მზადება კალათბურთის მსოფლიო ჩემპიონატისთვის, რომელიც ისტორიულია საქართველოს ეროვნული ნაკრებისთვის

25 აგვისტოდან 10 სექტემბრის ჩათვლით ერთდროულად სამ ქვეყანაში – ფილიპინებში, იაპონიასა და ინდონეზიაში კალათბურთის მსოფლიო ჩემპიონატი ჩატარდება. წლევანდელი მსოფლიო ჩემპიონატი იქნება ისტორიაში პირველი, რომელშიც საქართველოს საკალათბურთო ნაკრებიც მიიღებს მონაწილეობას. როგორც მანამდე, ისე ამ ისტორიულ მომენტშიც ეროვნული ნაკრების მთავარი სპონსორი საქართველოს ბანკია.

ტურნირში სულ 32 ნაკრებია, რომლებიც გადანაწილებულნი არიან რვა 4-გუნდიან ჯგუფში; საქართველოს საკალათბურთო ნაკრები F ჯგუფში მოხვდა.

F ჯგუფში საქართველოსთან ერთადაა სლოვენია, ვენესუელა და კაბო-ვერდე – სამი სრულიად განსხვავებული მეტოქე და სამი სრულიად განსხვავებული შეხვედრის მოლოდინი მსოფლიო ჩემპიონატის ისტორიულ ჯგუფურ ეტაპზე. ილიას ზუროსის გუნდი იაპონიაში ჩავა და მატჩებს ქალაქ ოკინავაში [Okinava Arena] გამართავს. ჯგუფური ეტაპის დასაძლევად საჭირო იქნება ჯგუფის ორ საუკეთესო ნაკრებში მოხვედრა, თუმცა შანსებზე ჯერ ასე ადრე საუბარი რთულია, რადგან მეტოქეების ტაქტიკურ სქემებზე წინასწარ ვარაუდი არც ისე მარტივია.

მთავარი გუნდის ერთიანობა და ამ ერთიანობასთან ორგანულად შერწყმული ჩვენი ინდივიდუალისტების (რომელთა ნაკლებობას ნამდვილად არ ვუჩივით) გამორჩეულად კარგი თამაში იქნება. თუკი მოხდა ისე, რომ ჩვენ ვერ შევძელით და ვერ დავძლიეთ ჯგუფური ეტაპის ბარიერი, მოგვიწევს მეჩვიდმეტე-ოცდამეთორმეტე ადგილებისთვის ბრძოლის გაგრძელება, ანუ, ამ მსოფლიო ჩემპიონატის ფორმატის მიხედვით, ყველაფერი ჯგუფში ჩარჩენით არ მთავრდება.

მსოფლიო ჩემპიონატის დაწყებამდე საქართველოს კალათბურთელთა ნაკრებმა 21 ივლისს იტალიის ქალაქ ტრევიზოში დაიწყო მთავარი შეკრება, რაც ერთგვარი გენერალური რეპეტიციაა ისტორიულ ტურნირამდე.

შეკრებაზე სულ 18 კალათბურთელი იმყოფება, მათგან ტურნირის დაწყებამდე 12 მათგანი უნდა შეირჩეს და საბოლოო სატურნირო შემადგენლობა დასახელდეს:

ილიას ზუროსს ამ შემადგენლობის შერჩევისთვის, დაახლოებით, ორი კვირა და ამ ორ კვირაში გასამართი 7 ამხანაგური შეხვედრა აქვს.

პირველ ამხანაგურ სპარინგს ჩვენი გუნდი იტალიის ქალაქ ტრევიზოში ეგვიპტის ნაკრების წინააღმდეგ გამართავს. შემდეგ ნაკრები ლატვიასა (1 აგვისტო) და ლიეტუვაში (5 აგვისტო) გაემგზავრება და ძლიერ, გამოცდილ ევროპულ ნაკრებებთან გამოცდიან ძალებს; 12 და 13 აგვისტოს კი ცოტა ხნით სამშობლოში დაბრუნდებიან და თბილისში რამდენიმე საერთაშორისო ამხანაგური შეხვედრა ჩატარდება. თბილისს მონტენეგროს, იორდანიისა და ირანის ეროვნული ნაკრებები ეწვევიან და შეხვედრებს ტურნირის ხასიათი ექნება. ირანის ნაკრებთან ერთი დახურული ამხანაგური მატჩიც გაიმართება; მერე კი, 17 აგვისტოს ილიას ზუროსი და მის მიერვე შერჩეული 12 ქართველი კალათბურთელი გაემგზავრება იაპონიის კუნძულ ონიაკავაზე და მანამ, სანამ ჩაერთვება უდიდეს საკალათბურთო ზეიმში, 22 აგვისტოს კიდევ ერთ ამხანაგურ მატჩს ჩაატარებს ძალიან ძლიერი ავსტრალიის ნაკრების წინააღმდეგ.

აი, მერე კი დამოუკიდებელი საქართველოს საკალათბურთო ისტორიაში სამი გამორჩეულად მნიშვნელოვანი შეხვედრა მოდის:

კაპე-ვერდე V საქართველო – 26.08.23

საქართველო V სლოვენია – 28.08.23

საქართველო V ვენესუელა – 30.08.23

მოსამზადებელ პერიოდში ყველაზე მთავარი და მნიშვნელოვანია ნაკრების ძირითადი ბირთვის ჯანმრთელობა და მსოფლიო ჩემპიონატამდე აბსოლუტურად უდანაკარგოდ და უდანაკლისოდ მისვლა. გვაქვს არაერთი მწარე და მძიმე გამოცდილება, როცა დიდ ტურნირამდე საქართველოს საკალათბურთო ნაკრებს გამოაკლდნენ გუნდის ლიდერები და კაპიტნები, მთელი ტაქტიკური და კომბინაციური სქემების მთავარი საყრდენები. გვჭირდება უპრეცედენტოდ ჯანმრთელი შემადგენლობა და ზუსტად ის ძირითადი ხუთეული და სათადარიგო სკამი, რომლებსაც აქედანვე მოიაზრებენ ილიას ზუროსი და მისი ასისტენტები.

გოგა ბითაძისა და სანდრო მამუკელაშვილის სახით კარგი და სრულფასოვანი შევსება გვაქვს NBA-დან; ევროპული კალათბურთის ნამდვილი ვარსკვლავები, თორნიკე შენგელია და გიორგი შერმადინი კარგ ფორმაში არიან; რატი ანდრონიკაშვილის ნიჭისა და გიორგი ცინცაძის გამოცდილების შერწყმაც გვაძლევს იმედს გამთამაშებლის პოზიციაზე; ალბათ, ბოლო დიდ ტურნირს ითამაშებს ჩვენთან ერთად ჩვენი ლეგიონერი, თად მაკფადენი და მისი სროლის ყველაზე მეტად ახლა უნდა დავიჯეროთ; დუდა სანაძე და მიხეილ ბერიშვილიც ბევრს ჩაყრიან – ესაა ჩვენი საერთო იმედები და მოლოდინები, დანარჩენს უკვე ისტორიული მნიშვნელობის მქონე ტურნირი გვიჩვენებს.

ავტორი: გიორგი ყორღანაშვილი