საქართველოში სპორტს ყოველთვის განსაკუთრებული ადგილი ეჭირა. ქართველი სპორტსმენების წარმატებას ენთუზიაზმით გულშემატკივრობენ ის ადამიანებიც კი, რომლებიც, ჩვეულებრივ, სპორტის სიყვარულით არ გამოირჩევიან. ბოლო წლებში მრავალი სასიხარულო და ემოციური მომენტის მომსწრე გავხდით, როდესაც სხვადასხვა ოლიმპიადასა თუ ჩემპიონატზე არაერთ მნიშვნელოვან წარმატებას მივაღწიეთ. სასიხარულო წარმატებებით გამოირჩევა ახალგაზრდა კალათბურთელი, სანდრო მამუკელაშვილიც, რომლის პოპულარობაც საქართველოში და მის ფარგლებს გარეთ, დღითიდღე იზრდება.
NBA-ის რეკორდი
NBA-ის მორიგი მატჩის დროს, სანდრომ, როგორც საკუთარი, ისე სხვა ქართველი კალათბურთელებისა და ზოგადად, NBA-ს რეკორდი მოხსნა და 20 წუთზე ნაკლებ დროში 34 ქულა მოაგროვა, რაც ნაციონალური საკალათბურთო ასოციაციის
ისტორიაში უპრეცედენტოა.
2023 წლიდან სანდრო ამერიკულ საკალათბურთო გუნდში – ,,სან-ანტონიო სპურში” თამაშობს. სწორედ ამ გუნდის სახელით დაამარცხა სანდრომ 19 მარტის საღამოს
,,სან ანტონია სპურსის” მოთამაშემ – – სანდრო მამუკელაშვილმა მოედანზე მხოლოდ 19 წუთი და 27 წამი გაატარა, თუმცა ეს დრო საკმარისი აღმოჩნდა იმისთვის, რომ ქულების რეკორდული რაოდენობა მოეგროვებინა.
აქამდე მისი პირადი რეკორდი 28 ქულა იყო, თუმცა, ყოველთვის იცოდა, რომ მეტი შეეძლო და ამ დღეს დიდხანს ელოდა. მიუხედავად იმისა, რომ არასდროს დანებებულა, ყოველდღიურად ვარჯიშობდა და თავდაუზოგავად შრომობდა, რეკორდის დამყარების შემდეგ, მაინც ისე გრძნობდა თავს, როგორც სიზმარში. სანდროსთვის ეს საღამო განსაკუთრებით მნიშვნელოვანი იყო იმ მიზეზითაც, რომ თამაშს მამა და ძმა ესწრებოდნენ და სანდროს განსაკუთრებულ ძალას აძლევდნენ.
მოტივაცია ახალი თაობისთვის
სანდრო მამუკელაშვილი ბოლო პერიოდში დიდი პოპულარობით სარგებლობს, მის შესახებ ბევრი იწერება ამერიკულ პრესაშიც. New York Post-თან მიცემულ ინტერვიუში სანდრო ბევრ მნიშვნელოვან თემას შეეხო, მათ შორის ქართული კალათბურთის მომავალსაც.
როგორც სანდრო აღნიშნავს, მისთვის განსაკუთრებით მნიშნელოვანია ის ფაქტი, რომ შესაძლოა სხვებისთვის იმის მაგალითად იქცეს, რომ ცხოვრებაში არაფერია შეუძლებელი – ზუსტად ისე, როგორც სხვა ქართველი კალათბურთელების წარმატება იყო ბავშვობაში მისი მთავარი მოტივაცია. სანდრო იმედს იტოვებს, რომ ახალგაზრდა თაობა, მომავალი ნიჭიერი კალათბურთელები, დაინახავს და რაც მთავარია, დაიჯერებს, რომ დიდი მიზნების მიღწევას, მონდომების შემთხვევაში, წინ არაფერი უდგას.
წარმატების გზაზე არ გაჩერდე
საკმაოდ მარტივი, თუმცა ხშირ შემთხვევაში გადამწყვეტია ის მთავარი პრინციპი, რომლის ერთგულებასაც საბოლოოდ წარმატებისკენ მიჰყავხარ. საიდუმლო არ მდგომარეობს რიამე რთულ ფორმულაში, არამედ მუდმივ მცდელობაში, გააგრძელო სვლა მაშინაც კი, როცა მიზნამდე ჯერ ისევ შორია. სწორედ ამ სიმტკიცისა და მუდმივი ბრძოლის მნიშვნელობას უსვამს ხაზს სანდროც NBA-ის რეკორდის შემდეგ პრესასთან მიცემულ ინტერვიუში.
,,NBA-ში ერთი წუთის გაფლანგვის უფლებაც კი არ გაქვს. საუკეთესო კალათბურთელებთან ერთად გიწევს თამაში და წინასწარ არასდროს გაქვს რაიმეს გარანტია, ვერავინ ვერაფერს დაგპირდება. ეს არის თავდაუზოგავი შრომა, რომელსაც ყოველდღიურად გადიხარ – ფიზიკურს თუ მენტალურს. ხანდახან თამაშში ბოლომდე ჩართული ხარ, ზოგჯერ ნაკლებად. მთავარია ხელები არასდროს ჩამოუშვა, რადგან როგორც კი ამას იზამ, მაშინვე უკან იწყებ სვლას.”
სანდროსა და მისი გუნდის მომდევნო მატჩი 22 მარტს არის დაგეგმილი, რომელსაც მთელი საქართველო დიდი მოლოდინით ელის. გულშემატკივრებმა უკვე იციან, რომ ეს მხოლოდ დასაწყისია და სანდროს, ისევე როგორც სხვა ქართველ კალათბურთელებს, წინ კიდევ ბევრი, მნიშვნელოვანი გამარჯვება ელით.
