პარიზი 2024 | საქართველოს ჯუდოს ნაკრების ასპარეზობის შეჯამება

მას შემდეგ, რაც 1996 წელს დამოუკიდებელმა საქართველომ ოლიმპიურ თამაშებზე პირველად იასპარეზა, ჯუდოს ნაკრები ქვეყნისთვის ყოველთვის ახერხებს მინიმუმ ერთი მედლის მოპოვებას. გამონაკლისი არც პარიზის ოლიმპიადა იყო, სადაც ლაშა გუჯეჯიანის გუნდის წევრებმა სამი მედალი – 1 ოქრო და 2 ვერცხლი მოიპოვეს.

პარიზის ოლიმპიადაზე ქართველებისთვის ისტორიული ფაქტი დაფიქსირდა – ლაშა ბექაური ქვეყნის ისტორიაში პირველი ჯუდოკა გახდა, რომელმაც ოლიმპიური თამაშები ორჯერ მოიგო.

ამ ბლოგში შევაჯამებთ 2024 წლის ოლიმპიურ თამაშებზე საქართველოს ჯუდოს ნაკრების თითოეული წევრისა და მთლიანად გუნდის ასპარეზობას.

ჯუდოს შეჯიბრი ქართველებიდან 27 ივლისს გიორგი სარდალაშვილმა გახსნა. გიორგი პარიზის ოლიმპიურ თამაშებზე მოქმედი მსოფლიო ჩემპიონის სტატუსით ჩავიდა. მისი ეს მიღწევა გვაძლევდა იმის თქმის შესაძლებლობას, რომ ოლიმპიადის ერთ-ერთი მთავარი ფავორიტიც იყო.

სარდალაშვილმა მერვედფინალურ ეტაპზე ისრაელის ნაკრების წევრი იამ ვოლჩაკი დაამარცხა. მეოთხედფინალში მისი მეტოქე თურქი სალიჰ ილდიზი იყო. ეს შეხვედრა ძალიან დაძაბული გამოდგა და გამარჯვებული დამატებით დროში გამოვლინდა.

სარდალაშვილი რეპეშაჟში გადაერთო, ამ ეტაპიდან მას ბრინჯაოს მედლის მოპოვების შანსი ჰქონდა. ქართველმა ჯუდოკამ რეპეშაჟში კორეელი ჯინ ვონ კიმი მარტივად, წუთ-ნახევარში, დაამარცხა და ბრინჯაოს ფინალში გამოსვლის უფლება მიიღო. გადამწყვეტ შეხვედრაში გიორგი ტიტულოვან ესპანელთან, ფრანცისკო გარიგოსთან, დამატებით დროში ვაზარით დამარცხდა და სადებიუტო ოლიმპიადა უმედლოდ დაასრულა.

საშეჯიბრო დღის დასრულების შემდეგ 21 წლის ჯუდოკამ აღნიშნა, რომ მან შეცდომები დაუშვა და წარმატების მისაღწევად გამოცდილება დააკლდა. რაც მთავარია, გიორგიმ თქვა, რომ ის გაჩერებას არ აპირებს!

ვაჟა მარგველაშვილი ევროპის მოქმედი ჩემპიონი და ტოკიოს ოლიმპიადის ვერცხლის მედალოსანია. როგორც ნაკრების დანარჩენ წევრებს, მასაც მედლის კანდიდატად მოიაზრებდნენ.

ვაჟა ასპარეზობაში მეორე წრიდან, მერვედფინალიდან ჩაერთო. სამწუხაროდ, ის მისთვის პირველივე შეხვედრაში მასპინძელი ქვეყნის წარმომადგენელ ვალიდე ხიართან დამარცხდა და პარიზის ოლიმპიურ თამაშებს გამოეთიშა.

თამამად შეგვიძლია ვთქვათ, რომ ლაშა შავდათუაშვილი ქართული ჯუდოს ცოცხალი ლეგენდაა. ის ერთადერთი ქართველი ჯუდოკაა, რომელსაც სამივე დიდი ტურნირი (ოლიმპიური თამაშები, მსოფლიო ჩემპიონატი, ევროპის ჩემპიონატი) მოგებული აქვს. ასევე, ის ერთადერთი ქართველი ჯუდოკაა, რომელსაც ოლიმპიადაზე სამი მედალი აქვს მოპოვებული – ოქრო, ვერცხლი, ბრინჯაო.

ყველასთვის მოულოდნელად, 32 წლის ქართველი პირველივე შეხვედრაში მასპინძელი საფრანგეთის ნაკრების წევრ ბენჟამინ გაბასთან დამარცხდა.

დარწმუნებულები ვართ, ლაშა ისტორიის გაგრძელებას 4 წელში ლოს ანჯელესში შეეცდება.

ტატო გრიგალაშვილი მსოფლიოსა და ევროპის 3-გზის ჩემპიონია. ყველანაირი უფლება გვაქვს ვთქვათ, რომ ტატო პარიზის ოლიმპიადის მთავარი ფავორიტი იყო.

მსოფლიოსა და ევროპის მოქმედმა ჩემპიონმა 1/16 ფინალში მოლდოველი მიხაილ ლატისევი დაამარცხა, მერვედფინალში კი ავსტრიის წარმომადგენელ ვახიდ ბორჩაშვილს სძლია. ტატომ მეოთხედფინალში ტაჯიკ სომონ მახმადბეკოვს დამატებით დროში ვაზარი აუღო და ნახევარფინალის საგზური მოიპოვა.

გრიგალაშვილი ნახევარფინალში კორეელ ჯოონჰვან ლის დაუპირისპირდა და მეტოქე დაძაბულ ორთაბრძოლაში, დამატებით დროში, ვაზარით დაამარცხა.

ქართველი ჯუდოკა ფინალში მოქმედ ოლიმპიურ ჩემპიონს, ტაკანორი ნაგასეს შეხვდა. სამწუხაროდ, ტატომ იაპონელთან ორი ვაზარი გაუშვა და ფინალურ დაპირისპირებაში დამარცხდა.

მიუხედავად მარცხისა, ტატო გრიგალაშვილმა საქართველოს პარიზის ოლიმპიურ თამაშებზე პირველი მედალი მოუპოვა – ვერცხლი ჩვენი დელეგაციის მონაგარში ჩაეწერა.

31 ივლისს საქმეში მოქმედი ოლიმპიური ჩემპიონი ლაშა ბექაური ჩაერთო, რომლისთვისაც ეს დღე ისტორიული გამოდგა.

ლაშამ მერვედფინალში ბულგარელ ივაილო ივანოვს სძლია, მეოთხედფინალში კორეელი ჯუიეოპ ჰანი დაამარცხა, ნახევარფინალში კი ესპანეთის სახელით მოასპარეზე ტატო მოსახლიშვილს მოუგო.

ბექაურმა ფინალურ შეხვედრაში მებრძოლი ხასიათი და გამარჯვებულის მენტალიტეტი გამოავლინა. ორთაბრძოლის დაწყებიდან ერთ წუთში იაპონელმა სანშირო მურაომ ლაშას ვაზარი გაუკეთა და დაწინაურდა. თუმცა, „301-ე არაგველმა” შეხვედრის დასრულებამდე წუთ-ნახევრით ადრე ანგარიში გაათანაბრა, ბოლოს კი მეორე ვაზარიც გააკეთა და ოლიმპიური ჩემპიონი ზედიზედ მეორედ გახდა.

ამ გამარჯვების შემდეგ ლაშა ბექაური პირველი ქართველი ჯუდოკაა ისტორიაში, რომელმაც ოლიმპიადაზე ოქროს მედალი ორჯერ მოიპოვა.

ყველამ ვიცით, რომ ლაშა ამაზე გაჩერებას არ აპირებს, მისი მიზანი 4 ოლიმპიური ოქროა.

ილიამ მთელი დღე დამაჯერებელი გამარჯვებებით დაიწყო. მან ერთმანეთის მიყოლებით დაამარცხა ჯენარო პირელი, აარაონ ვულფი, დანიელ აიხი და ფინალში გავიდა.

ილია ფინალში ვაზარით იმარჯვებდა, თუმცა შეხვედრის დასრულებამდე 15 წამი იყო დარჩენილი, როცა მეორე შიდო მიიღო, 7 წამში კი მსაჯმა მას მესამე გაფრთხილება უჩვენა, რაც იმას ნიშნავს, რომ სულამანიძემ ფინალური შეხვედრა დათმო.

ეს მომენტი როგორც ილიასთვის, ისე ქართველი გულშემატკივრებისთვის მძიმე გამოდგა. თუმცა, რა შეგვიძლია ვთქვათ – ილია ჯერ მხოლოდ 23 წლისაა, ოლიმპიური ვერცხლი კი ძალიან დიდი წარმატებაა. გვჯერა, რომ მომავალში მას ისევ შეეცდება ოქროს მედლის მოპოვება და საკუთარ შანსს აუცილებლად გამოიყენებს.

გურამ თუშიშვილიც პარიზის ოლიმპიადის ერთ-ერთ ფავორიტად მიიჩნეოდა. თუმცა, წილისყრამ მას საქმე ნაადრეევად გაურთულა. პირველი გამარჯვებების შემთხვევაში გურამის მეტოქე მეოთხედფინალურ ეტაპზე ტედი რინერი უნდა ყოფილიყო.

მოლოდინი გამართლდა – მათ საკუთარი პირველი დაპირისპირებები მოიგეს და მეოთხედფინალში ერთმანეთს სწორედ ქართველი და ფრანგი ჯუდოკები შეხვდნენ.

თუშიშვილი-რინერის შეხვედრა დაძაბულ ვითარებაში წარიმართა. ფრანგმა ქართველი იპონით დაამარცხა, თუმცა საზოგადოებას ამ დაპირისპირებიდან ის უფრო ახსოვს, რაც ილეთის შემდეგ მოხდა. ჯუდოკები ერთმანეთს სიტყვიერადაც დაუპირისპირდნენ, იყო ჯუდოსთვის შეუფერებელი საქციელები ორივე მხრიდან. საბოლოოდ, გურამი მომხდარი ინციდენტის გამო დისკვალიფიკაციით დაისაჯა – მან რეპეშაჟში გამოსვლის უფლებაც დაკარგა და ასევე, მომდევნო დღეს გუნდურ შეჯიბრში ასპარეზობაც აეკრძალა.

ჯუდოს საერთაშორისო ფედერაციის სადისციპლინო კომიტეტი ამ ინციდენტს უახლოეს პერიოდში განიხილავს და საბოლოო სასჯელის შესახებ გადაწყვეტილებას მიიღებს. იქამდე თუშიშვილს მომავალ ტურნირებში გამოსვლის უფლება არ აქვს.

ეთერ ლიპარტელიანის წვლილი საქართველოს ქალთა ჯუდოში ფასდაუდებელია. ის პირველი ქართველი ქალი ჯუდოკაა, ვინც ევროპის ჩემპიონატზე მედალი მოიპოვა და მოიგო გრან სლემი. ეთერი ახლოს იყო, რომ კიდევ ერთი ისტორია დაეწერა და მედალი ოლიმპიურ თამაშებზეც მოეპოვებინა.

ეთომ 1/16-ფინალში ბრიტანელი ნაირნი დაამარცხა, შემდეგ კი უზბეკ შუკურჯონ ამინოვას მოუგო. მეოთხედფინალში ქართველს ურთულესი მეტოქე, ოლიმპიური და მსოფლიო ჩემპიონი რაფაელა სილვა, შეხვდა. სილვამ ლიპარტელიანი დაამარცხა, ქართველი კი რეპეშაჟში გადაერთო.

ეთერმა რეპეშაჟში მონღოლ ენხრიილენ ლხაგვატოგოოს მარტივად, 33 წამში, იპონით მოუგო და ბრინჯაოს ფინალში გადავიდა. ბრინჯაოს მედლისთვის შეხვედრაში ლიპარტელიანი ფრანგ, მსოფლიოს, ევროპისა და ოლიმპიადის მრავალგზის პრიზიორ სარა ლეონი სიზიკს შეხვდა. სამწუხაროდ, ეთო იპონით დამარცხდა.

მიუხედავად ამისა, ეთერ ლიპარტელიანის მებრძოლი ხასიათი და სპორტული მონაცემები გვაძლევს იმის იმედს, რომ ის საქართველოს ქალთა ჯუდოს ისტორიის წერას ოლიმპიურ თამაშებზე მომავალშიც განაგრძობს.

ეთერ ასკილაშვილისთვის პარიზის ოლიმპიური თამაშები სადებიუტო იყო. 20 წლის ქართველი ჯუდოკა პირველივე წრეში დამარცხდა სლოვენიელ ანდრეა ლესკისთან.

მართალია, მარცხი ყოველთვის მტკივნეულია, თუმცა ეთერისთვის პარიზის ოლიმპიადაზე მონაწილეობა დიდი გამოცდილებაა, რომელსაც მომავალში დაგეგმილ ტურნირებზე გამოიყენებს.

პარიზის ოლიმპიური თამაშები სოფიო სომხიშვილისთვისაც პირველი იყო. სოფიომ სადებიუტო შეხვედრაში გერმანელი რენე ლუხტი ბრწყინვალე იპონით დაამარცხა. მერვედფინალში მისი მეტოქე ფრანგი რომან დიკო იყო, ვისთანაც ქართველი სამი გაფრთხილებით დამარცხდა და ოლიმპიადას გამოეთიშა.

სხვების მსგავსად, პარიზის ოლიმპიური თამაშები სოფიოსთვისაც დიდი გამოცდილება იქნება.

საქართველოს ჯუდოს ნაკრები

თავიდანვე უნდა ვთქვათ, რომ გურამ თუშიშვილის დისკვალიფიკაციის გამო საქართველოს ნაკრები შერეულ გუნდურ შეჯიბრს დიდი დანაკლისით შეხვდა.

ჩვენი გუნდი ასპარეზობაში მეორე წრიდან, მერვედფინალიდან ჩაერთო, სადაც მეტოქე იტალიის ნაკრები იყო.

დაპირისპირება ძალიან დაძაბული გამოდგა. ძირითადი შეხვედრების შემდეგ ანგარიში ფრე – 3:3 იყო. ამიტომაც ლოტოტრონმა შემთხვევითობის პრინციპით გამარჯვებულის გამოვლენა -73კგ წონითი კატეგორიის ჯუდოკებს ანდო. სამწუხაროდ, აქ ლაშა შავდათუაშვილი მანუელ ლომბარდოსთან დამარცხდა და საქართველოს ნაკრები შეჯიბრს გამოეთიშა.

საერთო ჯამში, პარიზის ოლიმპიური თამაშების ჯუდოს ტურნირში მონაწილეობა 38 ქვეყნის სპორტსმენებმა მიიღეს. საქართველოს ნაკრებმა 1 ოქროსა და 2 ვერცხლის მედალი მოიპოვა. ამ მაჩვენებლით ჩვენმა გუნდმა ჯუდოში 38 ქვეყანას შორის მე-4 ადგილი დაიკავა.

1. იაპონია – 3 ოქრო, 1 ვერცხლი, 3 ბრინჯაო
2. აზერბაიჯანი – 2 ოქრო
3. საფრანგეთი – 1 ოქრო, 2 ვერცხლი, 6 ბრინჯაო
4. საქართველო – 1 ოქრო, 2 ვერცხლი
5. ბრაზილია – 1 ოქრო, 1 ვერცხლი, 1 ბრინჯაო