„შესაძლებლობა ყოველთვის არსებობს“ – ბექა ლემონჯავას ცხოვრება ესპანეთში

საქართველოდან წასვლა

კინოსა და თეატრის მსახიობი ბექა ლემონჯავა, რომელიც უკვე 6 წელია, ესპანეთში ცხოვრობს, საქართველოდან ახალი თავგადასავლების ძიებისა და მეტი წარმატების მიღწევის მიზნით წავიდა. მიუხედავად იმისა, რომ სამშობლოში თავს კომფორტულად გრძნობდა და სტაბილური სამსახური ჰქონდა, კომფორტის ზონიდან მაინც გავიდა და ახალი ცხოვრების დაწყება სცადა.

„სანამ საქართველოდან წამოვიდოდი, თეატრში ვიყავი, სტაბილური სამსახური მქონდა, ასევე, პერიოდულად მქონდა გადაღებები: რეკლამა, კინო, სერიალი, ვერ ვიტყვი, რომ არააქტიური პროფესიული ცხოვრება მქონდა, მაგრამ მაინც რაღაცნაირად ვგრძნობდი დანაკლისს, აი, რომ არ აკეთებ იმას, რისი კეთებაც გინდა, რომ ვერ ივსები ემოციურად ისე, როგორც გინდა, რომ ამ პროფესიით შეივსო… საქართველოში უფრო მარტივად შემეძლო, რომ გზა გამეკვალა, მაგრამ ვიფიქრე, რომ ვცდი“, – ამბობს ბექა.

ცხოვრება საბუთების გარეშე

კიდევ ერთი დიდი მიზეზი კი მისი მეუღლე იყო, რომელიც ესპანეთში ცხოვრობდა. მას 8 თვე არალეგალურად მოუწია ცხოვრება, რის გამოც მუდმივად აწყდებოდა პრობლემებს, განსაკუთრებით დასაქმების კუთხით, თუმცა დროთა განმავლობაში ყველაფერი შეიცვალა.

მართალია, როგორც მსახიობს, „ბევრნაირი პროფესიის ადამიანი“ უთამაშია, რეალურ ცხოვრებაში ბევრი მიმართულებით გამოცდილება არ ჰქონია. ესპანეთში, სანამ საბუთებს გააკეთებდა, უმუშავია ყველგან, სადაც კი შესაძლებლობა მიეცა – საშაურმეში, მშენებლობაზე, ფლაერების დამრიგებლად, ხელოსნის დამხმარედ.

მიუხედავად იმისა, რომ ეს ყველაფერი ემოციურად რთულად გადასატანი იყო, ამბობს, რომ ამ გამოცდილებამ „გაზარდა“.

„ეს ყველაფერი ძალიან დამეხმარა იმაში, რომ არ შემრცხვეს რაღაცის კეთების, მით უმეტეს, თუ ვიცი, რომ ეს რაღაცის კეთება მე მჭირდება… ყველა ადამიანს თავისებურად ადგება ის გამოცდილება, რასაც იღებს. არ არსებობს ფორმულა, „ეს უნდა გაიარო, რომ ეს გააკეთო“, ყველასთვის ინდივიდუალურია“, – გვეუბნება ბექა.

პირველი ნაბიჯები კარიერაში

ამ მრავალი გამოცდილების შემდეგ იწყება პირველი ნაბიჯები მისი პროფესიისკენ. დაიწყო საჭირო ადამიანების ძებნა და რჩევებით დაუკავშირდა ქასთინგმენეჯერს, რომელიც გზის გაკვალვაში უნდა დახმარებოდა. პირველი პროექტი პირველივე თვეში გამოჩნდა, მსახიობი უცბად დასჭირდათ, თუმცა გადაღებები მაროკოში იყო და ვიზის აღება ვერ მოასწარო, ამიტომ უარის თქმა მოუწია.

შემდეგ იყო როლი სერიალში, რომელშიც ცნობილ ესპანელ მსახიობთან ერთად უნდა ეთამაშა, თუმცა ვერც ეს შედგა, რადგან კორონავირუსის პანდემია დაიწყო.

 „უცბად აშენებული ეს ემოციები ჩამოვარდა… 16 სიტყვა მქონდა, 6 გადასაღები დღე, მაგრამ უბედნიერესი ვიყავი მაინც“, – იხსენებს ბექა.

შემდეგ იყო პაუზა და 6 თვეში პირველი როლი.

„6 თვე ვიყავი პროცესში, რომ კაცმა არ იცის, რა იქნება და მერე დადასტურდა, რომ მექნება გადაღებები, ეგ იყო ჩემი პირველი აქაური ნაბიჯი კინოსფეროში. სერიალი იყო, რომელიც ხარისხიანად გააკეთეს. ძალიან დიდი გამოცდილება იყო, დიდ მსახიობებთან ვიმუშავე. არავის ჰქონია ის მომენტი, 1 წამით მაინც გაგრძნობინოს, რომ იმას ბევრი აქვს გაკეთებული და შენ – არაფერი. პირიქით, იყო ძალიან უშუალო დამოკიდებულება. სასწაული გამოცდილება იყო“.

ამ როლს კვლავ პაუზა მოჰყვა, შემდეგ იყო Netflix-ის პროექტი, შემდეგ კი ისევ პაუზა. ბექას პირად ცხოვრებაში ამ დროს მნიშვნელოვანი ამბავი ხდებოდა – მისი მეუღლე ფეხმძიმედ იყო და რადგან შემოსავალი აუცილებლად სჭირდებოდა, იძულებული გახდა, კვლავ სხვა პროფესიით ემუშავა, ელექტრობაში დამხმარედ, თუმცა როლის ძებნის მცდელობა კვლავ არ შეუწყვეტია.

ამის შემდეგ კი მნიშვნელოვანი გარდატეხა მოხდა – ორი ტურის გავლის შემდეგ მიიღო როლი, რომლითაც, როგორც თავად ამბობს, „იმ სამყაროში მოხვდა, რომელზეც ვერც იფიქრებდა“.

„ჩავიკეცე, ცრემლები და ტირილები… მეთქი მეშველა… დავიწყეთ და დავიწყეთ ძალიან კარგად. სხვა სამყაროში მოვხვდი. უცბად რომ სხვა სამყაროში ხვდები და ეს ის სამყაროა, რომელშიც გინდოდა, რომ ყოფილიყავი“, – იხსენებს ბექა.

როლის გამო იძულებული გახდა, ალიკანტეში წასულიყო და მეუღლის მშობიარობა გამოეტოვებინა.

„დილის 5 საათზე მირეკავს ჩემი მეუღლის დედა და მეუბნება – ბექა, დაიბადა, 4 კილო და 200 გრამი. ფოტო რომ ვნახე, წითელი ფერის ხინკალივით იყო“, – ჰყვება ის.

ალიკანტეში მიმდინარე გადაღებები კი მისთვის „ერთ-ერთი ყველაზე კარგი პროფესიული გამოცდილება იყო“.

„ასეთი მასშტაბის გადაღებაზე მე ნამყოფი არ ვიყავი. სასწაული მსახიობები გავიცანი, კარგი მეგობრები შევიძინე ამ სფეროში, რომლებიც დღემდე თუ რამე არის, სულ ცდილობენ, რომ ჩემი თავი შესთავაზონ, როგორც მსახიობი“.

მიზანი

ამბობს, რომ მიზანი, მისივე პროფესიით სტაბილური სამსახურის პოვნაა და თუ ამას შეძლებს, ბედნიერი იქნება.

„ჩემი საქმე ძალიან ძვირფასია ჩემთვის, შვილივით მყავს. მიზანია, რომ შევძლო, სტაბილური შემოსავალი მქონდეს ჩემი პროფესიით, ეს არის იდეალური ვარიანტი, რაც მინდა, რომ პერსპექტივაში გამომივიდეს. ეს თუ გამომივა, ბედნიერი ვიქნები. რთულია ძალიან, ძალიან, იმიტომ, რომ ძალიან დიდი კომპეტენციაა. ძალიან სტრესული საქმეა, ბევრ ისეთ პროექტზე იღებ უარს, რაც გინდა, რომ გააკეთო, მაგრამ გეუბნებიან, რომ შენ არა… შესაძლებლობა ყოველთვის არსებობს, რომ გააკეთო ის, რაც გინდა, თუ ჩადებ ენერგიას და თუ იპოვი სწორ ადამიანებს… მე ვარ ადამიანი, რომელსაც შეუძლია, რაღაცებს იუმორით უყუროს, საკუთარ თავზეც და საკუთარ სიტუაციაზეც შემიძლია ვიცინო. ბევრჯერ იმ საშაურმეშიც მუშაობის დროს ჩემთვის დავმჯდარვარ და მიცინია იმ მომენტში, როცა შეიძლებოდა, რომ სტრესისგან მეტირა. მიცინია იმიტომ, რომ ეგ მშველის“, – ამბობს ბექა.

შვილი

ამბობს, რომ საკუთარი შეცდომები ყველაზე დიდი მასწავლებელია და შვილსაც ამ მიდგომით გაზრდის.

„ბავშვს ქართულს ვასწავლი და ვასწავლი კარგად. მას ვასწავლი იმას, რომ ყოველთვის სცადოს და აუცილებლად შევუქმნი იმის პირობებს, რომ ჰქონდეს მცდელობის, გარისკვის და შეცდომის დაშვების უფლება. მე მგონია, რომ საკუთარი შეცდომები არის ყველაზე დიდი მასწავლებელი. როცა ხვდები, რომ რაღაცა არ გამოგდის, ავტომატურად მოგდის პასუხი, როგორ გამოგივიდოდა და ასე ვითარდები.

ბავშვს არასდროს უნდა უთხრა, რომ ასე ნუ აკეთებ, იმან თვითონ უნდა ისწავლოს. ფანჯრიდან არ უნდა გადახტეს, იქამდე არ უნდა მიუშვა, მაგრამ უნდა ეცადო, რომ თვითონ თავისუფლად შეძლოს იქამდე მისვლა, რომ მიხვდეს, როგორ უნდა აკეთოს. არასდროს შევუზღუდავ პროფესიის არჩევას, არ ვეტყვი, რომ მოდი, ეს ქენი. მოდი გაყვეს, სცადოს, ჩავარდება? არა უშავს, ფეხზე დადგება. პატარა ასაკში ხომ ვეხმარებით წამოდგომაში, მე ვფიქრობ, რომ დიდიც რომ დაუშვებს შეცდომას, იქაც უნდა დავეხმაროთ, თუ კარგი მშობელი ხარ. ვასწავლი, რომ თავისი მიზნისთვის აკეთოს ბევრი. ვასწავლი, რომ შეცდომების დაშვება შესაძლებელია, ვასწავლი, რომ მის გვერდით ვიქნები ნებისმიერ სიტუაციაში, ნდობას შევუქმნი“.

ემიგრანტებს კი ურჩევს, რომ არ შეიზღუდონ თავი და არ იფიქრონ, რომ არ გამოვა – „გამოვა აუცილებლად, თუ ეცდები, თუ ჩადებ ენერგიას, აუცილებლად გამოვა“.

არ გაჩერდე, გააგრძელე კითხვა