ერთ დღესაც მსახიობმა გიორგი მარშანიამ გადაწყვიტა, თავისი ჰობი საქმედ ექცია და ასე დაიბადა ქართველი ბავშვებისთვის საყვარელი გმირი — ჟირაფი ჟოზე. ჟოზეს ოფიციალურ YouTube არხს დღეს უკვე 400 ათასზე მეტი გამომწერი ჰყავს, მისი ვიდეოების ნახვების ჯამური რაოდენობა კი 485 მილიონს აჭარბებს. სახალისო ანიმაციურ სერიალს საგანმანათლებლო დატვირთვაც აქვს: მისი მეშვეობით სკოლამდელი და დაწყებითი კლასების ასაკის ბავშვები მათთვის საჭირო ცოდნასაც იღებენ.
ეს ყველაფერი კი სწორედ იმის გააზრებით დაიწყო, რომ ქართულ ენაზე მსგავსი საგანმანათლებლო-გასართობი პროექტი არ არსებობდა. ჟოზეს შემქმნელი და ანიმაციური სტუდია ველოსიპედის თანადამფუძნებელი გიორგი მარშანია ამბობს, მაშინ, როცა ანიმაციის გაკეთების იდეა გამიჩნდა, გასართობ ცენტრში ვმუშაობდი და შევნიშნე, რომ ბავშვები შეკითხვებზე უმეტესად ინგლისურად მპასუხობდნენო — იმ ენაზე, რომელზეც ვიდეოებს უყურებდნენ.
გიორგის თქმით, ანიმაციის იდეები ყოველთვის ჰქონდა და როცა მხატვარ-კარიკატურისტი ნიკოლოზ „კემო“ კემულარია გაიცნო, უკვე მასთან ერთად დაიწყო ხანმოკლე ვიდეოებზე მუშაობა. გიორგის და კემოს ტანდემს მალე მუსიკოსი მიშა ცინცაძეც შეემატა და ჟოზეს პირველი სერიაც გაჩნდა.
სპონტანურად შექმნილმა სერიამ, რომელსაც არც რეკლამა მოჰყოლია და არც რაიმე განსაკუთრებული წარდგენა, ასევე უცბად მოიპოვა პოპულარობა და გამოსვლიდან ერთი წლის თავზე უკვე 6 მილიონზე მეტი ნახვა მოაგროვა. ერთ სერიას მეორე მოჰყვა, მეორეს — მესამე და საქმეც ანიმაციური სტუდიის შექმნით გაგრძელდა.
„დროდადრო ვგრძნობდით, რომ ადამიანები, განსაკუთრებით, ბავშვები უფრო აქტიურად უყურებდნენ ჟოზეს“, — აღნიშნავს გიორგი, — „როცა ჟოზეს მასკოტი გავაკეთეთ, მაშინ კიდევ უფრო ნათლად დავინახეთ ამ პროცესის სისწორე, თანმიმდევრულობა და მომავალი“.
პროცესის სისწორე ჟოზეს მიდგომაშიცაა: რადგან კეთილი, გონიერი და მეგობრული ჟირაფი ბავშვებისთვის სამაგალითო პერსონაჟად იქცა, ის ცდილობს, არასახარბიელო ამბავსაც დადებითი სიტყვებით მოჰყვეს; მაგალითად, „ცუდის“ ნაცვლად თქვას, რომ „ეს კარგი არ არის“.
სწორედ ამის გამო, ჟირაფი ჟოზე გასულ წელს საქართველოს ბანკის ახალი კამპანიის, „საუკეთესო წინ არის“, სახეც გახდა. JWT Metro-სთან თანამშრომლობით გადაღებულ ვიდეორგოლში ვხედავთ, როგორ ეძებს გმირი სამყაროში თავის დამკვიდრების გზას და საბოლოოდ მიზანსაც აღწევს. ამ ვიდეომ, ერთი მხრივ, კამპანიის სათქმელი გამოხატა, მეორე მხრივ კი, თავად ჟირაფი ჟოზეს ისტორია გააცოცხლა: როგორ იქცა ერთი პატარა იდეა დიდ პროექტად, რომელმაც არა მხოლოდ ანიმაციური სერიალი, წიგნები და სპექტაკლიც კი მოიცვა. 2020 წელს ჟოზე პირველი არხის პროექტ ტელესკოლაში ხატვის მასწავლებლადაც მოგვევლინა. ეს ყველაფერი მართლაც გვარწმუნებს, რომ საუკეთესო წინ არის.
„ჩემთვის საამაყოა, რომ ეს მნიშვნელოვანი გზავნილი ჟოზეს მაგალითზე ითქვა; ჟოზე არის მოტივატორი“, — აღნიშნავს გიორგი.
ჟოზე რომ მოტივატორია, ეს გასულ წელს კიდევ ერთი ამბით დადასტურდა — ჩვენი საყვარელი ჟირაფი აშშ-ში გაემგზავრა და ასე გავიდა პროექტი საერთაშორისო ასპარეზზე. მისი რამდენიმე ეპიზოდი უკვე ითარგმნა ინგლისურად, ჟოზე კი ამერიკელმა ბავშვებმაც გაიცნეს. თუმცა, როგორც გიორგი აღნიშნავს, ამერიკულ ბაზარზე დასამკვიდრებლად გმირმა იგივე გზა უნდა გაიაროს, რაც თავის სამშობლოში გაიარა.
აი, ეს კი ჟირაფ ჟოზეს ნამდვილად არ გაუჭირდება: სხვა ყველაფერთან ერთად ხომ მან და მისმა შექმნელმა ისიც გვასწავლეს, რომ შრომით, მონდომებით და მომავლის იმედით საწადელს ყოველთვის მიაღწევ. მთავარია მხოლოდ ერთი რამ — არ გაჩერდე.