ხვიჩა კვარაცხელიას საფეხბურთო კარიერა თბილისის „დინამოს“ აკადემიაში დაიწყო, მერე იყო მცირე გამოცდილება შიდა ჩემპიონატშიც, 2022 წლის ზაფხული – დაბრუნება ეროვნულ ჩემპიონატში და ტრანსფერი იტალიური ფეხბურთის გრანდში, „ნაპოლიში“ – იტალიის ჩემპიონობა, სერია ა-ს საუკეთესო ფეხბურთელისა და ჩემპიონთა ლიგის საუკეთესო ახალგაზრდა ფეხბურთელის ჯილდო, და ეს ყველაფერი სულ რაღაც 24 წლის ასაკში, არადა ნებისმიერი ფეხბურთელი მოაწერდა ასეთ გამოცდილებას, ტიტულებსა და სტატისტიკას მთლიანი კარიერისთვის.
2025 წლის ზამთრის სატრანსფერო ფანჯარა კიდევ ერთი ახალი ეტაპის დასაწყისი აღმოჩნდა ხვიჩასთვის – უკეთესი ფინანსური პირობები, დიდი ქალაქი და დიდი ამბიცია – საფრანგეთის დედაქალაქის მთავარ გუნდში, „პარის სენ ჟერმენში“ ეს ყველაფერი ერთად იყრის თავს. ხვიჩამ ნეაპოლში უკვე მოასწრო ისეთ დიდ სპეციალისტებთან მუშაობა, როგორებიც არიან ლუჩანო სპალეტი და ანტონიო კონტე, პსჟ-ში კი დახვდა თანამედროვე ფეხბურთის გამორჩეული მცოდნე, ესპანელი ლუის ენრიკე, რომელიც ალბათ ყველაზე მეტად შეეფერება კვარაცხელიას ფეხბურთს – ინტენსივობა, სისწრაფე, ტექნიკა, ფლანგების თავისუფლება, ყველა წინ და ყველა უკან.
ხვიჩა კვარაცხელია თავისუფალი ფეხბურთელია – პოზიციურად მარცხენა ვინგერი კომფორტულად გრძნობს თავს ცრუ ცხრიანისა თუ ათიანის პოზიციაზეც, არც უკან დახევასა და დაცვის დახმარებას თაკილობს, ნამდვილი ლიდერია ყველა იმ თვისებით, რაც გუნდის მთავარ ფეხბურთელს უნდა ჰქონდეს, ლუის ენრიკე კი ის კაცია, საუკეთესოდ რომ დაინახავს ხვიჩაში ყველა ამ პოტენციალს და გახსნის ბოლომდე. ნახევარ სეზონში ამ პროცესის კონტურები უკვე გამოჩნდა და, რაც მთავარია, გამოჩნდა ის, რომ ხვიჩასთვის ცა არის ლიმიტი და არ არსებობს მონაკვეთი, რომელზეც ის დიდხანს შეჩერდება და არ გააგრძელებს ზრდასა და განვითარებას.
ხვიჩა განსაკუთრებით სანაკრებო შეკრებებზე ვითარდება, დიდი ნახტომი იყო ევროპი ჩემპიონატზე ჯერ გასვლა, მერე კი თამაში – ბრწყინვალე პერფორმანსები და გოლი პორტუგალიის კარში, რომელმაც გაგვიყვანა კიდეც ურთულესი ჯგუფიდან დებიუტანტი ნაკრები კონტინენტის პირველობის მერვედფინალში. წარმოუდგენელია, საიდან ჩნდება ასეთი ნიჭი და მენტალიტეტი ერთდროულად ადამიანში, რომელმაც პირადად დაამარცხა მისი ბავშვობის კუმირი, მსოფლიო ფეხბურთის ლეგენდა, კრიშტიანო რონალდო და მატჩის შემდეგ მასთან მოსაკითხად მივიდა – ესაა კადრი, რომელზე უკეთაც არაფერი აღწერს ხვიჩა კვარაცხელიას სპორტულ ჟინს. კრიშტიანომ გახსნა თავის დროზე აკადემია, რომელშიც ხვიჩამ აიდგა ფეხი, პორტუგალიელის დამსახურება და სწორი სპორტული მაგალითის გაცემაც ბევრს ნიშნავს ხვიჩასთვის და არამარტო – მთელი მსოფლიოს მასშტაბით ახალგაზრდა ფეხბურთელებისთვის.
დღეს კვარაცხელია თავად ქმნის ჯანსაღ მაგალითს – როგორ არ უნდა გაჩერდე, როგორ არ უნდა აყვე სპორტულ თუ არასპორტულ ხელისშემშლელ გარემოებებს და იარო წინ. წინ ბევრი გამოწვევაა როგორც საკლუბო, ისე სანაკრებო თუ ადამიანურ ასპარეზზე. ხვიჩამ ლუის ენრიკეს თაოსნობითა და პსჟ-ს მაისურით უკვე მოასწრო ტიტულის მოგება და აგრძელებს ბრძოლას სხვა ტიტულებისთვის – პარიზული გრანდი ჩემპიონთა ლიგის მეოთხედფინალშია და იბრძვის ჩემპიონობისთვის. პსჟ ამბიციური პროექტია, რომელმაც ბოლო ორ წელში გაახალგაზრდავება და სტილის განახლება დაიწყო – ახალი ტაქტიკები, მიდგომა და მეთოდოლოგიები კარგ სივრცეს ქმნის ქართველისთვის, ყველას აჩვენოს ის, რაც ახლა შეუძლია და წარმოადგენინოს ისიც, რაც მომავალში შეეძლება.
სტატისტიკებისა და კვლევების მიღმა, თბილისურ ქუჩაში გასეირნებაც კი კმარა, დაინახო, რამდენ ბავშვს აცვია ხვიჩა კვარაცხელიას მაისური, მიხვდე, რა გავლენა აქვს სპორტულ მიღწევებს თაობებზე – გზა განვითარებისკენ, ევროპული ფეხბურთისკენ გახსნილია, ხვიჩა კი გაჩერებას არ აპირებს, შესაბამისად, არ ჩერდება მაგალითის ძალაც.