რატომ უნდა დაესწროთ წლის შემაჯამებელ ტექნოლოგიურ სამიტს საქართველოში – TOUCH23

ბოლო წლებია, უკვე ყველა საუბრობს ციფრული ტრანსფორმაციის, ახალი ტექნოლოგიების, მათ შორის ხელოვნური ინტელექტის მნიშვნელობაზე და გავლენაზე, რომელიც ამ ახალ ტრენდებს ექნებათ არამხოლოდ ბიზნეს სამყაროზე, არამედ ჩვენს ყოველდღიურ ცხოვრებაზე. შესაბამისად, ყველა დაგვეთანხმება, რომ ამ შედარებით ახალ მიმართულებებზე ინფორმაციის ფლობა, განსაკუთრებულად მნიშვნელოვანი ხდება, როგორც ბიზნესისთვის, ასევე ნებისმიერი ჩვენგანისთვისაც.

საქართველოში ბოლო წლებია საკმაოდ განებივრებული ვართ მაღალი დონის სამიტებით, კონფერენციებით და სხვადასხვა ივენთებით, რომელიც სხვადასხვა სექტორში ახალ ტექნოლოგიებსა და მიმართულებებს ეხება. ამ მხრივ გამონაკლისი არ იყო არც 2023 წელი, თუმცა, წლის შემაჯამებელი ღონისძიება – სამიტი TOUCH23 ჯერ კიდევ წინაა. სამიტი საქართველოს ბანკის მხარდაჭერით, ტრადიციულად, 7 და 8 დეკემბერს რუსთაველის თეატრში ჩატარდება.

TOUCH23 საერთაშორისო სამიტია, რომელზეც აუდიტორიას საკუთარ ცოდნასა და გამოცდილებას როგორც უცხოელი, ასევე ქართველი სპიკერები გაუზიარებენ. სამიტზე სიტყვით გამოვლენ ისეთი კომპანიების წარმომადგენლები, როგორიცაა Google, Meta, IDEO, NVIDIA, Spotify, Keely, Cloudflare, Dutch Digital Design, Veli.store, Quickshipper, Leavingstone და სხვები.

სამიტის ფარგლებში, სიტყვით გამოსვლები, პანელური დისკუსიები თუ ვორქშოფები 5 ძირითად თემას შეეხება: ბიზნესი, მომავალი, დიზაინი, ტექნოლოგიები და სტარტაპები. ამ ბლოგში შევეცდებით მოკლედ მოგიყვეთ თუ რაზე ისაუბრებენ სპიკერები ამ 5 თემის ფარგლებში და რატომ იქნება თქვენთვის საინტერესო მათზე დასწრება.

ბიზნესი

ნებისმიერი ბიზნესი, რომელიც ზრდაზეა ორიენტირებული, ყოველთვის ცდილობს მოიპოვოს კონკურენტული უპირატესობა, ან, მინიმუმ, არ დაკარგოს კონკურენტუნარიანობა სწრაფად ცვალებად ციფრულ სამყაროში. ცხადია, ამ მიზნისთვის თანამედროვე ციფრული ტექნოლოგიების გამოყენება გადამწყვეტ მნიშვნელობას ატარებს. სწორედ ამიტომ, ბიზნესის წარმომადგენლებისთვის, საერთაშორისო კომპანია Cloudflare-ის სტრატეგიისა და სპეციალური პროექტების ხელმძღვანელი, ალონსო ბუსტამანტე AI-ზე და მისი გამოყენების პრაქტიკულ მაგალითებზე ისაუბრებს. ხოლო Google-ის წარმომადგენელი ჰორია ნიკულესკო AI-ის გამოყენების ეთიკურ საკითხებს შეეხება.

რა თქმა უნდა, ხელოვნური ინტელექტი არ არის ერთადერთი თემა, რომელზეც სამიტზე ისაუბრებენ. საქართველოს ბანკის წარმომადგენელი გიორგი კობიაშვილი ვორქშოფზე აუდიტორიას ახალ პროდუქტს – Ads Manager-ს გააცნობს, რომელიც ქართულ ციფრულ ბაზარზე დიდი სიახლეა. მისი საშუალებით, ბიზნესი ქმნის შეთავაზებებს (ქეშბექი, ფასდაკლება, პლუს ქულები), რომელიც გამოუჩნდება მობილბანკის, sCoolApp-ის და offers.bog.ge-ს 1 300 000-ზე მეტ ციფრულად აქტიურ მომხმარებელს და მათ შორის ყველაზე რელევანტურს.

ბიზნესის მიმართულება TOUCH23-ზე ერთ-ერთი პრიორიტეტულია, შესაბამისად, დაგეგმილია არაერთი სპიკერის გამოსვლა, პანელური დისკუსია და ვორქშოპი.

მომავალი

როგორც ზემოთ უკვე ვთქვით, სიახლეები ციფრულ სამყაროში გავლენას იქონიებს ჩვენს ყოველდღიურ ცხოვრებაზე. ყველა მნიშვნელოვანმა ახალმა ტექნოლოგიამ (ორთქლის ძრავა, პირველი ავტომობილი, პირველი მიკროჩიპი და ა.შ.) მსოფლიო საზოგადოებაში დიდი სოციალური, პოლიტიკური და ეკონომიკური ცვლილებები მოიტანა. ჩვენ ახლა სწორედ ასეთი ცვლილებების ეპოქაში ვცხოვრობთ.

SANDBOX-ის წარმომადგენელი არსლან კირანი აუდიტორიას მეტავერსზე (metaverse) და „ციფრული ნაციის“ შექმნის პოტენციალზე ესაუბრება.

რა თქმა უნდა, მეტავერსის გარდა, საუბარი შეეხება AI-საც (ამ თემას თითქმის ყველა მიმართულებაში უკავია ცენტრალური ნაწილი) – გაზის უნივერსიტეტის ხელოვნური ინტელექტის ცენტრის მრჩეველთა საბჭოს წევრი სულე გიუნერი აუდიტორიას იმ ცვლილებებზე ესაუბრება, რომელიც შესაძლოა AI-მ შემოქმედებით მიმართულებაზე იქონიოს. ის ასევე ისაუბრებს გამოწვევებზე, რომელიც AI-ის ფართო მოხმარებასთან ერთად გაჩნდება ინტელექტუალური საკუთრების თვალსაზრისით.

დიზაინი

ციფრულ სამყაროში დიზაინი განსაკუთრებულ მნიშვნელობას ატარებს, იქება ეს UX დიზაინი თუ უბრალოდ ციფრული ბანერი, რომელსაც ინტერნეტში ვხედავთ ვებგვერდებზე. ბუნებრივია, რომ ახალი ტექნოლოგიები და ციფრული ხელსაწყოები პირდაპირ მოქმედებენ არამხოლოდ დიზაინის შექმნის პროცესზე, არამედ ჩვენს მიერ მის აღქმაზეც.

„ტილო ხვდება კოდს“ იქნება Onephase-ის დამფუძნებლის გუგა მეშვილდიშვილის გამოსვლის მთავარი თემა, სადაც ის დიზაინზე მომუშავე კომპანიებისთვის, შემოქმედებასა და ციფრული კოდის შორის კავშირის მნიშვნელობაზე ისაუბრებს.

Dutch Digital Design-ის ბორდის წევრი სებასტიან შირის გამოსვლის მთავარი თემა დიზაინერების გუნდის სწორი შერჩევა იქნება.

ტექნოლოგიები

ტექნოლოგიების უზარმაზარი გავლენა ჩვენს ყოველდღიურ ცხოვრებაზე სიახლე არავისთვისაა. ზოგიერთი თანამედროვე ტექნოლოგიური ხელსაწყო არათუ ფუფუნების საგანი, არამედ უბრალოდ აუცილებლობაც აღარაა – ის ჩვენი განუყოფელი ნაწილი გახდა. რა თქმა უნდა, ტექნოლოგიები ადამიანებს სრულიად ახალ და მანამდე წარმოუდგენელ შესაძლებლობებს აძლევს, თუმცა, ამ ყველაფერს ახლავს თავისი რისკებიც. სწორედ ამ თემაზე ისაუბრებს Leavingstone-ის მობილურ დეველოპერთა გუნდის ხელმძღვანელი სანდრო დოლიძე – თუ როგორ უნდა გავიკვლიოთ გზა ციფრულ ჯუნგლებში, ისე რომ არ დავკარგოთ ჩვენი ადამიანური ბუნება.

სიტყვით გამოვა Veli.store-ის CTO ვაჟიკო ფრანგიშვილიც, რომელიც ისაუბრებს საკუთარ გამოცდილებაზე, თუ როგორ ხდება ტექნოლოგიური იდეების პროდუქტებად გარდაქმნა.

კომპიუტერული თამაშების ინდუსტრია ერთ-ერთი ყველაზე სწრაფად მზარდი ინდუსტრია მსოფლიოში. Ready Player Me-ის დეველოპერი სერგან ალტუნდაში ახალი ტექნოლოგიების სამომავლო როლზე ისაუბრებს სათამაშო ინდუსტრიაში, განსაკუთრებით კი NPC-ების (პერსონაჟები თამაშში, რომლებსაც მოთამაშე ვერ მართავს) უფრო რეალისტური სიმულაციის მიმართულებით.

სტარტაპები

დღევანდელ ეკონომიკურ ცხოვრებაში სტარტაპების როლი დღითიდღე უფრო იზრდება. როგორც საქართველო, ასევე სახელმწიფოების დიდი უმრავლესობა არაერთ შეღავათს აწესებს და პროგრამას ქმნის რათა ხელი შეუწყოს სტარტაპების განვითარებას, რადგან ყველა ავტორიტეტული პროგნოზით, ისინი ეკონომიკური ზრდის ერთ-ერთი მთავარი მამოძრავებლები გახდებიან.

სტარტაპის წარმატება მხოლოდ კარგ იდეაზე არ არის დამოკიდებულება, ერთ-ერთი მთავარი ფაქტორი ინვესტიციის მოპოვებაა, რაც მაღალი კონკურენციის პირობებში არც თუ ისე მარტივი პროცესია. სწორედ ამიტომ TOUCH23-ის ფარგლებში არაერთი გამოსვლა, პანელური თუ AMA (კითხვა-პასუხი) ტიპის შეხვედრაა დაგეგმილი, რომელიც სწორედ სტარტაპერისა და ინვესტორის ურთიერთობებს ეხება.

გარდა ამისა, TOUCH23-ის ფარგლებში არაერთ სტარტაპს ჰქონდა შესაძლებლობა მონაწილეობა მიეღო Challenge-ში რომლის ფინალისტსაც მიეცემა საშუალება მოიპოვოს 1 000 000 დოლარის ინვესტიცია, მათ შორის 500 Georgia-ს მონაწილეებს, ბოლო ეტაპზე გადასული 3 ფინალისტიდან გამარჯვებული სამიტის ბოლო დღეს გამოვლინდება.

სამიტის ფარგლებში გათვალისწინებულია სტარტაპერების გამოფენაც, სადაც მათ უნიკალური ნეთვორქინგის საშუალება ექნებათ, სადაც პოტენციურ ინვესტორებს საკუთარ იდეებს გააცნობენ.

TOUCH23 მასშტაბური და უნიკალური ღონისძიებაა, რომლის შესახებაც სრული ინფორმაცია ერთ ბლოგში ცხადია არ დაეტევა, დამატებითი ინფორმაცია სპიკერებზე, დაგეგმილ გამოსვლებზე და ღონისძიებებზე შეგიძლიათ იხილოთ სამიტის ვებგვერდზე.

არ გაჩერდე, გააგრძელე კითხვა