საქართველოს საკალათბურთო ნაკრების კაპიტანი, თორნიკე შენგელია სპორტული სტაბილურობითა და მუდმივი განვითარების წყურვილით სამაგალითო ქართველ სპორტსმენად ჩამოყალიბდა – სანიმუშოა მისი საკალათბურთო მიღწევები, რომლებიც ტიტულებსა და სტატისტიკებშიც ჩანს, თუმცა თოკოს ყველაზე დიდი მიღწევა მისი ხასიათია.
32 წლის კალათბურთელის ევროპული კარიერა მართლაც შთამბეჭდავია – ბოლო ამბავი, რაც მისი სპორტულ კარიერის გამორჩეულობას კიდევ ერთხელ ამტკიცებს, მთავარ ევროპულ საკლუბო ტურნირზე ქულათა 3000-ნიშნულიან ზღვარს გადაცილებაა. ამჟამად იტალიური ვირტუს ბოლონიას ერთ-ერთმა ლიდერმა ევროლიგის 32-ე ტურში ათენის პანათინაიკოსთან დააფიქსირა ეს ისტორიული შედეგი – 19 ქულა, 4 მოხსნა, 3 პასი, 1 ჩაჭრა და საერთო კარიერულ ჩათვლაში მოგროვებული 3000 ქულა!
საკლუბო კარიერა
თოკომოტივის კარიერა თინეიჯერობის ასაკიდან იწყება, როცა ის 2009 წელს სულ რაღაც 16 წლის ასაკში ესპანურ ვალენსიაში ჩაირიცხა. იმავე წელს ჰქონდა დებიუტი ესპანეთის უმაღლეს დივიზიონში. მერე იყო ბელგიური შარლერუა და დებიუტი ევროლიგის 2011-12 წლების სეზონში დიდ ევროპულ საკლუბო ტურნირზე. მომდევნო წელი კი იყო ყველაზე დიდი ნახტომი კარიერაში – NBA-ის დრაფტი და 2-წლიანი კონტრაქტი მაშინ ახლად აყვავებულ ბრუკლინ ნეტსში. სამწუხაროდ, თორნიკემ ნაციონალურ საკალათბურთო ასოციაციაში ბევრი თამაშის ჩატარება ვერ შეძლო, ცოტა ცუთი და შანსი ეძლეოდა, ძირითადად, განვითარების ლიგაში (G League) თამაშობდა, აგროვებდა კარგ სტატისტიკას და, რაც ყველაზე მნიშვნელოვანია, გამოცდილებას, რომელიც ძალიან სწორად გამოიყენა მომავალში ევროპაში დაბრუნებულმა.
2014 წელს ახალი ფურცელი გადაიშალა თორნიკე შენგელიას კარიერაში – ესპანური საკლუბო კალათბურთის გრანდი ბასკონია, სადაც მან 6 წელი და კარიერის საუკეთესო პერიოდი გაატარა, იქცა გუნდის ლიდერად და კაპიტნად, მოიგო ესპანეთის ჩემპიონატი 2020 წელს: ბასკონია მაშინ ფინალში ბარსელონას დაუპირისპირდა და ძალიან დაძაბულ ბრძოლაში (69 – 67) დაამარცხა და ისტორიაც დაიწერა. თოკომ, როგორც გუნდის კაპიტანმა, ესპანეთის ჩემპიონატის თასი თავად ჩაიბარა, მერე კი კლუბი თავაწეულმა დატოვა.
სანაკრებო კარიერა
ბასკონიადან თორნიკე ცსკა-ში გადავიდა და კლუბთან წინასწარი შეთანხმება დადო, რომ მიუხედავად კლუბთან კონტრაქტისა და ევროლიგაზე ასპარეზობისა, ის ყველა სანაკრებო ფანჯარაზე უნდა გაეთავისუფლებინათ და ეროვნული გუნდის არცერთი თამაში არ უნდა გამოეტოვებინა. ასეც მოხდა და ნაკრების კაპიტანი ყველა საკვალიფიკაციო მატჩზე ჩამოდიოდა თბილისში, დაჰყვებოდა გასვლით თამაშებზეც და თავის მაქსიმუმს აკეთებდა – რთული გრაფიკისა და კვირაში 3 თამაშის მიუხედავად, ეს ასე იყო და ასე გაგრძელდა იტალიაში გადაბარგების შემდეგაც.
თორნიკე შენგელიამ ნაკრების მაისურით სამი ევრობასკეტი ითამაშა; მისი კაპიტნობით საქართველოს საკალათბურთო ნაკრები ისტორიაში პირველად გავიდა მსოფლიო ჩემპიონატზე და 16 საუკეთესო გუნდშიც კი მოხვდა. მისი დებიუტი 2008 წლის 6 სექტემბერს ლუქსემბურგის ნაკრების წინააღმდეგ შედგა; სტატისტიკურად საუკეთესო მატჩი კი 2016 წელს სლოვაკეთის ნაკრების წინააღმდეგ ჰქონდა, როცა მეტოქის კალათში 31 ქულა ჩააგდო.
თოკოს კარიერაში ბევრი მძიმე ტრავმა და პერიოდი იყო, თუმცა გამართული სპორტული დისციპლინითა და სწორი ხასიათით მან შეძლო და ევროპის მასშტაბით ერთ-ერთ საუკეთესო მძიმე ფორვარდად ჩამოყალიბდა. წინ ახალი გამოწვევები და 2025 წელს გასამართი ევრობასკეტია – თაობათა ცვლის პროცესში თორნიკესა და სხვა გამოცდილ მოთამაშეებს გადამწყვეტი როლის შესრულება მოუწევთ, რომ ახალმა თაობამ მათგან საუკეთესო ისწავლოს და არ შეწყვიტონ განვითარება, არ გაჩერდნენ!