4 ქართული მედალი – ევროპის ჩემპიონატი ჯუდოში

საფრანგეთის ქალაქ მონპელიეში ჯუდოში ევროპის ჩემპიონატი ჩატარდა – 3 ნოემბრიდან 5 ნოემბრის ჩათვლით გამართულ ტურნირზე სულ 15 ქართველი ჯუდოკა მონაწილეობდა – საქართველოს კაცთა ნაკრების განაცხადში 9, ხოლო ქალთა ნაკრების განაცხადში 6 სპორტსმენი მოხვდა:

კაცები: გიორგი სარდალაშვილი (60 კგ.);ვაჟა მარგველაშვილი (66 კგ.);ლაშა შავდათუაშვილი და გიორგი ტერაშვილი (ორივე – 73 კგ.);ტატო გრიგალაშვილი (81 კგ.);ლაშა ბექაური და ლუკა მაისურაძე (ორივე – 90 კგ.);ილია სულამანიძე (100 კგ.);გურამ თუშიშვილი (+100 კგ.).

ქალები: ეთერ ლიპარტელიანი და ნინო ლოლაძე (57 კგ.);ეთერ ასკილაშვილი (63 კგ.);ნინო გულბანი და მარიამ ჭანტურია (70 კგ.);სოფიო სომხიშვილი (+78 კგ.).

წლევანდელ ევროპის პირველობაზე რამდენიმე გამორჩეული მომენტი გვქონდა, მათ შორის გამოსარჩევია ტურნირის ბოლო დღე, როცა ერთდროულად 3 ქართველი ჯუდოკა მოხვდა ფინალური ბლოკის ეტაპზე, სამმა ქართველმა იჭიდავა ერთ დღეს ევროპის ჩემპიონატზე ოქროს მედლისთვის. საბოლოოდ ჩვენი ნაკრების ანგარიშზე ოთხი მედალია და ოთხივე ვერცხლის:

🥈 ტატო გრიგალაშვილი (81 კილოგრამი წონითი კატეგორია)

🥈 ლაშა ბექაური (90 კგ.)

🥈 ილია სულამანიძე (100 კგ.)

🥈 გურამ თუშიშვილი (+100 კგ)

ასეც ხდება ხოლმე, დიდ ტურნირებზე ბევრ, ერთი შეხედვით, უმნიშვნელო დეტალსა და ნიუანსს ენიჭება გადამწყვეტი მნიშვნელობა. ნებისმიერ შემთხვევაში, 4 ვერცხლის მედალი ნიშნავს იმას, რომ ერთდროულად 4 წონაში ვიჭიდავეთ ფინალი და სულ რაღაც ერთი საფეხური დაგვაკლდა გამარჯვებამდე.

იყო უიღბლობის მომენტებიც და იყო ბუნდოვანი მსაჯობის ეპიზოდებიც, განსაკუთრებით აღსანიშნავია ტატო გრიგალაშვილის ფინალური შეხვედრა – როდესაც ქართველი ჯუდოკა ოქროს მედლისთვის თურქეთის წარმომადგენელ ვედატ ალბაირაქს დაუპირისპირდა. ბოლო წამებზე თურქი ჯუდოკა ორჯერ ჩავარდა, რაც როგორც წესი, მსაჯების მხრიდან გაფრთხილებას (შიდოს) იმსახურებს ხოლმე, თუმცა მსაჯებმა ეს მომენტები შეუმჩნევლად გაატარეს და საბოლოოდ ტატო ერთი ვაზარით დამარცხდა კიდეც.

გამარჯვებასთან ძალიან ახლოს იყო გურამ თუშიშვილი, რომელიც, ფაქტობრივად, მთელი დროის განმავლობაში ამარცხებდა მეტოქეს, ფინელ მარტი პუუმალაინენს, თუმცა ბოლო წამებზე მეტოქემაც დაიმსახურა ვაზარის ქულა, ანგარიში გაათანაბრა. დამატებით დროშიც მან აიღო პირველი ქულა და გურამმა ლამის გამარჯვებული დაპირისპირება დათმო.

საერთო გუნდურ ჩათვლაში საქართველოს ნაკრები 4 ვერცხლით მე-9 ადგილზე გავიდა (კაცებში მე-7). საფრანგეთში გამართულ ევროპის ჩემპიონატზე კონტინენტის 46 ქვეყნის 391 სპორტსმენმა მიიღო მონაწილეობა, მათ შორის 220 კაცმა და 171 ქალმა.

ავტორი: გიორგი ყორღანაშვილი

არ გაჩერდე, გააგრძელე კითხვა