და აი, მობილბანკის მასშტაბური თამაშის პირველი, საკვალიფიკაციო ეტაპიც დასრულდა. სამთვიანმა შეჯიბრმა უკვე გამოავლინა ფინალისტები, რომლებიც სულ მალე, იანვრის მეორე ნახევარში, თამაშის გრანდიოზულ, დასკვნით რაუნდში იასპარეზებენ და შეეცდებიან სოლიდური პრიზების მოგებას.
თუ შენც ფინალისტებს შორის ხარ, გილოცავთ: პირველ რიგში, ამ დაძაბულ ბრძოლაში მიღწეულ წარმატებას, მეორე რიგში კი — ახალ წელს. დასკვნით რაუნდამდე მორალურად შესამზადებლად ჯერ კიდევ გაქვს დრო დარჩენილი, მანამდე კი გაგართობთ ჩვენი ტრადიციული ბლოგით, უკვე ბოლოჯერ; ასე რომ, გვერდით მოიდგი გადანახული გოზინაყი და ერთად ვნახოთ, რომელი შეკითხვები ერთულათ და ემარტივათ მობილბანკის თამაშის მონაწილეებს შეჯიბრის ბოლო, მე-12 კვირაში.
დამოუკიდებლად მოთამაშეების დედოფალმა ვერ იცეკვა
„Dancing Queen“, ქართულად „მოცეკვავე დედოფალი“, შვედური პოპჯგუფის, ABBA-ის ყველაზე პოპულარული სიმღერაა. წინა კვირაში დამოუკიდებლად მოთამაშეებს სწორედ ეს ცნობილი ანსამბლი უნდა გამოეცნოთ ერთადერთი ფოტომინიშნებით, რომელზეც დედოფალი ელიზაბეთ II მეწყვილესთან ერთად ცეკვავდა. სამწუხაროდ, მინიშნება ბევრისთვის საკმარისი არ აღმოჩნდა, რადგან დამოუკიდებლად მოთამაშეების დიდმა ნაწილმა შეკითხვას არასწორად უპასუხა.
მათ ასევე გაუჭირდათ, იან ვერმეერის ცნობილი ტილოთი გამოეცნოთ 1817 წელს დაბადებული ქართველი პოეტის ლექსის სათაური. მართლაც რთული ჩანს, არა? უფრო გამარტივდება, თუ გეტყვით, რომ ეს ცნობილი ტილო „გოგო მარგალიტის საყურით“ იყო, 1817 წელს დაბადებული პოეტი — ნიკოლოზ ბარათაშვილი, სწორი პასუხი კი — საყურე.
სამაგიეროდ, დამოუკიდებლად მოთამაშეებმა მე-12 კვირაში არცთუ ადვილ შეკითხვებს უპასუხეს სწორად. მაგალითად, ერთ-ერთ შეკითხვაში ვარდის კონკრეტული სახეობის ფოტო იყო გამოტანილი, მათ კი მისი სახელი უნდა გამოეცნოთ. დავალებას მინიშნებად ერთოდა, რომ ყვავილი 1926 წელს დაბადებული მსახიობის „სეხნია“ იყო. ჰო, სწორი პასუხი სწორედაც რომ მონრო გახლდათ.
ამ მოთამაშეებმა ასევე გამოიცნეს ანიმაციური ფილმი „კოკო“. ეს კი მართლაც არ ყოფილა ადვილი, თუ გავითვალისწინებთ, რომ ორი ფოტომინიშნებიდან ერთზე მაიმუნთან გადაღებული გოგო გამოსახულიყო, მეორეზე კი — კოკო შანელი…
ორმოთამაშიანი გუნდები დოროთის ზურმუხტის ქალაქისკენ ვერ დაემგზავრნენ
პირველი რა გაგახსენდებოდა წითელი ფეხსაცმლის, ყვითელი აგურის გზისა და ზურმუხტის ქვის დანახვაზე? ფენტეზის მოყვარული თუ ხარ, ამ სამი ფოტომინიშნებით უთუოდ ამოიცნობდი ფრენკ ბაუმის კლასიკად ქცეულ ნაწარმოებს „ოზის ჯადოქარი“. სწორედ ეს ევალებოდათ ორმოთამაშიან გუნდებს წინა კვირის ერთ-ერთ დავალებაში, თუმცა, ბევრმა მათგანმა შეკითხვას არასწორად უპასუხა.
ფენტეზი რომ ორმოთამაშიან გუნდებს დიდად არ ხიბლავთ, ეს წინა კვირას კიდევ ერთი შეკითხვით დადასტურდა. დავალებაში ბელა ლუგოშის, კრისტოფერ ლისა და გარი ოლდმანის ფოტოებით უნდა გამოგეცნო 1897 წელს გამოცემული წიგნი. სხვადასხვა ეპოქის ამ გამორჩეულ მსახიობებს კი ცნობილი როლი აერთიანებს — სამივე მათგანმა დრაკულა განასახიერა. შეკითხვაზე სწორი პასუხიც ბრემ სტოკერის ეს სახელგანთქმული კლასიკა იყო.
კიდევ ერთი შეკითხვა, რომელიც თამაშის მე-12 კვირაში წყვილებს გაუჭირდათ, წყალბადის გამოცნობას უკავშირდებოდა. არადა, დავალებაში მითითებული იყო, ეს რაღაც 1869 წლის მარტში აღმოჩენილი ცხრილის (პერიოდული სისტემის) პირველი წევრიაო. მეტი სიცხადისთვის კი, შეკითხვას ფოტომინიშნებად ლილუს კადრიც ერთოდა „მეხუთე ელემენტიდან“.
სამაგიეროდ, ორმოთამაშიანმა გუნდებმა სულ ადვილად გამოიცნეს ტერიტორიულ-ადმინისტრაციული ერთეულის მმართველის სახელწოდება — მერი. პრინციპში, ეს რთული შეკითხვა არც უნდა ყოფილიყო, რადგან დავალებაში მინიშნებებად გალაკტიონ ტაბიძისა და მერი პოპინსის ფოტოებს ვხედავდით…
წყვილებს არც სერვანტესის გამოცნობა გაუჭირდათ. არადა, დავალებაში ამ ესპანელი კლასიკოსის „დონ კიხოტი“ არცთუ მარტივად გახლდათ დაშიფრული: მინიშნებებად ლა-მანჩის რეგიონის რუკა, ქარის წისქვილი და ინგლისელი ფეხბურთელის, ჯეიდონ სანჩოს, ფოტო იყო გამოტანილი.
სამ-მოთამაშიანი გუნდები ერთ ბეჭედს ვერ დაეუფლნენ
ტოლკინისეული ლეგენდარიუმის ყველაზე ცნობილი ისტორია ერთი ბეჭდის ამბავს ჰყვება. რა თქმა უნდა, საუბარი „ბეჭდების მბრძანებელზე“ გვაქვს. ამას გარდა, ბეჭედი ძალზედ მნიშვნელოვანი ნივთია კალათბურთელებისთვისაც, რომლებიც ამ ნივთს NBA-ის ფინალში გამარჯვების შემთხვევაში იღებენ. სამწუხაროდ, ეს მინიშნებები სამ-მოთამაშიანი გუნდების დიდი ნაწილისთვის საკმარისი არ აღმოჩნდა და წინა კვირის დავალებაში „ბეჭედი“ ვერ გამოიცნეს.
მათ ასევე გაუჭირდათ ორი შაშვის ფოტოთი გამოეცნოთ კენკროვანი ხილი, მაყვალი. რა თქმა უნდა, ეს ალუზია იყო თამთა მელაშვილის ცნობილ რომანზე, „შაშვი შაშვი მაყვალი“.
„შემიძლია წარმოვიდგინო, რა ხდება ახლა თბილისში — დედაქალაქი ზეიმობს! ზეიმობს მთელი ქვეყანა!“ — იცი, ვის ეკუთვნის ეს სიტყვები? ლეგენდარულ კოტე მახარაძეს. ცნობილმა კომენტატორმა ეს ფრაზა 1981 წლის მაისში თქვა, როცა თბილისის დინამო დიუსელდორფში „უეფას“ თასთა თასის მფლობელი გახდა. სამ-მოთამაშიან გუნდებს სწორედ ამ სიტყვებით უნდა გამოეცნოთ ისტორიული გამარჯვების წელი, თუმცა, ბევრმა მათგანმა ეს ვერ შეძლო.
მათთვის რთული აღმოჩნდა ბრენდან ფრეიზერის გამოცნობაც. არადა, დავალებაში მუმიისა და ვეშაპის ფოტოები იყო გამოტანილი — მინიშნებები ფილმებზე, სადაც ოსკაროსანმა მსახიობმა მთავარი როლი შეასრულა.
სამაგიეროდ, სამ-მოთამაშიანმა გუნდებმა სულ ადვილად გამოიცნეს საქვეყნოდ ცნობილი ფრენჩაიზი, „ვარსკვლავური ომები“. დავალებას საკმაოდ უცნაური მინიშნება კი ერთოდა: თანავარსკვლავედებს შორის VS ნიშანი იყო მოქცეული. ასე რომ, ყოჩაღ გუნდებს!
კიდევ ერთ შექებას ეს მოთამაშეები მხატვრობაში მათი ცოდნის გამო იმსახურებენ. მე-12 კვირას მათ ორ დავალებას უპასუხეს მარტივად და სწორად: ერთში ენდი უორჰოლი უნდა გამოეცნოთ მისი ცნობილი ნამუშევრების შიფრით, მეორეში კი — მე-16 საუკუნის ხელოვანის, ტიციანის, ცნობილი ნამუშევარი „ადამიანის სამი ასაკი“ უნდა დაესახელებინათ.
ასე და ამგვარად, თამაშის 12-კვირიანი რაუნდი დასრულდა. თუკი შეჯიბრის ფინალზე მეტის გაგება თუ დაგაინტერესებს, ეს ბლოგი წაიკითხე აუცილებლად, ჩვენ კი ისღა დაგვრჩენია, წარმატება გისურვოთ!