ნაწილი ოცნებობს იუთუბერობაზე, მათ ყველაზე უკეთ იციან ამ სფეროს პოტენციალი, რაც, ვფიქრობ, ყველაზე კარგად წარმოაჩენს იმას, რომ იუთუბერობა მომავლის პროფესიაა.
პანდემიის დროს რა ცვლილებებია შენს სფეროში, გაიზარდა თუ არ მოთხოვნა და როგორ გგონია, რატომ?
პანდემიის დროს ძალიან ბევრმა ადამიანმა შექმნა იუთუბზე არხი, თუნდაც საქართველოში. შეიძლება ითქვას, „ქომუნითიც“ გაიზარდა, რამაც ძალიან მოკლე დროში რამდენიმე არხის რეკორდულად ზრდა განაპირობა.
მიზეზი მარტივია − ხალხი მეტ დროს ატარებდა ინტერნეტში, შეიძლება ითქვას, ამან დააჩქარა ფართო საზოგადოებაში იუთუბერობის სერიოზულ პროფესიად აღქმა.
რამდენად მარტივია იუთუბერობა?
იუთუბერობა ადვილი ნამდვილად არ არის, კარგი „კონტენტის“ შექმნას ძალიან ბევრი მუშაობა სჭირდება და ათამდე პროფესიის ცოდნა საბაზისო დონეზე მაინც. გარდა ამისა, ძალიან დიდი მონდომებაა საჭირო და მთელი შენი ენერგიის ამ საქმეში ჩადება.
სრულყოფილი იუთუბარხი დღეში 1 ვიდეოს უნდა დებდეს 10-წუთიანი ხანგრძლივობით. ეს იდეალური ვერსიაა.
მე, მაგალითად, ერთი 10-წუთიანი ვიდეოს დასამზადებლად დაახლოებით 15-საათიანი მუშაობა მჭირდება. აქედან გამომდინარე, კვირაში 2-3 ვიდეო ჩემი მაქსიმუმია, ჯერჯერობით.
ამიტომ თუ ერთი ადამიანი მუშაობს არხზე, ყოველდღიურ ვიდეოებამდე განვითარება თითქმის შეუძლებელია.
თუმცა ისეთი კონტენტებიც არსებობს, რომლებიც მხოლოდ ერთმა ადამიანმა უნდა აკეთოს მონტაჟითა და სხვა ყველაფრით. ასეთი არხები საშუალოდ კვირაში 1 ვიდეოს დებენ ხოლმე.
ამიტომ იუთუბერობა ადვილი ნამდვილად არ არის, თუმცა ასწორებს.
რა არასწორი შეხედულებებია საზოგადოებაში ამ პროფესიაზე?
რამდენიმე დღის წინ დაახლოებით 60 წლამდე ადამიანმა გადაიღო ჩემთან სელფი და მითხრა, რომ ჩემს შემეცნებით ვიდეოებს უყურებს ხოლმე, რაც ძალიან გამიკვირდა. ჩემი არხის ანალიტიკაში ვხედავ, რომ აუდიტორიის 6% 55 წელს გადაცილებულია.
საინტერესოა ისიც, რომ ქართულ იუთუბში შუა ასაკს გადაცილებული ბევრი ადამიანი იწყებს იუთუბერობას.
შესაბამისად, ნელ-ნელა ირღვევა ის შეხედულება, რომ უფროს თაობას არ ესმის ეს მიმართულება.
რა კომპანიებს აყავთ ეს კადრი თუ „ფრილანსლერად“ მუშაობენ?
იუთუბერი თვითონ არის კომპანია. იუთუბერობა არც „ფრილასერობას“ ჰგავს. ნებისმიერი ურთიერთობა კომპანიასა და იუთუბერს შორის არის 2 თანაბარუფლებიანი მხარის მოლაპარაკება.
შეიძლება კომპანიამ დაასპონსოროს იუთუბერის ერთი კონკრეტული ვიდეო ან „ფლეილისთი“; სპონსორობის სანაცვლოდ კი იუთუბერი მადლობას გადაუხდის ამ კომპანიას ან გაურეკლამებს რაღაც კონკრეტულ პროდუქტს, რაზეც შეთანხმდებიან. შეიძლება გაკეთდეს საერთო „მერჩიც“, რომლითაც იუთუბერი იქნება ვიდეოში. შეიძლება კონკრეტული ვიდეო მიეძღვნას სპონსორისთვის საინტერესო საკითხს ან შესაძლებელია ვიდეოს დასაწყისში სპონსორის PRE-roll ვიდეორგოლის ან out-roll ვიდეორგოლის ჩასმაც.
მთავარი, რაც იუთუბერთან გაკეთებულ რეკლამას გამოარჩევს, რამდენიმე ძალიან მნიშვნელოვანი საკითხია:
- ის, რომ რეკლამა სამუდამოა − თუ იუთუბერმა ვიდეო ან არხი არ წაშალა, რისი ალბათობაც ძალიან ნაკლებია, რეკლამა რჩება სამუდამოდ; იუთუბვიდეოები კი წლების განმავლობაში ნახვადია, რასაც თავად ალგორითმი განაპირობებს;
- იუთუბზე ვიდეო დამოუკიდებლად არ ირთვება, როგორც სხვა სოციალურ ქსელებში; ეს კი იმას განაპირობებს, რომ იუთუბვიდეოს ნახვები საშუალო სტატისტიკურ იუთუბერზე დაახლოებით 60%-მდეა. მაგალითად, 10-წუთიან ვიდეოს საშუალო ყურების დრო ექნებოდა 6 წუთი, როცა facebook-ზე 3-წამიანი ნახვები 80%-მდეა ხოლმე.
ვიდეოს „ჩამოსქროლვა“ ნახვად აღიქმება. ეს ყველაზე გასაგებად რომ ავხსნათ, ასეთ შედარებას მოვიყვან. დავუშვათ, გვაქვს 100 000 ნახვა Facebook-ზე და 100 000 ნახვა იუთუბზე. ორივე პლატფორმაზე ანალიტიკაში რომ ვნახოთ ნახვის დრო საათებში, პირობითად, თუ Facebook-ზე იქნება 50 000 წუთი, იუთუბზე, იმავე რაოდენობის ნახვაზე, 1 500 000 წუთს მივიღებთ; - იუთუბერი საკუთარ „ქომუნითში“ საკმაოდ დიდ ავტორიტეტს წარმოადგენს. ასე რომ, მის მიერ ამა თუ იმ კომპანიაზე პოზიტიურად ნახსენები სიტყვები მნიშვნელოვნად განაპირობებს ამავე კომპანიის შედეგებს;
- გარდა ამისა, კომპანიის სპონსორად მოხსენიებაც ძალიან ლოიალურად განაწყობს იუთუბერის „ქომუნითის“ ამ კომპანიის მიმართ, რადგან მისი საყვარელი იუთუბერის განვითარებაში შეაქვს წვლილი, რაც ძალიან დასაფასებელია.
რა დრო სჭირდება ამ პროფესიის სწავლას ისე, რომ ცადო სამუშაოს დაწყება ან შეკვეთის აღება?
სწავლის დრო ძალიან ინდივიდუალურია, შეიძლება ერთ დღეში გადაწყვიტო და დაიწყო. ასევეა შეკვეთის აღებაც, თუმცა შეკვეთის აღება არ გამოხატავს ზუსტად ამ ურთიერთობას, კოლაბორაცია უფროა, ალბათ. ეს შეიძლება მოხდეს დაწყებიდან 1 კვირაში ან რამდენიმე თვეში.
როდესაც იუთუბერობას დაიწყებ, მთავარია, მოაგროვო 1 000 გამომწერი და ყველა ვიდეოზე ჯამურად 4 000 საათი ნახვის დრო.
ამის შემდეგ პარტნიორობის შეთავაზებას გზავნი და თუ არ არღვევ სხვის საავტორო უფლებებს ან სხვა წესებს, „გუგლის“ პარტნიორი ხდები; უკვე ამ მომენტიდან კი შენი თითოეული ნახვა გამოიმუშავებს თანხას.
კოლაბორაცია ბრენდებთან მანამდეც შეიძლება და ამის შემდეგი შემთხვევებიც შენს ურთიერთობებზეა დამოკიდებული.
რამდენია იუთუბერის საშუალო შემოსავალი საქართველოში?
იუთუბერს შემოსავლის რამდენიმე წყარო აქვს. თუ განვიხილავთ მონეტიზაციას, შემოსავალი დამოკიდებულია აუდიტორიის ლოკაციაზე −
რომელ ქვეყანაშიც იმყოფება მაყურებელი ყურების მომენტში, იმის შესაბამისად გენერირდება თანხაც. საშუალოდ, ქართველი იუთუბერების ნახვების 15-20% საზღვარგარეთიდან არის, ვგულისხმობ ქართველ ემიგრანტებს, უცხოენოვანი მაყურებელი ვერ გაიგებს ქართულ კონტენტს.
საშუალოდ 1 ნახვა ამერიკიდან 10-ჯერ მეტ თანხას გამოიმუშავებს, ვიდრე 1 ნახვა საქართველოდან.
თუმცა უხეშად რომ ვთქვათ, ქართული კონტენტის მონეტიზაცია 1 000 ნახვაზე საშუალოდ 1 დოლარის შესაბამისია.
რაც შეეხება ბრენდებთან ურთიერთობას, ეს ძალიან ინდივიდუალურია. შეიძლება რამდენიმეწამიანი რეკლამის ანაზღაურება რამდენიმე ათასი დოლარი ღირდეს ან სულაც უფასოდ გააკეთო. ეს ის შემთხვევაა, როცა ბაზარი თითქმის ვერ არეგულირებს. მე ამდენად მიღირს ამის გაკეთება და მორჩა, თუ სხვა არხი, რომელსაც ორჯერ მეტი გამომწერი ჰყავს, იმავე რეკლამას უფრო იაფად გააკეთებს, გააკეთოს. ეს ჩემზე გავლენას ვერ ახდენს, რადგან მე ჩემი „ქომუნითი“ მყავს და თუ შენთვის ეს „ქომუნითი“ საინტერესოა, მე უნდა მესაუბრო ყოველგვარი გარეფაქტორების გარეშე.
შემოსავლის წყარო ასევე შეიძლება იყოს დონაცია. საქართველოში ყოფილა შემთხვევები, როცა, დაახლოებით, 1-საათიანი „ლაივის“ დროს რამდენიმე ათასი ლარი გადაურიცხეს ქართველ იუთუბერს გამომწერებმა.
„ქომუნითი“ სულ უფრო იზრდება და ვითარდება, ბიზნესიც უფრო აქტიურად ინტერესდება ქართული იუთუბით, რაც პანდემიამ კიდევ უფრო დააჩქარა.
ბევრი ნიშური არხიც გაჩნდა ბოლო თვეების განმავლობაში − მეფუტკრეობა, მეთევზეობა, მეღვინეობა, მხატვრობა და ა.შ. რაც კიდევ უფრო ამრავალფეროვნებს და ზრდის ქართული იუთუბის „ქომუნითს“.
ეს ყველაფერი კი საბოლოოდ თითოეული ქართველი იუთუბერის გაზრდას გულისხმობს, იუთუბის ნახვების ტრაფიკის 70% შემოთავაზებული ვიდეოდან არის, ეს კი იმას ნიშნავს, რომ ამ სფეროში კონკურენცია არ არსებობს.
თითოეული ახალი წარმატებული იუთუბერი ნიშნავს კიდევ უფრო დიდ წარმატებას უკვე არსებული იუთუბერებისთვის.
ამიტომ არის ეს მომავლის პროფესია, პროფესია კონკურენციის გარეშე.
განავითარე, არ გაჩერდე!