ლაღი, ხალისიანი და ფერადი თოლია — 4 გოგო, რომელმაც სიმღერა ახლებურად გააცოცხლა

მომღერალი და მოღიმარი ქალები, მზიანი თბილისი, მოძრავი აივანი და ყველასთვის საყვარელი თოლია — სწორედ ასეთია საქართველოს ბანკის მიერ ქალთა დღისადმი მიძღვნილი მუსიკალური რგოლი, რომელიც ყველას ააღიღინებს. მოძრავი აივნისა და გიტარის ფონზე კვარტეტ ორერას ან 4 გიას მიერ შესრულებული თოლიისგან განსხვავებულ ვერსიას ვისმენთ, რაც 4 თანამედროვე მომღერალი გოგოს დამსახურებაა.

კატო კვარაცხელია, ნინა ყიფშიძე, ფანიკო და ანა უზნაძე ის შემსრულებლები არიან, რომლებმაც თავიანთი ინდივიდუალური ხასიათი სიმღერასა და ეკრანზე შემოიტანეს. მოძრავი აივანი კი, რომელიც თბილისის ქუჩებში დადის და ყველასთვის ლაღი განწყობა მოაქვს, თოლიას ახალ ვერსიას კიდევ უფრო ორიგინალურსა და საინტერესოს ხდის.

იმის შესახებ, თუ როგორი იყო მუსიკალურ რგოლზე მუშაობის პროცესი და ზოგადად კამპანიაში მონაწილეობა, თოლიას ახალი ვერსიის შემსრულებლებმა თავიანთი შთაბეჭდილებები გაგვიზიარეს.

“თოლიას ჩემთვის დადებითი ემოციები და მხიარული ტალღა მოაქვს, გამომდინარე მისი შინაარსიდან და რიტმიდან. ამიტომაც ყოველთვის სიამოვნებით ვუსმენ და თავადაც ვასრულებ. მოხიბლული ვარ კამპანიის იდეით და მიხარია, რომ მეც მისი ნაწილი ვარ. რაც შეეხება შემოქმედებით მხარეს და უშუალოდ მუშაობის პროცესს, მცირე დროში ძალიან სასიამოვნო, კოლეგიალური და მეგობრული სივრცე შეიქმნა. საინტერესო იყო ჩემი თაობის მუსიკოსებთან ერთად მუშაობა, რადგანაც ჩვენ ცალ-ცალკე განსხვავებული და ინდივიდუალური შემსრულებლები ვართ, კამპანიისთვის კი გავერთიანდით და ვითანამშრომლეთ, რამაც საბოლოო ჯამში, ვფიქრობ, რომ ძალიან კარგი შედეგი მოგვცა. მსმენელისთვის ⁠ჩემი სურვილი და მესიჯი იქნება ის, რომ იყოთ ლაღები, ენერგიულები, უდარდელები და ხალისიანები ისე, როგორც სიმღერა თოლია”, — ამბობს ანა უზნაძე.

“ძალიან კომფორტული და სასიამოვნო იყო პროექტზე მუშაობა, პირველ რიგში, იმ ხალხის დამსახურებით, ვინც ამ ყველაფერში ჩართული იყო. ჩემთვის საინტერესო მოძრავი აივნის გადაწყვეტაა, რაც ამ ამბავს კიდევ უფრო მეტ ფერს მატებს. არ მგონია, თოლიას ახალი ინტერპრეტაცია რადიკალურად განსხვავებული იყოს ორიგინალისგან იმ მარტივი მიზეზის გამო, რომ რამდენიმე ცდის შემდეგ მივხვდით, უბრალოდ არ სჭირდებოდა. შემდეგ უკვე ჩვენებური ვერსიის გაკეთებაზე და მორგებაზე გადავედით, რაც ასევე საინტერესოა იმიტომ, რომ ოთხივეს განსხვავებული სიმღერის სტილი გვაქვს”, — დასძინა ნინა ყიფშიძემ.

როგორც ვხედავთ, თოლიას ახალი ვერსია სიმღერის მუხტს ინარჩუნებს და ორიგინალისგან რადიკალურად განსხვავებული არ არის, თუმცა თითოეული მომღერლის ინდივიდუალური შტრიხებითაც გამოირჩევა. შემოქმედებითი გუნდის დახმარებით კი, მუსიკალურ რგოლს ორიგინალური ესთეტიკა და ის განწყობა მოაქვს, რომლის გარეშეც გაზაფხული და სიმღერა თოლიაც წარმოუდგენელია.

“ეს ყველაფერი ძალიან საპასუხისმგებლო იყო. ძალიან კარგი პროცესი იყო როგორც კლიპის გადაღება, ასევე სიმღერის ჩაწერაც, იმიტომ, რომ საუკეთესო ადამიანებთან მოგვიწია მუშაობა, ჩემთვის ეს დიდი პატივია და უბედნიერესი ვარ, რომ ასეთ მაგარ პროექტში მომიწვიეს”, — განაცხადა ფანიკომ.

“თოლია ძალიან თავისებური სიმღერაა და თავისი ხასიათი აქვს. ჩემი აზრით, სწორი გადაწყვეტილება იყო, რომ გზიდან ძალიან არ გადავუხვიეთ, სხვა რაღაც არ წარმოვუდგინეთ მაყურებელს და დავტოვეთ ის მთავარი მახასიათებლები, რომლებიც სიმღერას აქვს. ვიმღერეთ გოგოებმა, რომლებიც ინდივიდუალური მუსიკოსები ვართ და შესაბამისად, პატარა ცვლილებები და ჩვენი ინდივიდუალიზმი შევიტანეთ, შედეგი კი მაინც განსხვავებული გამოვიდა. მთავარია, რა განწყობაც ჰქონდა ამ სიმღერას, ის არ შეგვიცვლია. მნიშვნელოვანია ასეთი პროექტები, რადგან ბევრი სხვადასხვა პროფესიის წარმომადგენელი იღებს მონაწილეობას და შესაბამისად, ძალიან საინტერესო ექსპერიმენტები და კოლაბორაციები იბადება. ვფიქრობ, რომ კამპანია მაყურებლისთვის განსაკუთრებულად აფერადებს იმ მომენტს, წამსა თუ წუთს, როცა მსგავს მუსიკალურ რგოლს უყურებს, რადგან მისგან ძალიან კარგი ემოცია და ენერგია მოდის”, — აღნიშნა კატო კვარაცხელიამ.

სწორედ ასე შეიქმნა ლაღი, ხალისიანი და ფერადი თოლიას ახალი ვერსია, რომელიც თავისი ხასიათით ჩვენც გვამხიარულებს და გაზაფხულის მოსვლასაც გვახსენებს.

არ გაჩერდე, გააგრძელე კითხვა