საქართველოს კალათბურთის ეროვნულმა ნაკრებმა ისტორია დაწერა და ჩვენი ქვეყნისთვის სადებიუტო მსოფლიო ჩემპიონატზე საუკეთესო თექვსმეტ გუნდს შორის მოხვდა. საქართველოს ნაკრებმა ვენესუელის ნაკრები 70-59 დაამარცხა, რითაც სამ თამაშში ორი მოგება დააგროვა და ჯგუფიდან გავიდა. ჩვენი ნაკრები ჯგუფიდან გასვლას 16 ქულაზე ნაკლები სხვაობით წაგების შემთხვევაშიც ინაღდებდა, თუმცა შემდეგ ქვეჯგუფში მოგებული თამაშების ქულები მიგვყვება, ასე რომ, დღევანდელი გამარჯვება ძალიან მნიშვნელოვანია.
ვენესუელის ნაკრები თითქმის ყველა კომპონენტში დავჯაბნეთ და დამსახურებული გამარჯვებაც მოვიპოვეთ. განსაკუთრებით აღსანიშნავია პერიმეტრის დაცვა, რაც, როგორც წესი, ჩვენი გუნდის აქილევსის ქუსლია ხოლმე. მეტოქისგან დღეს მთავარი საფრთხე სწორედ პერიმეტრიდან მოდიოდა და ამ პრობლემის გადაჭრა ძალიან კარგად შევძელით. განსაკუთრებით აღსანიშნავია დაცვაში რატი ანდრონიკაშვილის და დუდა სანაძეს შესანიშნავი თამაში. ჩვენი სამწვრთნელო შტაბის ჩანაფიქრი აშკარა იყო, რომ მაქსიმალურად აწეული დაცვით უნდა გვეთამაშა და პერიმეტრზე მეტოქე გუნდის მსროლელებისთვის სივრცე არ უნდა მიგვეცა. ბიჭებმა ეს ამოცანა ძალიან კარგად შეასრულეს. ვენესუელის ნაკრებმა თამაშში 25-დან მხოლოდ 6 სამქულიანი გამოიყენა (24%), რაც შემთხვევითი არ არის და ეს სტატისტიკა ჩვენი ნაკრების დაცვაში ძალიან კარგად თამაშმა განაპირობა.
წინა მატჩებისგან განსხვავებით, ამჯერად სტარტი კარგი გამოგვივიდა. თავიდანვე უპირატესობა მოვიპოვეთ და ანგარიშში წინ გავედით. ვენესუელის ნაკრებს ქულების დაგროვება ძალიან უჭირდა. განსაკუთრებით კარგი იყო მეორე პერიოდი, როდესაც მეტოქეს ათ წუთში მხოლოდ 4 ქულის მოპოვების შესაძლებლობა მივეცით. ილიას ზუროსმა ვენესუელის ნაკრების წინააღმდეგ უფრო დაბალი ხუთეულები დატვირთა და ამ ტაქტიკურმა სვლამ ძალიან გაამართლა. გიორგი შერმადინმა პარკეტზე მხოლოდ 13 წუთი გაატარა, ხოლო სანდრო მამუკელაშვილმა 17 წუთი. ვენესუელის ნაკრებისგან სამწამიანში დიდად ხიფათი არ მოდიოდა და რა საფრთხეებიც იყო, იმას გოგა ბითაძე ძალიან კარგად უმკლავდებოდა. ბითაძეს შესანიშნავი თამაში გამოუვიდა, მან მსოფლიო ჩემპიონატზე თავისი მეორე ორმაგი დუბლი გაიფორმა – 11 ქულა, 11 მოხსნა, 2 ჩაჭრა და ორი დაფარება. გოგა ტრადიციულად ძალიან კარგი იყო დაცვაში, როგორც ერთი-ერთზე, ასევე დაზღვევაზე. დაბალი ხუთეულით თამაშმა განაპირობა, რომ ვენესუელას პერიმეტრზე ნაკლები სივრცეები მიეცა. როგორც სლოვენიის ნაკრების წინააღმდეგ, დღესაც ძალიან კარგი იყო კახა ჯინჭარაძე, რომელმაც პარკეტზე 26 წუთი გაატარა და ძალიან სასარგებლო იყო.
ხარვეზებს რაც შეეხება, კვლავ საკმაოდ ცუდი თამაში ჰქონდა თედ მაკფადენს, რომელსაც სროლა ამჯერადაც არ წაუვიდა. თედმა 30 წუთში მხოლოდ 3 ქულის დაგროვება შეძლო (5-დან 1 ჩაგდებული სამქულიანი). მაკფადენმა ჯერჯერობით მსოფლიო ჩემპიონატზე თავისი რიტმი ვერ იპოვა და იმედია იგი შემდეგ თამაშებში მოუმატებს. თუ პირველ ეტაპზე ჩვენი ლეგიონერის მსუყე კონტრიბუციის გარეშე შევძელით წარმატების მიღწევა, გრანდების წინააღმდეგ მაკფადენის შედეგიანი თამაშის გარეშე წარმატების მიღწევა გაგვიჭირდება. იმედის მომცემი ის არის, რომ თედმა უკვე სამი თამაში ჩააგდო და არ მგონია მსოფლიო ჩემპიონატზე მან ყველა შეხვედრაში დაბალი შედეგიანობა აჩვენოს, რადგან მიუხედავად არასტაბილურობისა, მისი შესაძლებლობები ყველამ ვიცით.
ასევე უნდა ითქვას, რომ მეორე ტაიმში კონცენტრაცია დავკარგეთ და ბევრი შეცდომა დავუშვით. თუმცა ანგარიშში სხვაობა ამის უფლებას გვაძლევდა და მთავარი თამაშის გამარჯვებამდე მიყვანა იყო, რაც მოვახერხეთ კიდეც.
ისტორია დაიწერა და საქართველოს ნაკრები მსოფლიოს 16 საუკეთესო გუნდს შორის მოხვდა. შემდეგ ეტაპზე კიდევ ერთ ქვეჯგუფში მოგვიწევს თამაში. საქართველოს ნაკრების მეტოქეები ამჯერად მსოფლიო კალათბურთის გრანდები – გერმანიის და ავსტრალიის ნაკრებები იქნებიან. მეოთხედფინალში გასასვლელად დიდი ალბათობით ორივე მეტოქის დამარცხება დაგვჭირდება, რაც, რა თქმა უნდა, ურთულესი ამოცანაა. გერმანიის ნაკრები მსოფლიო ჩემპიონატზე უბრალოდ სასწაულ კალათბურთს აჩვენებს, ხოლო ავსტრალიას თავის რიგებში NBA-ს ცხრა კალათბურთელი ჰყავს. კარგია, რომ პროგრამის მინიმუმი უკვე შესრულებული გვაქვს და ფავორიტების წინააღმდეგ ზედმეტი წნეხის გარეშე ვითამაშებთ. ეს ფაქტორი წესით ძალიან დაგვეხმარება. შემდეგი ჯგუფური ეტაპი 1 სექტემბერს დაიწყება და ჩვენი პირველი მეტოქე გერმანიის ნაკრები იქნება, ავსტრალიის ნაკრებს კი 3 სექტემბერს დავუპირისპირდებით.
ავტორი: გიორგი ზურაბიშვილი