საქართველოსთვის რიგით მე-5 ზაფხულის პარალიმპიური თამაშები ისტორიული გამოდგა.
ქართველმა პარალიმპიელებმა პარიზში 1 ოქროს, 4 ვერცხლისა და 4 ბრინჯაოს მედალი მოიპოვეს. ღონისძიების დაწყებამდე, ალბათ, ცოტა თუ წარმოიდგენდა იმას, რომ საფრანგეთის დედაქალაქში ამდენ მედალს მოვიპოვებდით.
პარიზის პარალიმპიურ თამაშებზე საქართველოსთვის არაერთი ისტორიული ფაქტი დაფიქსირდა:
- საქართველო პარიზის პარალიმპიადაზე 14 სპორტსმენით წარსდგა, რაც ქვეყნის ისტორიაში ყველაზე მაღალი მაჩვენებელია.
- ქართველმა პარალიმპიელებმა პარიზში 9 მედალი მოიპოვეს, რაც ისტორიული შედეგია. აქამდე ჩვენი მაქსიმუმი 3 მედალი იყო – ეს მაჩვენებელი ტოკიო 2020-ზე დავაფიქსირეთ.
- ანა ჯაფარიძე, 19 წლის ასაკში, გახდა ყველაზე ახალგაზრდა ქართველი პარასპორტსმენი, რომელმაც პარალიმპიადაზე მედალი მოიპოვა.
- 1 ოქროს, 4 ვერცხლისა და 4 ბრინჯაოს მედლის მოპოვებით, საქართველომ პარიზის პარალიმპიადის საერთო რეიტინგში 51-ე ადგილი დაიკავა, რაც ქვეყნის ისტორიაში საუკეთესო მაჩვენებელია.
- პარიზში ქართველმა პარალიმპიელებმა მედალი პირველად მოიპოვეს რამდენიმე სახეობაში: პარამძლეოსნობა, პარასროლა, პარატაეკვანდო, პარაწოლჭიმი.
ამ ბლოგში შევაჯამებთ პარიზის პარალიმპიურ თამაშებზე ქართველი პრიზიორების ასპარეზობას და შევეცდებით გაგახსენოთ, რა გზა გაიარეს მათ მედლების მოპოვებამდე.
გიგა ოჩხიკიძე | ოქროს მედალი
პარამძლეოსნობა, ბირთვის კვრა
გიგა ოჩხიკიძე პარიზში მოქმედი მსოფლიო ჩემპიონის რანგში ჩავიდა და ბუნებრივია, ის მთავარ ფავორიტად ითვლებოდა. გიგამ მოლოდინები გაამართლა და პარალიმპიური ჩემპიონობა მსოფლიო რეკორდის დამყარებით მოიპოვა.
თუმცა, ქართველმა გულშემატკივრებმა ბევრი ინერვიულეს. თავდაპირველად, გიგას 6 მცდელობიდან ორი ჩაუთვალეს, ეს ორი კი ჩემპიონობისათვის საკმარისი იყო. როცა მისი ჩემპიონობა ვიზეიმეთ, გაირკვა, რომ მაროკოსა და პოლონეთის დელეგაციამ ოჩხიკიძის ჩათვლილი მცდელობები გაასაჩივრა, საორგანიზაციო კომიტეტმა კი ქართველს ყველა მცდელობა გაუნულა და ოქროს მედალი ჩამოართვა.
საბედნიეროდ, ქართულმა მხარემ საპასუხო მტკიცებულებები მალევე წარმოადგინა და ოჩხიკიძის ერთი წარმატებული სროლა დაუბრუნეს. ეს ის სროლა იყო, რომლითაც მსოფლიო რეკორდი (9.66) დამყარდა.
საბოლოოდ, ყველაფერი ჩვენთვის სასიხარულოდ დასრულდა – გიგა ოჩხიკიძე პარალიმპიური ჩემპიონი გახდა. ის პირველი ქართველი პარამძლეოსანია, ვინც პარალიმპიადაზე მედალი მოიპოვა.
ვლადიმერ ჭინჭარაული | ვერცხლის მედალი
პარასროლა, პნევმატური შაშხანიდან სროლა 50 მეტრზე
ვლადიმერ ჭინჭარაულმა პარიზში სამ სხვადასხვა დისციპლინაში მიიღო მონაწილეობა. მან 30 აგვისტოს 10 მეტრზე სადგამით პნევმატურ შაშხანიდან სროლაში იასპარეზა და უმედლოდ დარჩა. წარუმატებელი გამოდგა მისი გამოსვლა 1 სექტემბერს, 10 მეტზე პნევმატური შაშხანიდან სროლაშიც.
საბოლოოდ, ვლადიმერმა წარმატებას 4 სექტემბერს მიაღწია, როცა 50 მეტრზე სადგამით პნევმატური შაშხანიდან სროლაში ბრწყინვალე შედეგები დააფიქსირა. მან საკვალიფიკაციო ეტაპი დამაჯერებლად გადალახა, ფინალში გამარჯვებასთან კი ძალიან ახლოს იყო. ჭინჭარაულმა ვერცხლის მედალი მოიპოვა და გულშემატკივრები გაახარა.
ზურაბ ზურაბიანი | ვერცხლის მედალი
პარაჯუდო, -60კგ
ზურაბ ზურაბიანმა ასპარეზობა მეოთხედფინალიდან დაიწყო. მან ჩილელი ჰერერა ვაზარით დაამარცხა და ნახევარფინალში გავიდა. ზურაბმა ნახევარფინალში იპონით მოუგო ალჟირელ მეტოქეს, რითაც ფინალის საგზური მოიპოვა და მედალი გაინაღდა.
ზურაბიანი ფინალში ვაზარით მარცხდებოდა. შეხვედრის დასრულებამდე სულ ცოტათი ადრე გდება შეასრულა, რაც იპონით შეფასდა. მალევე, მსაჯებმა ეპიზოდს გადახედეს და ქართველის იპონი გაუქმდა. საბოლოოდ, 24 წლის პარასპორტსმენი პარალიმპიადა ვერცხლის მედლით დაასრულა.
გიორგი ქალდანი | ვერცხლის მედალი
პარაჯუდო, -73კგ
გიორგი ქალდანი პარალიმპიადაზე მეორედ მონაწილეობდა. ის ტოკიო 2020-ში მედალთან ძალიან ახლოს იყო, თუმცა ბრინჯაოს მედლისათვის შეხვედრაში დამარცხდა. წელს მისი მიზანი სამშობლოში მედლით დაბრუნება იყო.
გიორგიმ მეოთხედფინალში რუმინელი ვარგოცკი იპონით დაამარცხა, ნახევარფინალში კი უზბეკ კურანბაევს მოუგო. ოქროს მედლისთვის შეხვედრაში ქალდანი იაპონელ იუჯირო სეტოსთან დამარცხდა და საბოლოოდ, ვერცხლის მედალს დაეუფლა.
გიორგიმ ყველას დაგვანახა, რომ არ უნდა გავჩერდეთ – მან პარალიმპიური მედალი მეორე მცდელობაზე მოიპოვა.
რევაზ ჩიკოიძე | ვერცხლის მედალი
პარაჯუდო, +90კგ
რევაზ ჩიკოიძე ერთ-ერთი ყველაზე გამოცდილი და ტიტულოვანი ქართველი პარასპორტსმენია. მას მოგებული აქვს მსოფლიო ჩემპიონატი, ევროპის ჩემპიონატი და რამდენიმე საერთაშორისო ტურნირი ზჯუდოში. ასევე, ზურაბი ტოკიოს პარალიმპიადის ვერცხლის პრიზიორიცაა. სწორედ ასეთი მიღწევების გამო, ის პარიზშიც ერთ-ერთ ფავორიტად მიიჩნეოდა.
ჩიკოიძემ მეოთხედფინალში ტონი რიკარდო მანტოლასი იპონით დაამარცხა და იგივე გაიმეორა ნახევარფინალში ყაზახ შუკურბეკოვთან. რევაზმა ფინალში თურქ ბოლუკბასისთან დაპირისპირება დაძაბულ ორთაბრძოლაში დათმო და ვერცხლის მედლის მფლობელი გახდა.
რევაზ ჩიკოიძემ ზედიზედ ორ პარალიმპიადაზე მოახერხა ვერცხლის მედლის მოპოვება, რაც ძალიან დიდი წარმატებაა.
ანა ჯაფარიძე | ბრინჯაოს მედალი
პარატაეკვანდო, -52კგ
ანამ პარიზის პარალიმპიადაზე ისტორია დაწერა – ის, 19 წლის ასაკში, გახდა ყველაზე ახალგაზრდა ქართველი, რომელმაც პარალიმპიურ თამაშებზე მედალი მოიპოვა.
ანამ ასპარეზობა მერვედფინალიდან დაიწყო, სადაც აგილა რამოსი 22:2 დაამარცხა. ჯაფარიძემ მეოთხედფინალში ერთ-ერთ მთავარ ფავორიტს, თურქ მერიემ ჩავდარს დაძაბულ ორთაბრძოლაში 7:6 მოუგო და ნახევარფინალში გავიდა. ამ ეტაპზე ქართველმა პარასპორტსმენმა გამარჯვება ვეღარ შეძლო, ირანელ მეტოქესთან დამარცხდა და ბრინჯაოს ფინალში გადაინაცვლა.
ბრინჯაოს მედლისათვის დაპირისპირებაში ანამ ეგვიპტელ სალმა ჰასანს მოუგო, კარიერაში ყველაზე დიდი მიღწევა დააფიქსირა და სამშობლოში ბრინჯაოთი დაბრუნდა.
ნინო თიბილაშვილი | ბრინჯაოს მედალი
ეტლით ფარიკაობა
ნინო თიბილაშვილს ტოკიოს პარალიმპიადაზე ვერცხლის მედალი ჰქონდა მოპოვებული და წელს ის კვლავაც ერთ-ერთ ფავორიტად მიიჩნეოდა.
ნინომ მერვედფინალში კორეელი ჰვონი 15:5 დაამარცხა, მეოთხედფინალში კი ჰონგ კონგელ ჩუი იუს 15:4 მოუგო. ქართველმა ეტლით მოფარიკავემ ნახევარფინალში ჩინელ ჰაიან გუსთან დაპირისპირება 6:15 დათმო და რეპეშაჟში გადაინაცვლა.
თიბილაშვილმა რეპეშაჟის მეოთხე რაუნდში უკრაინელ ნატალია მორკვიჩს აჯობა, ბრინჯაოს ფინალში კი ფრანგ ვიდეს მოუგო და ზედიზედ მეორედ მოახერხა პარალიმპიადაზე მედლის მოპოვება. ამჯერად, მან ანგარიშზე ბრინჯაო მიითვალა.
ინა ქალდანი | ბრინჯაოს მედალი
პარაჯუდო, -70კგ
ინა ქალდანს პარალიმპიადაზე მედლის მოპოვების გამოცდილება უკვე აქვს. ის ტოკიოს პარალიმპიურ თამაშებზე ვერცხლის მედლის მფლობელი გახდა.
წელს, პარიზში, მისგან მედლის მოლოდინი ისევ იყო. ინამ მეოთხედფინალში ბრაზილიელი ვიქტორიო დაამარცხა, ნახევარფინალში კი ჩინელ ვანგთან შეხვედრა დათმო. ინამ ბრინჯაოს ფინალში გადაინაცვლა, სადაც ყაზახ აიალა მერეკს დაძაბულ ორთაბრძოლაში მოუგო და კარიერაში მეორედ პარალიმპიადაზე მედალი მოიპოვა.
ამჟამად ინა ქალდანის ანგარიშზე პარალიმპიური ვერცხლისა და ბრინჯაოს მედლებია, 2028 წელს კი ლოს ანჯელესში შეეცდება საკუთარი ტიტულების გამდიდრებას.
აკაკი ჯინჭარაძე | ბრინჯაოს მედალი
პარაწოლჭიმი, +107კგ
აკაკი ჯინჭარაძე ერთ-ერთი გამორჩეული ქართველი პარასპორტსმენია. მან პარალიმპიადაზე მონაწილეობა მესამედ მიიღო.
აკაკიმ პარალიმპიურ თამაშებში მონაწილეობა პირველად რიოში, 2016 წელს მიიღო, სადაც მე-9 ადგილი დაიკავა. ამის შემდეგ, ტოკიოშიც შეეცადა წარმატების მიღწევას, მაშინ ის მედალთან ძალიან ახლოს იყო, თუმცა შეჯიბრი მე-4 ადგილზე დაასრულა. საბედნიეროდ, მისი მესამე მცდელობა წარმატებული გამოდგა. წელს, პარიზში აკაკიმ პარაწოლწიმში 250 კილოგრამი დააფიქსირა და ბრინჯაოს მედალს დაეუფლა.
საერთო ჯამში, საქართველომ პარიზის პარალიმპიადა 9 მედლით დაასრულა, რაც ჩვენი ქვეყნის ისტორიაში უნიკალური შედეგია. 2024 წელს ჩვენი პარალიმპიელების გამოსვლა გვიტოვებს იმის იმედს, რომ 2028 წელს ლოს ანჯელესში კიდევ უფრო მაღალი მიზნებისათვის ვიბრძოლებთ.
საქართველოს ბანკი საქართველოს ოლიმპიური ნაკრების მთავარი სპონსორია და არა მარტო – ყოველთვის და ყველგან მხარს უჭერს ადამიანებს, რომლებიც არ ჩერდებიან და საკუთარი წარმატებით უკეთეს საქართველოს ქმნიან.