საქართველოს ბანკის მხარდაჭერით გრძელდება მასშტაბური სპორტული ღონისძიება – სასკოლო ლიგა, რომელიც სხვადასხვა სპორტულ შეჯიბრებაში მონაწილე უამრავ სკოლის მოსწავლეს აერთიანებს. საქართველოს ბანკი ქართულ საგანმანათლებლო სივრცეში ბევრ განსხვავებულ მოტივაციასა და სტიმულს აჩენს როგორც სასკოლო, ისე საუნივერსიტეტო ასპარეზზე (სტიპენდიები, იდეათეკები და ა.შ.), სასკოლო ლიგა კი სპორტულ მოტივაციასა და სტიმულზე ორიენტირებული პროექტია.
სკოლის ასაკი, ანუ მოზარდობის პერიოდი საუკეთესო დროა, ახალგაზრდა ადამიანებმა ადრევე აღმოაჩინონ საკუთარი შესაძლებლობები, აღმოაჩინონ საასპარეზო ველი, შესაბამისად, აღმოაჩინონ საკუთარი თავი და გარკვეულწილად განსაზღვრონ მომავალი საქმიანობა თუ ინტერესის სფერო. სასკოლო ლიგა თავისი მასშტაბურობითა და მაღალორგანიზებულობით აერთიანებს 12 000-ზე მეტ ქართველ სკოლის მოსწავლეს, ანუ ათასობით ახალგაზრდა ადამიანისთვის აჩენს სწორედ ზემოხსენებულ შესაძლებლობას. თბილისი, ქვემო ქართლი, იმერეთი, კახეთი, აჭარა და პერსპექტივაში კიდევ უფრო მზარდი გეოგრაფია, ფაქტობრივად, მთელს ქვეყანას ფარავს და ეძებს ტურნირში ჩართვის მსურველ მოსწავლეებს.
სასკოლო ლიგის კოორდინატორის, ოთარ აბულაძის (რომელიც ამ პროექტის საორგანიზაციო გუნდში დაარსების დღიდანაა ჩართული) თქმით, საქართველოს ბანკის მხარდაჭერის შემდეგ გაიზარდა პროექტის პოპულარობა, გაფართოვდა საზღვრები და ლიგები მოსწავლეებისთვის უფრო მიმზიდველიც გახდა. წლევანდელი სასკოლო ლიგა გამორჩეულია სპორტის სახეობების მრავალფეროვნების მხრითაც – დაემატა საკალათბურთო ლიგის ორი სახეობა (5X5 და 3X3), ხოლო ყველა სხვა სპორტის ტურნირი (ფეხბურთი, რაგბი, ფარიკაობა, ჭადრაკი, მაგიდის ჩოგბურთი და ა.შ.) შენარჩუნა და კიდევ უფრო დაიხვეწა ფორმატი.
2024 წელი ისტორიული შეიძლება გამოდგეს ქართული ფეხბურთისთვის – 21 მარტს ისტორიაში ერთ-ერთ ყველაზე მნიშვნელოვან მატჩს გამართავს საქართველოს ეროვნული ნაკრები დინამო არენაზე ლუქსემბურგის ეროვნული ნაკრების წინააღმდეგ ერთა ლიგის ნახევარფინალში; გვაქვს იმედი და ფიზიკური თუ მორალური მზაობა, ვითამაშოთ ერთა ლიგის ფინალიც და გავიდეთ ნანატრ ევროპის ჩემპიონატზე. სპორტულ სივრცეში, მით უფრო საფეხბურთო სამყაროში, უდიდესი მნიშვნელობა აქვს კონტექსტს, კონკრეტულ დროს, სივრცესა და ისტორიას. სასკოლო ლიგის საფეხბურთო ტურნირში მონაწილე ახალგაზრდა ადამიანები სწორედ ის თაობა შეიძლება აღმოჩნდეს, რომლებიც მომავალში რეგულარულად მიიღებენ დიდ საერთაშორისო ტურნირებზე მონაწილეობას.
უნდა ვირწმუნოთ, რომ 2024 სწორედ ის ათვლის წელია, რომლის შემდეგაც ქართული ფეხბურთი ნებისმიერ დონეზე (სკოლაში, უნივერსიტეტში, ეროვნულ ლიგაზე, ევროპის ტოპ ჩემპიონატებში) იქნება უფრო უკეთესი, ვიდრე იყო აქამდე.
ამ რწმენას კი სჭირდება შრომა, შრომის ერთგულება და ეთიკა, რომელიც მიიღწევა ყველაზე უფრო მარტივი მოცემულობით – ისევ და ისევ რწმენით, რომ ამ შრომას აქვს აზრი და აქვს ბედნიერი დასასრული – როგორც საქართველოს ბანკის ახალ ვიდეორგოლში სკოლის მოსწავლე გვიზიარებს თავის პატარა და თან დიდ გამოცდილებას:
„თავიდან შეიძლება რაღაცები არ გამოგივიდეს, მაგრამ თამაშს თუ გააგრძელებ, შენსას მაინც გაიტან.”
სასკოლო ლიგაში მონაწილეობა ნებისმიერი სკოლის ნებისმიერ მოსწავლეს შეუძლია. მთავარია მხოლოდ და მხოლოდ სურვილი, რომ არ გაჩერდე და გაიტანო შენი.