ხვიჩა კვარაცხელიას ამბავი ნამდვილ ზღაპარს ჰგავს და ქმნის საუკეთესო მაგალითს – როგორ არ უნდა გაჩერდე, როგორ არ უნდა აყვე სპორტულ თუ არასპორტულ ხელისშემშლელ გარემოებებს და იარო წინ. წინ ბევრი გამოწვევაა როგორც საკლუბო, ისე სანაკრებო თუ ადამიანურ ასპარეზზე.
ხვიჩა კვარაცხელიას საფეხბურთო კარიერა თბილისის „დინამოს“ აკადემიაში დაიწყო, მერე იყო მცირე გამოცდილება შიდა ჩემპიონატშიც და 2022 წლის ზაფხული – ტრანსფერი იტალიური ფეხბურთის გრანდში, „ნაპოლიში“ – იტალიის ჩემპიონობა, სერია ა-ს საუკეთესო ფეხბურთელისა და ჩემპიონთა ლიგის საუკეთესო ახალგაზრდა ფეხბურთელის ჯილდო, და ეს ყველაფერი სულ რაღაც 24 წლის ასაკში, არადა ნებისმიერი ფეხბურთელი მოაწერდა ასეთ გამოცდილებას, ტიტულებსა და სტატისტიკას მთლიანი კარიერისთვის.
2025 წლის ზამთრის სატრანსფერო ფანჯარა კიდევ ერთი ახალი ეტაპის დასაწყისი აღმოჩნდა ხვიჩასთვის – უკეთესი ფინანსური პირობები, დიდი ქალაქი და დიდი ამბიცია – საფრანგეთის დედაქალაქის მთავარ გუნდში, „პარის სენ ჟერმენში“ ეს ყველაფერი ერთად იყრის თავს. ხვიჩამ ნეაპოლში უკვე მოასწრო ისეთ დიდ სპეციალისტებთან მუშაობა, როგორებიც არიან ლუჩანო სპალეტი და ანტონიო კონტე, პსჟ-ში კი დახვდა თანამედროვე ფეხბურთის გამორჩეული მცოდნე, ესპანელი ლუის ენრიკე, რომელიც ალბათ ყველაზე მეტად შეეფერება კვარაცხელიას ფეხბურთს – ინტენსივობა, სისწრაფე, ტექნიკა, ფლანგების თავისუფლება, ყველა წინ და ყველა უკან.
ხვიჩა კვარაცხელია თავისუფალი ფეხბურთელია – პოზიციურად მარცხენა ვინგერი კომფორტულად გრძნობს თავს ცრუ ცხრიანისა თუ ათიანის პოზიციაზეც, არც უკან დახევასა და დაცვის დახმარებას თაკილობს, ნამდვილი ლიდერია ყველა იმ თვისებით, რაც გუნდის მთავარ ფეხბურთელს უნდა ჰქონდეს, ლუის ენრიკე კი ის კაცია, საუკეთესოდ რომ დაინახავს ხვიჩაში ყველა ამ პოტენციალს და გახსნის ბოლომდე. ნახევარ სეზონში ამ პროცესის კონტურები უკვე გამოჩნდა და, რაც მთავარია, გამოჩნდა ის, რომ კვარაცხელიასთვის ცა არის ლიმიტი და არ არსებობს მონაკვეთი, რომელზეც ის დიდხანს შეჩერდება და არ გააგრძელებს ზრდასა და განვითარებას.
ლუის ენრიკეს ძალიან ახალგაზრდული პროექტი, რომლის უმნიშვნელოვანეს ნაწილადაც იქცა ქართველი ვარსკვლავი, ყველა მოლოდინს აჭარბებს: „პარის სენ ჟერმენი“ ყველაზე ახალგაზრდა კლუბია (საშუალო ასაკი 25 წელს არ აღემატება), რომელიც ჩემპიონთა ლიგის ფინალში გავიდა.
ხვიჩას პსჟ-ში თავის პოზიციაზე რამდენიმე უნიჭიერესი ფეხბურთელი დახვდა – გაზრდილმა ჯანსაღმა კონკურენციამ, ბრწყინვალე ატმოსფერომ და ლუის ენრიკეს ტაქტიკურმა ჩანაფიქრებმა, თამამად შეიძლება ითქვას, რომ დედაქალაქური კლუბის ისტორიაში საუკეთესო ვერსია შექმნა.
ხვიჩას არაერთ ინტერვიუში უთქვამს, რომ მისი ბავშვობის ოცნებაა მსოფლიოს საუკეთესო საკლუბო ტურნირის ფინალში თამაში – მას შემდეგ, რაც მან არასრულ სამ სეზონში იტალიისა და საფრანგეთის ჩემპიონატები მოიგო (იმის შანსიც არსებობს, რომ „ნაპოლიმ“ წელსაც მოახერხოს სერია ა-ს მოგება და მათთან ერთად ხვიჩაც მეორედ გახდეს იტალიის ჩემპიონი), 24 წლის ასაკში კვარაცხელია ბავშვობის ოცნებას აიხდენს და მიუნხენში კიდევ ერთ იტალიურ გრანდს, მილანის „ინტერს“ დაუპირისპირდება.
ხვიჩა კვარაცხელია პირველი ქართველი ფეხბურთელია, რომელმაც ჩემპიონთა ლიგის ნახევარფინალში საგოლე მოქმედებაში მიიღო მონაწილეობა, თუმცა სტატისტიკებისა და კვლევების მიღმა, თბილისურ ქუჩაში გასეირნებაც კი კმარა, დაინახო, რამდენ ბავშვს აცვია ხვიჩა კვარაცხელიას მაისური, მიხვდე, რა გავლენა აქვს სპორტულ მიღწევებს თაობებზე – გზა განვითარებისკენ, ევროპული ფეხბურთისკენ გახსნილია, ხვიჩა კი გაჩერებას არ აპირებს, შესაბამისად, არ ჩერდება მაგალითის ძალაც.