ბრძოლა მსოფლიო ჩემპიონატის საგზურისთვის გრძელდება

საქართველოს ეროვნული საფეხბურთო ნაკრები აგრძელებს ბრძოლას მსოფლიო ჩემპიონატის საგზურისთვის – მორიგი სანაკრებო პაუზა და ერთა ლიგის ტური მოახლოვდა, რომელშიც ჩვენი ნაკრები ორ მნიშვნელოვან შეხვედრას გამართავს:

უკრაინა VS საქართველო – 11 ოქტომბერი, 22:45 საათი, ქალაქი პოზნანი.

საქართველო VS ალბანეთი – 14 ოქტომბერი, 20:00 საათი, ქალაქი თბილისი

აქამდე გამართულ ორ შეხვედრაში ვილი სანიოლის გაწვრთნილი გუნდი შესანიშნავად გამოიყურებოდა და ჯგუფს სათავეშიც უდგას – 2 თამაში, 2 მოგება, 5 გატანილი გოლი, 1 გაშვებული – ჯერ თბილისში ჩეხეთს 4:1 და ტირანაში ალბანეთს 1:0 მოვუგეთ და ერთა ლიგის B დივიზიონის პირველი ჯგუფის ერთპიროვნული ლიდერები ვართ.

რაც შეეხება ჩვენს მომავალ მეტოქეებს, უკრაინის ეროვნული ნაკრებთან 6 ოფიციალურ შეხვედრაში 4 წაგება და 2 ფრე გვიფიქსირდება, თუმცა ბოლოს მათ 2015 წელს ვეთამაშეთ, შესაბამისად, თაობათა ცვლისა და ნაკრების სრულიად განახლების შემდეგ უკრაინასთან ძალები არ გამოგვიცდია. ამიტომ ორმაგად საინტერესო იქნება 11 ოქტომბრის შეხვედრა, თანაც უკრაინამ პირველი ორი მატჩი დათმო და მათთვის სასიცოცხლოდ მნიშვნელოვანია ჩვენთან გამარჯვების მოპოვება.

უკრაინის მსგავსად, ალბანეთის ნაკრებსაც კარგად ვიცნობთ, მით უმეტეს, ერთი თვის წინაც ვეთამაშეთ მათ და თამამად შეიძლება ითქვას, იოლად დავამარცხეთ მინიმალური ანგარიშით – პრაგმატული სცენარით წავიყვანეთ მატჩი, მეტოქეს არათუ რეალური მომენტი, კარში დარტყმაც კი არ ჰქონია, ჩვენ კი მოსაგები თამაში მოვიგეთ.

ფრანგმა სპეციალისტმა, ვილი სანიოლმა შემდეგ რჩეულ 23 ფეხბურთელს უხმო მომავალი ორი სანაკრებო მატჩისთვის:

მეკარე: გიორგი მამარდაშვილი [ვალენსია], გიორგი ლორია [ომონია არადიპუ], ლუკა გუგეშაშვილი [პანსერაიკოსი];

დაცვა: გურამ კაშია [სლოვანი], ლაშა დვალი [აპოელი], ოთარ კაკაბაძე [კრაკოვია], გიორგი გველესიანი [პერსეპოლისი], საბა კვერკველია [დინამო თბილისი], ლუკა ლოჩოშვილი [კრემონეზე], გიორგი გოჩოლეიშვილი [კოპენჰაგენი], ლევან შენგელია [ოფი კრეტა], საბა გოგლიჩიძე [ემპოლი];

ნახევარდაცვა: გიორგი ჩაკვეტაძე [უოტფორდი], ოთარ კიტეიშვილი [შტურმი], გიორგი ქოჩორაშვილი [ლევანტე], სანდრო ალთუნაშვილი [ვოლფსბერგი], გიორგი წიტაიშვილი [გრანადა], შოთა ნონიკაშვილი [ჩერკასი], ზურიკო დავითაშვილი [სენტ-ეტიენი];

თავდასხმა: ხვიჩა კვარაცხელია [ნაპოლი], ბუდუ ზივზივაძე [კარლსრუე], გიორგი მიქაუტაძე [ლიონი], გიორგი გულიაშვილი [სარაევო].

23 ფეხბურთელიდან ერთი დებიუტანტიც გვყავს – გიორგი გულიაშვილი, 23 წლის თავდამსხმელი, რომელიც ბოსნიურ სარაევოში ასპარეზობს და გამორჩეულად კარგი სეზონიც აქვს: 8 ჩატარებულ შეხვედრაში 8 გატანილი გოლით ის ბოსნია-ჰერცოგობინას ჩემპიონატის ბომბარდირია.

ნაკრებს დაუბრუნდა დედაქალაქურ გრანდში გადმობარგებული საბა კვერკველია, რომელიც სექტემბრის შეკრებაზე გუნდში ვერ მოხვდა, ისევე, როგორც ლევან შენგელია. უნდა ითქვას ისიც, რომ სიაში არ არის ირაკლი აზაროვი, რომელსაც ამ სეზონში შედარებით ნაკლები სათამაშო პრაქტიკა ეძლევა საკლუბო დონეზე, რაც ნაკრების მწვრთნელისთვის მნიშვნელოვანი ფაქტორი გამოდგა არჩევანის გაკეთებისას.

გამორჩეულად კარგ ფორმაშია ბუდუ ზივზივაძე, რომელსაც ბუნდესლიგა 2-ში 8 ტურის შემდეგ 8 საგოლე მოქმედება აქვს (6 გოლი, 2 ასისტი) და კარლსრუეს ლიდერად ყალიბდება. უნდა ვახსენოთ ხვიჩა კვარაცხელია და ნაპოლი, რომელიც კონტეს ხელში სერია ა-ს ცხრილის თავშია. ნაპოლი ჩემპიონობისთვის ბრძოლის ერთ-ერთ მთავარ ფავორიტად იქცა და ამ პროცესში კვარას როლი კვლავ ძალიან დიდია. არ უნდა გამოგვრჩეს ზურიკო დავითაშვილიც – ნაკრებში გამომგზავრებამდე ცოტა ხნით ადრე სენტ-ეტიენის ქართველმა ვინგერმა საოცარი შეხვედრა ჩაატარა ოსერის წინააღმდეგ, შეასრულა ულამაზესი გოლებით გაწყობილი ჰეთ-თრიკი და გუნდის ნამდვილ ლიდერად იქცა.

ისღა დაგვრჩენია, დაველოდოთ ამ ორ მნიშვნელოვან შეხვედრას, ვიმედოვნოთ, რომ ჩვენი ფეხბურთელების კარგი ფორმა შესაბამისად გამოვლინდება სანაკრებო დონეზეც და ვუქომაგოთ ეროვნულ ნაკრებს ერთა ლიგაზე, სადებიუტო მუნდიალისკენ რთულ, მაგრამ არა შეუძლებლად გასავლელ გზაზე! საუკეთესო წინ არის!

საგულშემატკივრო ბარათის შეკვეთა

არ გაჩერდე, გააგრძელე კითხვა