რატომ არის ჟირაფი ჟოზე იმის მაგალითი, რომ საუკეთესო წინ არის

საქართველოს ბანკმა JWT Metro-სთან თანამშრომლობით ახალი წინასაახალწლო ვიდეო შექმნა, რომლის მთავარი გმირიც ყველასთვის საყვარელი ანიმაციური პერსონაჟი – ჟირაფი ჟოზეა.

საუკეთესო წინ არის – ასე ჰქვია კამპანიას და ვიდეოს სიუჟეტიც ამ სიტყვების ძალით ვითარდება: ჟირაფი ჟოზე ეძებს საკუთარ თავს, ცდილობს, დამკვიდრდეს მისთვის უცნობ გარემოში, არ ნებდება, იბრძვის და გრძნობს, რომ ყველაფერი წინ არის. რეალურ ცხოვრებაშიც ჟირაფმა ჟოზემ ძალიან გრძელი გზა გაიარა, სანამ პირველი ქართულენოვანი საგანმანათლებლო ანიმაციური სერიალის მთავარი გმირი გახდებოდა და ქართველი ბავშვების ცხოვრებაში ასე აქტიურად შევიდოდა და მნიშვნელოვან ადგილსაც დაიკავებდა.

როგორ შეიქმნა ეს პროექტი, როგორ განვითარდა და რა იგეგმება მომავალში – გვესაუბრება თავად იდეის ავტორი, ანიმაციური სტუდია ველოსიპედის თანადამფუძნებელი – გიორგი მარშანია.

ჟოზეს ამბავი დაიწყო სპონტანურად, ყოველგვარი წინასწარი გეგმის გარეშე. მე ძალიან მიყვარდა ანიმაციები და ყოველთვის მინდოდა, გამეკეთებინა საკუთარი – მქონდა რაღაც იდეები, უფრო მეტად სრულმეტრაჟიანი ანიმაციის გაკეთებას ვფიქრობდი, სცენარიც კი დავწერე. მერე კი შემთხვევით გავიცანი კემო, მხატვარ-კარიკატურისტი და აღმოჩნდა, რომ სრულიად ერთნაირი იდეები გვქონდა. ჩვენი დიალოგი შედგა – მე მქონდა იდეები, მაგრამ არ ვიცოდი ხატვა, კემოს არ ჰქონდა იდეები, თუმცა შესანიშნავად ხატავდა.

ვცადეთ და გავაკეთეთ 1-2-წუთიანი ვიდეოები სატესტოდ, რომ ეს სურვილი მოგვეკლა. მერე დამატებით იდეები გაგვიჩნდა და საბოლოოდ მივედით საბავშვო ანიმაციამდე. სიმღერაზე დახმარება ვთხოვე ჩემს მეგობარს და მაშინ თანამშრომელსაც, მიშა ცინცაძეს; სცენარი – ჩემი, ნახატი – კემოსი და შეიქმნა ჟოზეს პირველი სერია.

იმ დროისთვის მე გასართობ ცენტრში ანიმატორად ვმუშაობდი, ხშირი ურთიერთობაც მქონდა ბავშვებთან. სწორედ მაშინ გავიაზრე, რომ სკოლამდელი ასაკის ქართველი ბავშვების საბაზისო ცოდნა არაქართულენოვანი იყო – როცა ვეკითხებოდი, მაგალითად, ფერებს, მპასუხობდნენ ინგლისურად, ანუ იმ ენაზე, რა ენაზეც უყურებდნენ ისინი მსგავს ვიდეოსერიებს YouTube-ზე.

აქედან წამოვიდა საბავშვო საგანმანათლებლო ანიმაციის შექმნის მოტივაციაც. თუ უყურებენ ინგლისურს ასე აქტიურად, რატომ არ შეიძლება უყურონ ქართულს.

პირველი სერია ავტვირთე ჩემს Youtube არხზე, რეკლამისა და გეგმის გარეშე. რამდენიმე თვის განმავლობაში იდო ეს სერია ასე და სრულიად მოულოდნელად გახდა პოპულარული. უცებ დაიწყო ნახვებმა მომატება ძალიან სწრაფად და ერთი წლის თავზე დააგროვა 6 მილიონი ნახვა, რაც ყველანაირი სტანდარტებით ძალიან მაღალი რიცხვია.

პირველი კარგად გამოვიდა, გავაკეთეთ მეორე, უფრო მალე გახდა პოპულარული, მერე – მესამეც, იმანაც გაამართლა და, აი, მანდ მივხვდი, რომ ეს მხოლოდ იდეად და ჰობად არ უნდა დარჩენილიყო და უნდა მიმეცა უფრო საქმიანი სახე.

ჩემი ბავშვობის მეგობარს, უკვე სტუდია ველოსიპედის თანადამფუძნებელს, ირაკლი ნადირაძეს შევთავაზე ეს იდეა საქმედ. 2017 წელს მე და ირაკლიმ დავაფუძნეთ სტუდია და დავიწყეთ ჟოზეს საქმიანი პერიოდი.

ხალხმა თავდაპირველად არ იცოდა, რომ ჟოზეს შემქმნელი მე ვარ, მეკითხებოდნენ, ტელევიზიაში რატომ აღარ ხარო, მე ვეუბნებოდი, რომ ჟოზეს ვაკეთებ-მეთქი და, უი, ჟოზე ვიცი, აი, ასე. დროდადრო ვგრძნობდით, რომ ადამიანები, განსაკუთრებით, ბავშვები უფრო აქტიურად უყურებდნენ ჟოზეს. როცა ჟოზეს მასკოტი გავაკეთეთ, მაშინ კიდევ უფრო ნათლად დავინახეთ ამ პროცესის სისწორე, თანმიმდევრულობა და მომავალი. ამ ეტაპზე ჩვენს ქართულ YouTube არხზე 70-ზე მეტი სერია და 450 მილიონზე მეტი ნახვა გვაქვს.

რაც შეეხება საერთაშორისო პროექტს, შევედით აშშ-ის ბაზარზე – უკვე აქტიურად იტვირთება ინგლისურენოვანი სერიები. ვიაზრებთ, რომ ხანგრძლივი პროცესია, არ ველოდებით შედეგებს მალევე; ეს იმხელა ბაზარი და კონკურენციაა, აბსოლუტურად სხვა სისტემაა, სხვანაირად მუშაობს იქ ინდუსტრია. ვფიქრობ, 12-18 თვე მაინც დაგვჭირდება შესაფასებლად. 18-თვიანი კომუნიკაციის პროცესმა მოგვიყვანა პირველ უცხოენოვან სერიამდე, შესაბამისად, მნიშვნელოვანია მოთმინება და პროცესის ყურადღებით კონტროლი. პარალელურად იგეგმება ამ პროექტის პრომოუშენი – კოლაბორაციები, ტელევიზიებთან კომუნიკაცია. ჟოზემ ანალოგიური გზა უნდა გაიაროს უცხოურ ბაზარზე, რა გზაც თავის დროზე საქართველოში გაიარა.

ძალიან კომფორტული კომუნიკაცია საქართველოს ბანკთან და JWT Metro-სთან -ურთიერთპატივისცემაზე და გაგებაზე აგებული რამდენიმეკვირიანი ურთიერთობა და შედეგიც შესაბამისია. ზოგადად, ჩვენს ქვეყანაში პროცესი გულისხმობს ბევრ დაბრკოლებას. აუცილებელია, რომ გვქონდეს მომავლის იმედი, ვფიქრობდეთ, რომ საუკეთესო წინ არის. ბევრს ვიშრომებთ და ამ განწყობით მივაღწევთ კიდეც.

ჩემთვის საამაყოა, რომ ეს მნიშვნელოვანი გზავნილი ჟოზეს მაგალითზე ითქვა; ჟოზე არის მოტივატორი; ჟოზეს ისტორიაში ოქროს ასოებით ჩაიწერება საქართველოს ბანკთან თანამშრომლობა.

ძალიან გამიხარდა, რომ საქართველოს ბანკმა ესე დაინახა ჩვენი ბრენდი, როგორც ჩვენ გვაქვს ჩაფიქრებული – შეუპოვარი, მშრომელი და ოპტიმისტი.