sCoolApp — პირველი აპლიკაცია მოსწავლეებისათვის 2022 წლის ოქტომბერში გაეშვა. თითქმის ორი წლის თავზე, აპლიკაციაში რეგისტრირებული მომხმარებლების რაოდენობამ უკვე 150 ათასს გადააჭარბა; 100 ათასზე მეტი მოსწავლისათვის sCoolApp-ის მოსახერხებელი სერვისების გამოყენება უკვე ყოველდღიურობის ნაწილია. აპლიკაცია უსაფრთხო სივრცეა, რომელიც მოზარდებს აძლევს საშუალებას, ისარგებლონ საბაზისო საბანკო სერვისებით: sCool Card-ის ანგარიშის შემოწმება, თანხის გადარიცხვა ან მიღება, მობილურის ბალანსის შევსება და სხვა. ამასთან, მას შემეცნებითი ფუნქციაც აკისრია.
„აპლიკაციის გაშვების დროსაც და დღესაც, მისი არსებობის მთავარი მიზანი უცვლელია: გვსურს, რომ ვიყოთ წარმატებული თაობის წარმატებული აპლიკაცია, ხელი შევუწყოთ ჩვენს ახალ თაობაში ფინანსურ განათლებას და ციფრული არხით მივცეთ წვდომა მათივე საბანკო ეკოსისტემაზე საქართველოს ბანკში“, — გვეუბნება sCoolApp-ის Product Owner, კობა მჭედლიშვილი.
როგორ იქმნებოდა და ვითარდებოდა sCoolApp
კობას თქმით, აპლიკაციის შექმნისას თავიდანვე იცოდნენ, რომ ის წარმატებული იქნებოდა, რადგან „ყველაზე ციფრული თაობისთვის“ პირველი საბანკო სივრცე გახლდათ, მისი საჭიროება კი უკვე დიდი ხანია, არსებობდა. თუმცა, შედეგმა ყოველგვარ მოლოდინს გადააჭარბა, რაც, რა თქმა უნდა, აპლიკაციაზე მუდმივად მომუშავე გუნდის დამსახურებაა.
„ვფიქრობ, რომ ჩვენი მომხმარებელი ამ ძალისხმევას გრძნობს“, — აღნიშნავს კობას, — „ყველა ინიციატივას, რომლის ამოსავალი წერტილი მომხმარებელია, წარმატება უპირობოდ და თავისით მოჰყვება ხოლმე“.
სწორედ იმიტომ, რომ sCoolApp-ის შემქმნელებისთვის ამოსავალი წერტილი მომხმარებელია, აპლიკაციას გაშვებიდან დღემდე უამრავი საინტერესო და გამოსადეგი ფუნქციონალი დაემატა. კობა ამბობს, თავიდანვე მნიშვნელოვანი იყო, რომ მომხმარებელს რეგისტრაცია და ძირითადი საბანკო პროდუქტების გამოყენება ციფრულად შესძლებოდაო. თუმცა, ეს უსაფრთხო, დაცული ციფრული სივრცეა: აპლიკაციის გადმოწერის შემდეგ, მასში დასარეგისტრირებლად მშობლის ინფორმაციის მითითება და მისი მობილბანკიდან დადასტურებაა საჭირო.
რას სთავაზობს sCoolApp მოსწავლეებს
„დღეისთვის sCoolApp აერთიანებს ეკოსისტემას, რომელშიც შედის ლოიალურობის პროგრამა, lifestyle შეთავაზებები, OpenAI-სთან პარტნიორობით შექმნილი ChatGPT-ის მესენჯერი, ციფრული ყულაბა და მინისტატიები ფინანსური განათლებაზე“, — გვიყვება კობა, — „ახლახან დავასრულეთ ‘სხვა სამყაროს’ გასართობი თავგადასავლის პირველი სეზონი. მომხმარებლის გამოცდილებაც მნიშვნელოვნად შეიცვალა; საინტერესო, მარტივი და, რაც მთავარია, სახალისო გახდა“.
სახალისო გამოცდილების შექმნაში დიდი წვლილი სწორედ „სხვა სამყარომ“ შეიტანა — მოულოდნელობებით სავსე ვირტუალურმა სამყარომ აპლიკაციის მომხმარებლები საინტერესო და შემეცნებით თამაშში ჩართო.
რა ადგილი უკავია sCoolApp-ს მოსწავლეების ცხოვრებაში
როგორც კობამ აღნიშნა, sCoolApp-ის ერთ-ერთი მთავარი მიზანი არის მოსწავლეებისთვის ფინანსური განათლების მიცემა და მათში შესაბამისი უნარ-ჩვევების გამომუშავება, საბაზისო საბანკო სერვისებზე წვდომა კი ამ მისიის ნაწილია.
„ეს განაპირობებს ზრდასრულობაში ჩვენს სწორ ფინანსურ გადაწყვეტილებებს, რომელსაც ფაქტობრივად ყოველდღიურად ვიღებთ“, — ამატებს კობა, — „sCoolApp-ის მომხმარებელს ადრეული ასაკიდან უვითარდება დაგროვების კულტურა, ეცნობა ფინანსურ ტერმინოლოგიას, რაც აუცილებლად გაუმარტივებს მომავალში ფინანსურ ნავიგაციას“.
ამასთან, აპლიკაცია ზრუნავს მოსწავლეების დროზეც. ამიტომ, იმის მიუხედავად, რომ sCoolApp მათი ყოველდღიურობის განუყოფელ ნაწილად იქცა, აპლიკაციის გამოყენება მინიმალურ დროს და ძალისხმევას მოითხოვს.
რა სიახლეებს უნდა ელოდონ მომხმარებლები
ჩვენი მომხმარებლის უკუკავშირი, როგორ გაცვეთილადაც უნდა ჟღერდეს, ისაა, რაც ყველაზე დიდ მოტივაციას გვაძლევს, გავხდეთ უკეთესებიო, გვეუბნება კობა. უკეთესში იგულისხმება ისიც, რომ მოსწავლეებისთვის აპლიკაციის გამოყენება, ყოველდღიური გამოცდილება უფრო სახალისო გახდეს. სწორედ ამიტომ, სამომავლოდ მათ ბევრი საინტერესო სიახლე ელოდებათ.
„სამომავლოდ, sCoolApp ჩვენს მომხმარებლებსა და მათ მშობლებს, როგორც ყოველთვის, გაუმჯობესებულ ეკოსისტემას, თანამედროვე ციფრულ პროდუქტს და ბევრ მოულოდნელ სიახლეს შესთავაზებს“, — ამატებს კობა.
sCoolApp-ის სერვისებზე უფრო მეტს ამ ბლოგიდან გაიგებ, აპლიკაციის გადმოწერას კი აქედან შეძლებ.