მზადება ევრობასკეტისთვის

საქართველოს საკალათბურთო ნაკრები

საქართველოს საკალათბურთო ეროვნული ნაკრები ზედიზედ მეექვსედ ითამაშებს ევროპის კონტინენტის მთავარ საკალათბურთო ტურნირზე. ტურნირზე ჩვენი დებიუტი 2011 წელს შედგა და სადებიუტო სეზონში ნაჩვენები შედეგი (მე-11 ადგილი) დღემდე საუკეთესოდ რჩება. 2011 წლიდან მოყოლებული ზედიზედ ხუთჯერ ვითამაშეთ ევრობასკეტზე, ბოლოს თანამასპინძლებიც კი ვიყავით.

წლევანდელი ევრობასკეტი  27 აგვისტოს დაიწყება და 14 სექტემბერს დასრულდება – კონტინენტის პირველობას რამდენიმე მასპინძელი ქალაქი ეყოლება: ტამპერე (ფინეთი), ლიმასოლი (კვიპროსი), კატოვიცე (პოლონეთი) და რიგა (ლატვია), შესაბამისად, ამ ოთხ ქალაქში გადანაწილდებიან ჯგუფები, პლეი ოფის ეტაპს კი სრულად ლატვიის დედაქალაქი რიგა უმასპინძლებს.

ალექსანდრ ჯიკიჩის გაწვრთნილმა გუნდმა საკვალიფიკაციო ეტაპი მართალია, მძიმედ დაიწყო, თუმცა როცა თამაშები გადამწყვეტ ფაზაში შევიდა და საბოლოოდ უნდა გარკვეულიყო საგზურის ბედი, ძალები მოვიკრიბეთ და ვითამაშეთ სწორედ ის კალათბურთი და ვაჩვენეთ ის ხასიათი, რის ხარჯზეც აქამდეც ვახერხებდით ხოლმე ევრობასკეტის ფინალურ ეტაპზე გამგზავრებას.

საკვალიფიკაციო ჯგუფში სერბეთთან, ფინეთთან და დანიასთან ერთად ვასპარეზობდით. ისე გამოვიდა, რომ ჯგუფის ფავორიტმა, სერბეთმა ყველა თამაში მოიგო და ადრევე გაინაღდა ევრობასკეტის საგზური. რადგან ფინეთი ერთ-ერთი თანამასპინძელია, საკვალიფიკაციო თამაშები მხოლოდ პირობითი მნიშვნელობის იყო მათთვის. შესაბამისად, დანიის საკალათბურთო ნაკრები აღმოჩნდა ჩვენი უშუალო კონკურენტი, თანაც გასვლით შეხვედრაში დავმარცხდით კიდეც მათთან. ფინეთის დამარცხება ორივე შეხვედრაში ადვილად მოვახერხეთ და ბოლოსწინა ტურში ფინალის ტოლფასი მატჩის ჩატარება მოგვიხდა დანიელებთან.

ამ უმნიშვნელოვანეს შეხვედრაში მიუხედავად დიდი დანაკლისისა (ტრავმის გამო გამოგვაკლდა ნაკრების ლეგიონერი, კამარ ბოლდუინი) მოვახერხეთ და დანია 2-ქულიანი უპირატესობით (62-60) დავამარცხეთ. მართალია, დიდი ნერვიულობის გადატანა მოგვიხდა, თუმცა მთავარი შედეგია და თანაც შესაძლოა, რომ საკვალიფიკაციო ეტაპის ნერვიული ფაზის წარმატებით გადალახვა დადებითად აისახოს ჩვენს ნაკრებზე მომავალში.

საკვალიფიკაციო ეტაპის გადამწყვეტ მატჩებში გამორჩეულად კარგი იყო ჩვენი გუნდის უდავო ლიდერი და კაპიტანი – თორნიკე შენგელია, იქვე უნდა ვახსენოთ ქართული კალათბურთის ლეგენდა – გიორგი შერმადინი. გამოსაყოფია დუდა სანაძის კარგი პერფორმანსი უშუალოდ დანიასთან შეხვედრაში. მართალია, ბოლოს ტრავმის გამო ვეღარ დაგვეხმარა ლეგიონერი შემტევი, კამარ ბოლდუინი, თუმცა მან თავის სადებიუტო მატჩებში თავი კარგად დაგვამახსოვრა და გვაჩვენა, რისი გაკეთება შეუძლია მომავალში. დასაფასებელია თითოეული კალათბურთელის შრომაც- კახა ჯინჭარაძე, ბექა ბურჯანაძე, რატი ანდრონიკაშვილი და სხვები ეფექტურად ეხმარებოდნენ გუნდს მნიშვნელოვან მომენტებში, როგორც დაცვაში, ისე შეტევაში. ჯიკიჩმა დროთა განმავლობაში აშკარად ახლოს გაიცნო ჩვენი კალათბურთი, კალათბურთელები და მათი ხასიათი – პროგრესი თამაშიდან თამაშამდე თვალსაჩინოა.

რაც მთავარია, საკვალიფიკაციო ეტაპისგან განსხვავებით, უშუალოდ ევრობასკეტის ფინალურ ეტაპზე საქართველოს საკალათბურთო ნაკრებს ამერიკული საკალათბურთო ასოციაციის ლეგიონიც დაეხმარება – ორლანდო მეჯიქის ცენტრი, გოგა ბითაძე და სან ანტონიო სპურსის მძიმე ფორვარდი, სანდრო მამუკელაშვილი. გოგასთან და სანდროსთან ერთად ჩვენი ნაკრები კიდევ უფრო ძლიერი და მრავალმხრივი გუნდია – მათი დამატება კიდევ უფრო მეტი როტაციისა და ხშირი ტაქტიკური ცვლილების საშუალებას იძლევა, იზრდება სამწამიანში დომინაციის ალბათობაც, ძლიერდება დაცვა და თითქმის ყველა საჭირო და გადამწყვეტი კომპონენტი უფრო მეტად იხვეწება პერსპექტივაში.

ჯერჯერობით ჩვენი ნაკრების ყველა ლიდერი სტაბილურად თამაშობს საკლუბო დონეზე – იღებენ თავიანთ დროებსა და შანსებს, ახერხებენ თავის გამოჩენას. საკუთარ კლუბებში სტაბილური სათამაშო პრაქტიკის გარეშე, რთული და გამორიცხულია, შეინარჩუნო ფორმა, მით უფრო გასათვალისწინებელია, რომ ევრობასკეტი ზაფხულის ბოლოს დაიწყება.

რაც შეეხება ევრობასკეტის ფორმატს – კონტინენტის 24 საუკეთესო ნაკრები ოთხ ექვსგუნდიან ჯგუფში განაწილდება. ჯგუფებში საუკეთესო ოთხეულში შესული გუნდები გავლენ მერვედფინალებში, მერე კი დაიწყება კლასიკური პლეი ოფი და ოლიმპიური სისტემით გაგრძელდება ბრძოლა პირველობისთვის. საბოლოო კენჭისყრა 27 მარტს, ჩვენი დროით 16:00 საათზე გაიმართა ქალაქ რიგაში, რომლის შედეგადაც საქართველოს ნაკრები C ჯგუფში მოხვდა. საქართველოს ნაკრების გარდა C ჯგუფში არიან: ტურნირის ერთ-ერთი მასპინძელი – კვიპროსი, საბერძნეთი, ბოსნია, იტალია და ესპანეთი.

C ჯგუფის თამაშები ლიმასოლში გაიმართება, თითო ჯგუფიდან კი 1/8 ფინალში 4 ნაკრები გავა, ისღა დაგვრჩენია დაველოდოთ ევრობასკეტის დაწყებას და წარმატებები ვუსურვოთ ჩვენს საკალათბურთო ნაკრებს! საუკეთესო წინ არის!