„არგაჩერდე“ — სწორედ ამ პასუხს მიიღებდი, თუკი წინა კვირას საქართველოს ბანკის ჩატბოტს „თამაშის მონეტას“ მისწერდი. ასე შეძლო მობილბანკის თამაშის უამრავმა მონაწილემ მონეტის მიღება. თამაში, რომელიც უკვე თითქმის ერთი თვეა, მიმდინარეობს, ყოველ კვირას კიდევ უფრო დაძაბული და საინტერესო ხდება.
სანამ თამაშის მე-5 კვირა მიმდინარეობს და დამოუკიდებლად თუ გუნდურად მოთამაშეები ახალი დავალებების შესრულებას ცდილობენ, ქვემოთ მოგიყვებით, როგორი იყო გასული კვირა; რომელი დავალებები აღმოჩნდა მოთამაშეებისთვის ყველაზე რთული და ყველაზე მარტივი შესასრულებლად.
დამოუკიდებლად მოთამაშეები მართლაც არ გაჩერდნენ
ჩატბოტისთვის „თამაშის მონეტის“ მიწერა და პასუხის შესაბამის გრაფაში ჩაწერა დამოუკიდებლად მოთამაშეებისთვის მე-4 კვირის ერთ-ერთი ყველაზე მარტივი დავალება აღმოჩნდა.
გარდა ამისა, მარტოხელა მოთამაშეებმა სულ ადვილად ამოიცნეს კურორტი გოდერძი — ცნობილი ქართული ფილმის პერსონაჟის გვარით, მახარაშვილით.
ამასთან, დამოუკიდებლად მოთამაშეებს, როგორც ჩანს, საბავშვო წიგნებიც ჰყვარებიათ, უფრო ზუსტად კი კარგად ხსომებიათ ასი აკრის ტყის ბინადრები: ვინი პუჰი, გოჭუნა, იო-იო, ვეფხვი, კურდღელი და მათი განუყრელი მეგობარი — კრისტოფერ რობინი.
რაც შეეხება რთულ შეკითხვებს: დამოუკიდებლად მოთამაშეებიდან ბევრს „ტიტანიკის“ ჩაძირვის წელი არ ხსომებია და სწორ პასუხამდე ისინი ვერც აისბერგის ფოტომინიშნებამ მიიყვანა.
გარდა ამისა, მათ ასევე გაუჭირდათ სერიალ „უენსდეისა“ (ინგლ. ოთხშაბათი) მთავარ გმირსა და პერსონაჟ პარასკევას შორის გამოტოვებული დღის, ხუთშაბათის, გამოცნობა.
დამოუკიდებლად მოთამაშეებისთვის რთული აღმოჩნდა იმის მიხვედრაც, რომ უკრაინის სახელმწიფო გერბი მფრინავი სონღულის სიმბოლო შეიძლება ყოფილიყო.
ორმოთამაშიანი გუნდები ანტიკური თამაშების ექსპერტებიც ყოფილან
იცოდი, რომ სენეტი უძველესი სამაგიდო თამაშია, რომელიც ძველ ეგვიპტეში შეიქმნა? გარდა იმისა, რომ ორწევრიანი გუნდები მობილბანკის თამაშს მშვენივრად ართმევენ თავს, ამ უძველესი თავშესაქცევის შესახებაც სცოდნიათ და მასზე დასმულ შეკითხვასაც მარტივად გასცეს პასუხი.
ამასთან, მათთვის ადვილი აღმოჩნდა რომის იმპერატორ კომოდუსის ჯოკერთან დაკავშირება, რადგან ორივე მათგანს ჰოლივუდურ ფილმებში ცნობილი მსახიობი ხოაკინ ფენიქსი თამაშობს. ასე გამოიცნეს ფერფლიდან აღმდგარი მითიური ფრინველიც, ფენიქსი.
ორმოთამაშიან გუნდებს ასევე მშვენივრად სცოდნიათ ლეონარდო და ვინჩის გამოგონებებიც, რადგან მათი დანახვისას ავტორის სახელის გახსენება არ გასჭირვებიათ.
გარდა ამისა, ამ გუნდებმა ამოიცნეს ენტონი ბერჯესის ცნობილი რომანის ილუსტრაცია და იმ ციტრუსის სახელი, რომელიც წიგნის სათაურში ფიგურირებს — ფორთოხალი.
„მექანიკური ფორთოხალზე“ შეკითხვა კი ემარტივათ, მაგრამ ორმოთამაშიან გუნდებში ბევრმა ვერ გაიხსენა მექანიკური საფრთხობელა ყველა ჩვენგანის საყვარელი ქართული კომედიიდან „უდიპლომო სასიძო“. ამ ფილმზე სხვადასხვა ფოტომინიშნებებიც არ აღმოჩნდა საკმარისი, რომ მათ გამოეცნოთ, რომელი ნივთის არქონაა ისტორიის მთავარი გმირის პრობლემა.
როგორც ჩანს, შიფრები და რებუსები ორმოთამაშიან გუნდებს დიდად არ ჰყვარებიათ. სწორედ ამიტომ გაუჭირდა ბევრ მათგანს, საჩვენებელი თითით, საათით, თხითა და ბარით გამოეცნო ყვავილი ია.
რთული აღმოჩნდა ასევე შეკითხვა, სადაც მუხრან მაჭავარიანის ლექსი „საბა“ იყო დაშიფრული — აი, ის, ლუდოვიკოსთან რომ ალოდინეს და მე-15 კაცად შევიდა. შესაბამისად, ბევრს გაუჭირდა ლექსის გმირის, სულხან-საბა ორბელიანის, გვარის გახსენება.
სამ-მოთამაშიანი გუნდები რებუსით შენიღბულ ჯიმ კერისაც ცნობენ
როგორც ჩანს, სამ-მოთამაშიან გუნდებში ცნობილ ამერიკელ მსახიობ ჯიმ კერის ბევრი ფანი ჰყოლია. ასე რომ, მათ სულ არ გაუჭირდათ კინოვარსკვლავის გამოცნობა რებუსით, რომელშიც მისი ცნობილი ფილმები იყო დაშიფრული.
ამ გუნდებს სერიალებიც ჰყვარებიათ და მეტიც — მშვენივრად სცოდნიათ, რომ მარია კალასს, მონსერატ კაბალესა და ჯოან საზერლენდს სოპრანოს ხმა აერთიანებთ. ასე მიხვდნენ, რომ ცნობილი მომღერლების ფოტოები მინიშნება იყო 1999-2007 წლების სერიალ „სოპრანოებზე“.
სამ-მოთამაშიანმა გუნდებმა ორი ფოტოთი დაშიფრული „აბრეშუმის გზაც“ ადვილად გამოიცნეს, მით უმეტეს, რომ შეკითხვაში ამ ტერმინის ავტორის, ფერდინანდ ფონ რიხტჰოფენის, სახელიც იყო ნახსენები.
ასეთი რთული შეკითხვებისთვის თავის გართმევის მიუხედავად, სამ-მოთამაშიან გუნდებს ღორის დანახვაზე გაუჭირდათ „ცხოველების ფერმის“ ერთ-ერთი მთავარი პერსონაჟის, ნაპოლეონის, გახსენება და ნაწარმოების ავტორის, ჯორჯ ორუელის, გამოცნობა.
ამ გუნდებს ასევე ერთულათ ცნობილი ქართული ანსამბლის, ვია-75-ის სიმღერების ამოცნობა ფოტომინიშნებებით. შედეგად, ანსამბლის დაფუძნების წელი, 1975, ვერ გამოიცნეს.
სამ-მოთამაშიან გუნდებს არც უახლესი საფეხბურთო ისტორია ხსომებიათ მაინცდამაინც კარგად. ბევრი მათგანს გაუჭირდა 2015 წლის ევროპის სუპერ თასზე „სევილიასა“ და „ბარსელონას“ მატჩის გახსენება ფეხბურთელების შემადგენლობით. ამდენად, არც ის ხსომებიათ, რომ თამაშს საქართველოს დედაქალაქმა უმასპინძლა.
დაბოლოს — რა გაგახსენდებოდა ვან გოგის, ჯანი როდარისა და მტირალი ადამიანის დანახვაზე? მინიშნებები ასე იხსნება: ქართული გამოთქმა „ყურებზე ხახვის დაჭრა“, წიგნი „ჩიპოლინო“ და ხახვის დაჭრით მოგვრილი ცრემლები. სწორი პასუხია ხახვი. ამ შეკითხვამ სამ-მოთამაშიან გუნდებში ალბათ მართლაც ბევრი აატირა, რადგან დავალება ვერ შეასრულეს.
ცრემლებით თუ ღიმილით, ასე დასრულდა მობილბანკის თამაშის მე-4 კვირა. გრანდიოზულ ფინალამდე კიდევ 8 კვირა რჩება. ასე რომ, თუ ჯერ კიდევ არ ხარ თამაშში ჩართული, სასწრაფოდ გამოასწორე ეს შეცდომა, გადმოწერე მობილბანკის აპლიკაცია, გაიარე მარტივი რეგისტრაცია და შემოუერთდი ყოველკვირეულ მხიარულებას. დეტალურ ინფორმაციას, მათ შორის თამაშის წესებსა და პრიზებზე, ამ ბლოგში მიიღებ.