პარაჯუდო პარასპორტის სახეობებიდან ქართველებისთვის ერთ-ერთი ყველაზე გამორჩეულია. საქართველოს პარალიმპიადაზე აქამდე მხოლოდ ერთი ოქრო ჰქონდა მოპოვებული და მისი მფლობელი სწორედ პარაჯუდოს წარმომადგენელი იყო.
პარაჯუდო ჯუდოს სახეობაა, რომელიც სპეციალურად ადაპტირებულია მხედველობის დაქვეითებული სპორტსმენებისთვის. პარაჯუდოს შეხვედრები ჯუდოს წესებით მიმდინარეობს, თუმცა არსებობს განსხვავებებიც.
ერთ-ერთი მთავარი განსხვავება ისაა, რომ პარაჯუდოში მებრძოლები დაპირისპირებას სპეციალური დგომით, ჯუდოგიზე ჩაჭიდებულები, იწყებენ. ასევე, იმისათვის, რომ სპორტსმენების უსაფრთხოება მაქსიმალურად დაცული იყოს, მსაჯი მათ ვერბალურ მითითებებს ხშირად აძლევს.
პარაჯუდო პარალიმპიურ თამაშებზე
პარალიმპიურ თამაშებზე პარაჯუდოს დებიუტი 1988 წლის სეულის თამაშებზე შედგა. 2004 წლამდე პარალიმპიადაზე პარაჯუდოში მხოლოდ მამაკაცები მონაწილეობდნენ, 2004 წელს ათენში კი ამ სახეობაში გოგონების წონებიც დაემატა.
პარალიმპიურ თამაშებზე ჯუდო 2 კლასიფიკაციად იყოფა:
J1: უსინათლო ჯუდოკები, რომლებიც ერთმანეთს უპირისპირდებიან
J2: ჯუდოკები, რომლებსაც მხედველობა ნაწილობრივ დაქვეითებული აქვთ
პარალიმპიურ თამაშებზე მედალი სულ 36 ქვეყანას აქვს მოპოვებული. საუკეთესოა იაპონია, რომლის ანგარიშზეც 12 ოქროს, 9 ვერცხლისა და 11 ბრინჯაოს მედალია.
ქართველი პარაჯუდოკები პარალიმპიადაზე
პარალიმპიადაზე, პარაჯუდოს მედლების საერთო რეიტინგში, საქართველო მე-19 ადგილს იკავებს. ქართველებს ამ სახეობაში 1 ოქროსა და 2 ვერცხლის მედალი აქვთ მოპოვებული.
საქართველოს დებიუტი პარალიმპიურ თამაშებზე 2016 წელს რიოში შედგა, სადაც ერთი მონაწილით წარვდექით. ზვიად გოგოჭურის (-90კგ) გამოსვლა ისტორიული გამოდგა – ის პარალიმპიური ჩემპიონი გახდა. დღემდე ქართველებისთვის ეს მიღწევა განუმეორებელია – გოგოჭური ერთადერთი ქართველი პარასპორტსმენია, ვინც პარაჯუდოში პარალიმპიადა მოიგო.
2020 წლის ტოკიოს პარალიმპიურ თამაშებზე საქართველო 5 პარაჯუდოკათი წარდგა და მათგან 2-მა ვერცხლის მედალი მოიპოვა – ინა ქალდანმა (-70 კგ), რევაზ ჩიკოიძემ (+100 კგ).
საერთო ჯამში, ქართველ პარასპორტსმენებს პარალიმპიადაზე 6 მედალი აქვთ მოპოვებული, აქედან 3 კი სწორედ პარაჯუდოს ნაკრების ანგარიშზეა.
ქართველების 2024 წლის პარიზის პარალიმპიადაზე
პარიზის პარალიმპიადაზე საქართველო 5 ჯუდოკათი იასპარეზებს, 5-ვე მათგანი J2 კლასიფიკაციაში იბრძოლებს.
ინა ქალდანი, -70კგ
ინა ქალდანი ქართული პარასპორტის ისტორიაში ერთ-ერთი გამორჩეული სპორტსმენია. ინა ერთადერთი ქართველი ქალი პარაჯუდოკაა, ვისაც პარალიმპიადაზე უასპარეზია. მან ტოკიოში (2020) ვერცხლის მედალი მოიპოვა, წელს კი მედლის მოპოვებას მეორედ შეეცდება.
ინამ 2023 წელს ევროპის პარაჩემპიონატზე მეორე ადგილი დაიკავა, რამდენიმე თვეში კი ტოკიოს გრანპრი ბრინჯაოს მედლით დაასრულა.
აღსანიშნავია, რომ პარიზში მონაწილეობას მისი მეუღლე, პარაჯუდოკა გიორგი ქალდანიც მიიღებს.
ზურაბ ზურაბიანი, -60კგ
ზურაბ ზურაბიანი პარალიმპიურ თამაშებში მეორედ მონაწილეობს. მან პირველი გამოცდილება ტოკიოში (2020) მიიღო, სადაც მერვედფინალში დამარცხდა და ტურნირს გამოეთიშა.
ზურაბმა ჯუდოში ვარჯიში 2012 წელს, 12 წლის ასაკში, დაიწყო, პარაჯუდოში კი 2019 წელს გადაინაცვლა. ის ევროპის ჩემპიონატის, ევროპის პარაჩემპიონატის, ანტალიის გრანპრისა და თბილისის გრანპრის ბრინჯაოსმედალოსანია.
გიორგი ქალდანი, -73კგ
ზურაბის მსგავსად, პარალიმპიადაზე მეორედ მონაწილეობს გიორგი ქალდანიც. გიორგი ტოკიოს პარალიმპიურ თამაშებში მედალთან ძალიან ახლოს იყო – მერვედფინალსა და მეოთხედფინალში გამარჯვებების შემდეგ ის ნახევარფინალში დამარცხდა და საბოლოოდ ბრინჯაოს მედლისთვის იჭიდავა, სადაც ლიეტუველ მეტოქესთან შეხვედრა დათმო.
გიორგი ევროპის პარაჩემპიონატისა და ბაქოს გრანპრის გამარჯვებულია. ასევე, მას ბრინჯაოს მედლები მოპოვებული აქვს ტაშკენტის, ტოკიოსა და თბილისის გრანპრებზე.
გვჯერა, გიორგი წელს დასახულ მიზანს მიაღწევს და პარიზიდან საქართველოში წარმატებული დაბრუნდება.
ლაშა ყიზილაშვილი, -90კგ
34 წლის ლაშა ყიზილაშვილი პარალიმპიადაზე პირველად იასპარეზებს. ის ევროპის პარაჩემპიონატის, მსოფლიო ჩემპიონატისა და ანტალიის გრანპრის ბრინჯაოსმედალოსანია. ასევე, ვერცხლის მედალი აქვს მოპოვებული ტაშკენტის გრანპრიზე.
რევაზ ჩიკოიძე, +90კგ
რევაზ ჩიკოიძე ტოკიოს პარალიმპიადის ვერცხლისმედალოსანია და ის პარიზში ერთ-ერთი ფავორიტის რანგშია ჩასული.
რევაზი ერთ-ერთი ყველაზე ტიტულიანი ქართველი პარაჯუდოკაა. მას მოგებული აქვს მსოფლიო თასი, ევროპის ჩემპიონატი, ევროპის პარაჩემპიონატი და თბილისის, ტოკიოსა და ინდიანას გრანპრები.
იმედი გვაქვს, რევაზი მეორედაც მოახერხებს პარალიმპიური მედლის მოპოვებას და შეძლებს მორიგი ისტორიის დაწერას.
გვჯერა ქართველი პარაჯუდოკების მორიგი წარმატებების, ამჯერად უკვე პარიზის პარალიმპიურ თამაშებზე.
საქართველოს ბანკი საქართველოს ოლიმპიური ნაკრების მთავარი სპონსორია და არა მარტო – ყოველთვის და ყველგან მხარს უჭერს ადამიანებს, რომლებიც არ ჩერდებიან და საკუთარი წარმატებით უკეთეს საქართველოს ქმნიან.