თბილისურ აივნებს რომ საუნდტრეკი ჰქონდეთ, ეს უდავოდ „თოლია“ იქნებოდა — სიმღერა, რომლის მელოდიაც ნებისმიერს ააღიღინებს, პირველად სწორედ აივანზე შესრულდა, ფილმში „თოჯინები იცინიან“. სულხან ცინცაძის ამ ორიგინალურ კომპოზიციას მაშინ კვარტეტი ოთხი გია ასრულებდა, საქართველოს ბანკის ახალ, სარვამარტო ვიდეორგოლში კი სიმღერა ოთხმა ახლგაზრდა მუსიკოსმა გოგომ გააცოცხლა.
ფერად ვიდეოში კატო კვარაცხელია, ნინა ყიფშიძე, ფანიკო და ანა უზნაძე გიტარის თანხლებით „თოლიას“ ახალ ვერსიას ასრულებენ, თან — მოძრავ აივანზე სხედან და თბილისის ქუჩებში მოგზაურობენ. კონცეფციაც სწორედ ეს გახლდათ: „თოლიას“ განუყრელ მეგობარს, აივანს, ქუჩებში უნდა ევლო და ყველგან გაზაფხულის ლაღი განწყობა მიეტანა.
რადგან ვიდეორგოლი ქალთა საერთაშორისო დღისთვის მზადდებოდა, მნიშვნელოვანი იყო, სიმღერის ახალი ინტერპრეტაცია ოთხ საინტერესო და ერთმანეთისგან გამორჩეულ არტისტს გაეჟღერებინა. შემსრულებლების განსხვავებული სტილი ოთხი სხვადასხვა ფერის სამოსითაც გამოიხატა და კოლაბორაცია შედგა: ფერებიც ისე ჰარმონიულად შეეხამა ერთმანეთს, როგორც ოთხი გოგოს ხმები.
და მაინც, რატომ „თოლია“?
„იმიტომ რომ ‘თოლია’ ყველას გვიყვარს, ყველამ ვიცით. რთულია არ აგიყოლიოს, არ აგაღიღინოს, არ აგამხიარულოს“, — ამბობენ კრეატიულ სააგენტო JWT Metro-ში, რომელმაც ვიდეორგოლზე იმუშავა.
სააგენტოში ჰყვებიან იმასაც, რომ მუშაობის პროცესი გამოწვევებით სავსე, მაგრამ ამასთან ძალიან საინტერესო იყო:
„ბევრი გადაწყვეტილება იყო მისაღები: რამდენად ახლოს უნდა ყოფილიყო სიმღერა ორიგინალთან, რომელი არტისტი რა სტილით იქნებოდა წარმოდგენილი… ერთ ერთი მთავარი გადასაწყვეტი საკითხი, ცხადია, ისევ აივანი იყო: რა ფორმის, რა ზომის, რა მასალის და რაზე შემდგარი იქნებოდა, იმისთვის, რომ ყველაფერს კარგად ემუშავა“.
საბოლოოდ, ყველაფერმა იმუშავა: ჩვენ კი ვერ ვხედავთ, აივანი როგორ დამოგზაურობს ქუჩებში, მაგრამ ეს სულაც არაა მნიშვნელოვანი დეტალი. მნიშვნელოვანი ისაა, რომ სიმღერასაც და ვიდეოსაც ჩვენამდე ნამდვილი თბილისური გაზაფხულის განწყობა მოაქვს.
„მსმენელისთვის ჩემი სურვილი და სათქმელი იქნება, რომ იყოთ ისეთივე ლაღები, ენერგიულები, უდარდელები და ხალისიანები, როგორც სიმღერა ‘თოლია’“, — ამბობს მომღერალი ანა უზნაძე.