გრძელვადიანი ინვესტირება ქონების დაგროვების ერთ-ერთი ყველაზე ეფექტიანი გზაა. ისტორიულ მონაცემებზე დაკვირვება ცხადყოფს, რომ საფონდო ბირჟის წლიური საშუალო ამონაგები 9-10%-ს შეადგენს, რაც მნიშვნელოვნად აღემატება სადეპოზიტო ან საპენსიო ანგარიშებიდან მიღებულ სარგებელს.
თანხის დაზოგვასა და ინვესტირებას შორის დიდი განსხვავებაა: ერთი სტრატეგია აწ უკვე დაგროვილი ფინანსური რესურსების შენახვაში გვეხმარება, მეორე კი – დოვლათის შექმნასა და გამდიდრებაში.
კომპანიების აქციებსა თუ ფონდებში ინვესტირების არაერთი სტრატეგია არსებობს და ყოველი მათგანი თავისი არსით მართებული და სასარგებლოა, თუმცა საინვესტიციო სტრატეგიის სისწორე პირდაპირაა დამოკიდებული თქვენს სურვილებსა და შესაძლებლობებზე. ექსპერტების შეფასებით, საინვესტიციო ბანკებისა და ჰეჯ-ფონდებისთვის გათვლილი სტრატეგია გაცილებით უფრო მოკლევადიანი და მაღალრისკიანია, ვიდრე ის სტრატეგია, რომელიც ჩვეულებრივმა მოქალაქემ თავისთვის უნდა აირჩიოს.
როდის უნდა დაიწყოთ ინვესტირება? – ამ კითხვაზე პასუხი საკმაოდ მარტივია: დღესვე, რადგან საფონდო ბირჟაზე თანხის დაბანდებისთვის იდეალური დრო არ არსებობს, მაქსიმალური შედეგის მისაღებად ინვესტირება სწორედ მაშინ უნდა დაიწყოთ, როდესაც ამის საშუალება გექნებათ. ბირჟიდან მიღებული სარგებლის მოცულობა პირდაპირ კავშირშია საინვესტიციო პერიოდთან. ზოგადად, რაც უფრო ადრე დაიწყებთ ინვესტირებას, მით უფრო დიდი იქნება იმის შანსი, რომ რამდენიმე წელიწადში თქვენი პორტფელის მოცულობა სასურველ ნიშნულს მიაღწევს.
იდეალური დროის არარსებობა იმ მარტივი ფაქტითაა განპირობებული, რომ მომავლის ზედმიწევნით წინასწარმეტყველება შეუძლებელია. ზუსტად არავინ იცის, როდის დაეცემა ან გაიზრდება კონკრეტული კომპანიის აქციების ღირებულება, ამიტომაც იდეალური საინვესტიციო მომენტის მოლოდინში დრო ფუჭად არ უნდა დაკარგოთ.
გრძელვადიანი ინვესტირების მთავარი უპირატესობა მისი დაბალრისკიანობა და დაგროვებითობაა. საქმე ისაა, რომ რეინვესტირების შემთხვევაში, დროსთან ერთად, პირდაპირპროპორციულად იზრდება რთული პროცენტის მოცულობა. წლების განმავლობაში დაგროვილი დივიდენდები საინვესტიციო პორტფელის მოცულობას მნიშვნელოვნად ზრდის, ანუ მარტივი სიტყვებით რომ ვთქვათ, სარგებლის სახით პროცენტის პროცენტს იღებთ, რომლის მოცულობაც დროსთან ერთად იზრდება.
ზოგადად, საფონდო ბირჟაზე თანხის დაბანდების ყველაზე ეფექტიან სტრატეგიად პერიოდული ინვესტირების მეთოდი მიიჩნევა, მაგალითად: ყოველთვიურად 200 დოლარის ინვესტირებით 40 წელიწადში საინვესტიციო პორტფელის მოცულობამ, შესაძლოა, $1 მილიონს გადააჭარბოს. შედარებისთვის, ყულაბაში თანხის შენახვის შემთხვევაში, 40 წელიწადში დაგროვილი თანხის მოცულობა სულ რაღაც 96,000 დოლარი იქნებოდა. ამ შემთხვევაში მთავარი ნიუანსი სწორედ რთული პროცენტია, რომელიც არა უბრალოდ თანხის დაგროვების, არამედ გამდიდრების რეალურ შანსს იძლევა. საფონდო ბირჟის ყოველწლიური საშუალო 10%-იანი ამონაგები, შესაძლოა, ერთი შეხედვით დიდ რიცხვად არ მოგეჩვენოთ, თუმცა დროსთან ერთად მას ნამდვილად შეუძლია სიმდიდრის შექმნა.
უნდა აღინიშნოს, რომ 10%-იანი ამონაგები ყოველწლიურად გარანტირებული არ არის. ეს S&P 500 ინდექსის ისტორიული საშუალო მაჩვენებელია, რომელიც ზოგად ტენდენციაზე მიუთითებს. მაგალითად: მკაცრი მონეტარული პოლიტიკისა და რეცესიული რისკების პერიოდში საფონდო ინდექსები ეცემა; ეკონომიკური ბუმისა და შემცირებული განაკვეთების პერიოდში კი – საფონდო ბირჟაზე აღმასვლის ტენდენცია ფიქსირდება. როდის იქნება რეცესია და როდის ბუმი, ამის წინასწარ განსაზღვრა შეუძლებელია, თუმცა გრძელვადიანი ინვესტირების სტრატეგია რისკების დაზღვევის საშუალებას იძლევა, რადგან ყოველთვიურად ინვესტირების შემთხვევაში, ფასიანი ქაღალდების შეძენას საშუალო ფასად შეძლებთ.
გრძელვადიანი ინვესტირების სტრატეგია ბაზრის მერყეობასთან დაკავშირებული რისკების შემცირების საუკეთესო გზაა, ისევე როგორც ქონების დაგროვების.
გაცნობებთ, რომ მობილბანკში ინვესტირების დასაწყებად განსაკუთრებული შეთავაზება გელოდებათ: 31 ოქტომბრამდე შესაძლებლობა გაქვთ, სრულიად უფასოდ ისარგებლოთ საქართველოს ბანკის მიერ შექმნილი საინვესტიციო მოდულით. ამ პერიოდის განმავლობაში არ მოგიწევთ არც ვაჭრობის საკომისიოს და არც საინვესტიციო ანგარიშის მომსახურების ყოველთვიური საკომისიოს გადახდა. გაიგეთ მეტი აქ.