იცოდი, რომ დასაქმებულთა მეოთხედზე მეტს „გადაწვის“ სიმპტომები აღენიშნება? სწორედ ამ დასკვნამდე მივიდა 2022 წლის კვლევა, რომელშიც 15 ქვეყნიდან 15 ათასი ადამიანი მონაწილეობდა. გადაწვა ხანგრძლივი სტრესისა და აუარებელი საქმის გამო ემოციურად და ფიზიკურად გადაღლილ მდგომარეობას ეწოდება, როცა ადამიანს მარტივი დავალებების შესრულებაც კი უჭირს.
სტრესის გამომწვევი ფაქტორი ბევრია: სამუშაო სივრცის გარდა, ნერვული დაძაბულობა შეიძლება უკავშირდებოდეს ოჯახურ მდგომარეობას, ქვეყანაში ან მსოფლიოში მიმდინარე მოვლენებს და სხვა. ამ ყველაფრის გათვალისწინებით, განსაკუთრებით მნიშვნელოვანია, საკუთარ მენტალურ ჯანმრთელობაზე ზრუნვის აუცილებლობა გვესმოდეს.
სწორედ ამის სწავლებას ისახავს მიზნად საქართველოს ბანკის უფასო საგანმანათლებლო პლატფორმის, ბიზნესკურსის, ახალი სასწავლო კურსი მენტალური ჯანმრთელობა ბიზნესში.
რას ისწავლი კურსის ფარგლებში
მენტალური ჯანმრთელობა ბიზნესში 11 გაკვეთილს მოიცავს და მისი მიზანია, გაგაცნოს ის საბაზისო საკითხები, რომლებიც საკუთარი ფსიქიკური კეთილდღეობის შენარჩუნებასა და გაუმჯობესებაში დაგეხმარება. კურსს გამოცდილი ფსიქოთერაპევტი სოფო ტაბაღუა უძღვება.
კურსის ფარგლებში, შენ შეიტყობ, რა არის ფსიქიკური ჯანმრთელობა, როგორ შეგიძლია ამოიცნო მასთან დაკავშირებული პრობლემები. ასევე გაიგებ, როგორ მოქმედებს სტრესი ფსიქიკასა და სხეულზე, რა გზებით შეგიძლია მასთან გამკლავება და ზემოხსენებული გადაწვის თავიდან აცილება; რა როლი აქვს ძილს, კვებას, ემოციებისა და ფიქრების კონტროლს მენტალური ჯანმრთელობის შენარჩუნებაში. ამასთან, მიიღებ ინფორმაციას სამ სომატურ ტექნიკასა და აწმყოში ყოფნის ტექნიკებზე.
საბოლოო ჯამში, კურსის გავლა დაგეხმარება, იპოვო ბალანსი ყოველდღიურ ცხოვრებაში — სამსახურსა და პირად ცხოვრებას, ურთიერთობებსა და პირად სივრცეს შორის. ცხადია, ეს შენს პროფესიულ საქმიანობაზეც აისახება: კვლევები მოწმობს, რომ მენტალური მდგომარეობის გაუმჯობესება ადამიანებს გადაწყვეტილებების მიღებას უადვილებს, მატებს პროდუქტიულობას, თავდაჯერებულობასა და მიზანდასახულობას.
რატომ არის საჭირო მენტალურ ჯანმრთელობაზე საბაზისო ცოდნის ქონა
ფსიქიკურ ჯანმრთელობასთან დაკავშირებული საკითხები ათწლეულების განმავლობაში ტაბუირებული იყო, ადამიანების უმეტესობა კი საკუთარ მენტალურ მდგომარეობაზე ღიად საუბარს თავს არიდებდა. სწორედ ამ სტიგმის დასაძლევად და მენტალურ ჯანმრთელობაზე ცნობიერების ასამაღლებლად ბოლო წლებში აქტიურად დაიწყო სხვადასხვა კამპანიის წარმოება. თანამშრომლების მენტალური კეთილდღეობის როლი კომპანიის საქმიანობაში გაიაზრეს დამსაქმებლებმაც და ამ მიმართულებით მუშაობას შეუდგნენ. მაგალითისთვის, NASDAQ-ის 2022 წლის კვლევის მიხედვით, დამსაქმებლების 86 პროცენტი თანამშრომლების მენტალურ კეთილდღეობას კომპანიის ერთ-ერთ მთავარ პრიორიტეტად განიხილავს.
თუმცა, საკუთარ მენტალურ ჯანმრთელობაზე ზრუნვა ნებისმიერი ადამიანისთვისაც უნდა იყოს პრიორიტეტული. ამისთვის კი, პირველ რიგში, შესაბამისი საბაზისო ცოდნის ქონაა საჭირო. სწორედ ამ ცოდნის მოსაცემად შეიქმნა ბიზნესკურსის ეს სასწავლო კურსიც.
რა არის ბიზნესკურსი და კიდევ რას გთავაზობს ის
საქართველოს ბანკის შექმნილი პლატფორმა ბიზნესკურსი სხვადასხვა თემატიკის ათობით უფასო სასწავლო კურსსა და მასტერკლასს უყრის თავს. მისი საშუალებით შეიძენ თანამედროვე ბიზნესის სამართავად საჭირო ცოდნასა და უნარებს. ბიზნესკურსი დაგეხმარება, დაგეგმო და განახორციელო ყველა ნაბიჯი ბიზნესის იდეიდან გამართულ მარკეტინგამდე. პლატფორმა მოიცავს სამეწარმეო საქმიანობის თითქმის ყველა ასპექტს: გაყიდვებს, მომსახურების მენეჯმენტს, ბუღალტერიას, რეკლამირებას, ადამიანური რესურსების მართვას და სხვა. საგულდაგულოდ შედგენილ სასწავლო კურსებს კი სხვადასხვა სფეროს წამყვანი სპეციალისტები უძღვებიან.
ბიზნესკურსის შესახებ მეტის გაგებასა და პლატფორმაზე რეგისტრაციას ვებგვერდზე შეძლებ.