საქართველოს ბანკის მხარდაჭერით 29 ივნისს 500 Georgia-ს მე-4 ნაკადის დემო დღე გაიმართა, სადაც ტექნოლოგიური სტარტაპების დამფუძნებლებმა დაინტერესებულ საზოგადოებას თავიანთი ინოვაციური პროდუქტები წარუდგინეს. მათ შორის ერთ-ერთი იყო Oneapply.
Oneapply უზბეკეთში დაფუძნებული სტარტაპია, რომელიც სამუშაოს მაძიებლებს მარტივი და მოსახერხებელი პლატფორმის მეშვეობით სამსახურის სწრაფად პოვნაში ეხმარება.
დემო დღის სცენაზე საკუთარი გამოსვლა სტარტაპის დამფუძნებელმა ერთ-ერთი მნიშვნელოვანი მიღწევით გახსნა: ბოლო ერთ თვეში OneApply 5000-ზე მეტ ადამიანს დაეხმარა შესაფერისი სამსახურის მოძებნაში.
რატომ იყენებენ სამსახურის მაძიებლები OneApply-ს, როცა მათ აქვთ Headhunter და Linkedin? შერზოდმა განაცხადა, რომ ბოლო პერიოდში ყველაზე დიდმა კარიერულმა ვებგვერდებმა ვაკანსიების დადება 3%-ით შეამცირეს და დღესდღეობით სამსახურის მაძიებლები სხვადასხვა პლატფორმაზე ერთსა და იმავე ვაკანსიებზე გზავნიან აპლიკაციებს. ისინი კი ამაში უამრავ საათს კარგავენ.
თავის მხრივ, როგორც შერზოდმა აღნიშნა, ადამიანური რესურსების მაძიებლებსაც ძალიან უჭირთ სწორი კანდიდატების პოვნა სხვადასხვა პოზიციაზე.
ამ ორმხრივ წინაღობას ერთი დაწკაპუნებით მარტივად წყვეტს OneApply. კანდიდატი აღნიშნულ პლატფორმაზე ავსებს მონაცემთა საჭირო ველებს და სწორედ აქედან გზავნის აპლიკაციას ყველა მისთვის საინტერესო ვაკანსიაზე სხვადასხვა კარიერულ ვებგვერდსა და სოციალურ არხში. ხოლო HR-ები კი, თავის მხრივ, კანდიდატების ბაზებსა და მათ შესაძლებლობებს სწორედ რომ ამ პლატფორმაზე ნახავენ.