JWT Metro-ს კრეატიულ დირექტორს, ეკა ყიფიანს სარეკლამო ინდუსტრიაში კარგად იცნობენ. ეკას ხელმძღვანელობით იქმნება საქართველოში ბევრი მნიშვნელოვანი კამპანია თუ სარეკლამო რგოლი, მათ შორის საქართველოს ბანკის ის ვიდეორგოლებიც, რომლებზეც მერე მთელი ქვეყანა ლაპარაკობს. სარეკლამო სფეროში მუშაობა თანამედროვე, მუდმივად მოძრავ და ცვალებად პროცესებში აქტიურ ჩართულობას გულისხმობს. ეკას და მისი გუნდის შემუშავებულია საქართველოს ბანკის მთავარი სლოგანიც – ,,არ გაჩერდე”.
“ეს სიტყვები მხოლოდ პიროვნულ განვითარებას არ გულისხმობს და თავისუფლად შეგვიძლია ქვეყანასაც მოვარგოთ. არ უნდა ვფიქრობდეთ, რომ ამ ქვეყანამ უკვე ყველაფერი გააკეთა, რაც შეეძლო. არ უნდა გვეგონოს, რომ საქართველოს წარსული უფრო დიდი და საამაყოა, ვიდრე პოტენციური მომავალი. ზუსტად იმავეს თქმა შეიძლება პირად გამოცდილებებზეც.”
ეკა აღნიშნავს იმასაც, თუ რამდენად მნიშვნელოვანია, რომ საკუთარ თავს რეტროსპექტიულად აღიქვამდე და მუდმივად ხედავდე იმ წინსვლას, განვითარებასა თუ ახალ გამოცდილებებს, რომლებიც წლებთან ერთად დააგროვე.
“როდესაც ჩემს ძველ ნამუშევარს შევხედავ ხოლმე და ყველაფერი ისევ იდეალურად მომწონს, ვხვდები, რომ რაღაც რიგზე ვერ არის. თუ შენს ძველ ნამუშევრებში ნაკლის დანახვა შეგიძლია, ესე იგი ამ დროის განმავლობაში რაღაც ახალი ისწავლე და გადააფასე. შეიძლება ეს ახალი გზა არასწორიც კი იყოს, მაგრამ აუცილებელია, რომ პროცესი არ შეწყვიტო და წინ განაგრძო სვლა.”
ეკასთვის მთავარი მოტივაცია სიახლეების აღმოჩენის სურვილი და ცნობისმოყვარეობაა. მიუხედავად იმისა, რომ მარცხის შიშიც ყოველთვის შორიახლოს დატრიალებს, საბოლოოდ, ეს ცნობისმოყვარეობა და გამოწვევების დაძლევის სურვილი მაინც უფრო დიდი და ძლიერი აღმოჩნდება ხოლმე – არ აძლევს საშუალებას, რომ ფარ-ხმალი დაყაროს და დანებდეს.
,,ახალ იდეაზე ფიქრის პროცესში ყოველთვის ინტერესი ძლევს შიშს. თუმცა, შემდეგ, როდესაც შენი იდეა დამტკიცდება და მისი განხორციელების ჯერი დგება, ნელ-ნელა შიშიც მოდის. საბოლოოდ კი, მაინც ამ ამოცანის ამოხსნის ჟინი და საქმისადმი სიყვარული იმარჯვებს.”
ეკა საუბრობს კითხვების დასმის აუცილებლობაზეც. მნიშვნელოვანია, რომ არასდროს შევწყვიტოთ ეს პროცესი – არ უნდა დაგვაბრკოლოს იმ შიშმა, რომ ჩვენი კითხვა შეიძლება სულელური ან შეუფერებელი აღმოჩნდეს. ეკასთვის სწორი განათლების ფორმაც ისეთი კითხვების დასმაა, რომლის პასუხებიც ახალ, უფრო მნიშვნელოვან და საინტერესო კითხვებს ბადებენ.
,,შენს თავს ახალი კითხვების გაჩენის ადგილი უნდა დაუტოვო. რაც უფრო საინტერესოა კონკრეტული კითხვა თუ ამოცანა, მით უფრო არ გასვენებს მისი ამოხსნის სურვილი და არც დრო გენანება მასზე დასახარჯად.”
ხშირად წარმატებულობისკენ სწრაფვა დიდი წნეხია, რომელსაც ადამიანისთვის ბედნიერების მაგივრად სტრესი მოაქვს. მთავარი წარმატებაც სწორედ ისაა, როდესაც საკუთარ თავთან და ცხოვრებასთან ჰარმონიაში ხარ. პოულობ საკუთარ, კომფორტულ გზას და არ ჩერდები.
,,თავად ცხოვრებისა და ბუნების წესიც ხომ ესაა – მუდმივი, შეუჩერებელი მოძრაობა. ადამიანებმაც ამ სამყაროს ტემპს უნდა ავუწყოთ ფეხი. პირველ რიგში კი მნიშვნელოვანია, რომ ფიქრით ვიყოთ მოძრაობაში, რადგან სწორედ ეს განაპირობებს შემდეგ ჩვენს რეალურ მოქმედებებს.“