როგორ გამოიყურება კეტრინ ვუდის საინვესტიციო პორტფელი

საინვესტიციო სამყარო არაერთ ცნობილ პიროვნებას აერთიანებს, მათ შორის ერთ-ერთი განსაკუთრებით გამორჩეული კეტრინ ვუდია, რომელსაც ხშირად „უოლ-სტრიტის დედოფლის“ სახელით მოიხსენიებენ. ვუდის წარმატება მის მიერ დაფუძნებულ ფონდს, ARK Invest-ს უკავშირდება, რომელიც უნიკალური საინვესტიციო სტრატეგიით და არატრადიციული მიდგომებით გამოირჩევა.

ARK Invest-ის პორტფელი ინოვაციურ, მაღალტექნოლოგიურ და ისეთ კომპანიებს აერთიანებს, რომლებიც არ ერიდებიან ექსპერიმენტებს. ვუდის საინვესტიციო ფილოსოფია სწორედ ინოვაციურობაზე დგას – ის ფულს დებს მხოლოდ ისეთ იდეებში, რომელთაც სწრაფად მასშტაბირება და მსოფლიოს შეცვლა შეუძლიათ, სხვა შემთხვევაში, იდეა ARK Invest-ისთვის საინტერესო არ არის.

ხელოვნური ინტელექტი, რობოტები, დრონები, ელექტრომობილები, თვითმართვადი მანქანები, გენური ინჟინერია, ფარმაკოლოგია, ბიოტექოლოგია და ფინანსები – ეს იმ სფეროების ჩამონათვალია, რომელზედაც ვუდის საინვესტიციო ფონდი კონცენტრირდება.

მორიგი უნიკალურობა, რომელიც ARK Invest-ს გამოარჩევს, დივერსიფიკაციის დაბალ მაჩვენებელს უკავშირდება. საქმე ისაა, რომ უოლ-სტრიტზე წარმოდგენილი საინვესტიციო ფონდების უმეტესობა შედარებით მრავალფეროვანი და დივერსიფიცირებული პორტფელის შექმნას ცდილობს, რომელიც უამრავ სფეროს და აქტივის კატეგორიას აერთიანებს, ARK Invest-ის შემთხვევაში კი, პორტფელი უაღრესად კონცენტრირებულია და ის, უმეტესწილად, ამერიკულ ტექნოლოგიურ კომპანიებზეა მორგებული.

დაბალ დივერსიფიკაციას, როგორც წესი, თან ახლავს მაღალი რისკი და ამ კანონზომიერებას თავს ვერ კეტრინ ვუდი აღწევს. მხოლოდ ტექნოლოგიურ სექტორზე კონცენტრაცია საბაზრო რისკს მნიშვნელოვნად ზრდის, რაც ARK Invest-ის პორტფელის მერყეობაზე ნეგატიურად აისახება. საქმე ისაა, რომ ინოვაციური სტარტაპი ვერასოდეს იქნება ისეთი სტაბილური, როგორიც, მაგალითად, Coca-Cola ან JPMorgan Chase-ია, რაც იმ მარტივი მოცემულობით არის განპირობებული, რომ ARK Invest-ის პორტფელში შემავალი კომპანიების დიდი ნაწილი ჯერ მოგებაზეც კი არ არის გასული, ანუ ის ინვესტიციას სტარტაპის განვითარების ადრეულ ეტაპზე ახორციელებს.

ასეთი მაღალი რისკი, ცხადია, მაღალ პოტენციურ ამონაგებთან არის დაკავშირებული, რადგან ზემოხსენებული Coca-Cola-ს აქციების ღირებულება ვერასოდეს გაიზრდება ისე მკვეთრად, როგორც ეს ბიოტექნოლოგიურ სტარტაპს შეუძლია.

ფაქტია, რომ პოტენციურ ამონაგებსა და სტაბილურობას შორის კეტრინ ვუდი არჩევანს სწორედ მეტ სარგებელზე აკეთებს, რაც, თავის მხრივ, მეტ რისკთან ასოცირდება. 

ერთი შეხედვით, ARK Invest-ის სტრატეგია არაფრითაა გამორჩეული, რადგან ტექნოლოგიურ სექტორში არაერთი საერთაშორისო ფონდი ინვესტირებს, თუმცა აქ გასათვალისწინებელია ის გარემოება, რომ ARK Invest-ის გუნდი სპეციფიკური ინდუსტრიების საუკეთესო მკვლევრებს და ანალიტიკოსებს აერთიანებს, რომელთა წყალობით, ვუდის საინვესტიციო ფონდი სტაბილურად ახერხებს კონკურენტებზე უკეთესი შედეგების ჩვენებას.

ARK-ის ერთ-ერთი საუკეთესო საინვესტიციო გადაწყვეტილება კომპანია Tesla-ს უკავშირდებოდა, რომელმაც საინვესტიციო ფონდს უდიდესი წარმატება მოუტანა. უნდა აღინიშნოს, რომ ელექტრომობილების მწარმოებელი ამერიკული კომპანია დღემდე რჩება ARK Invest-ის უდიდეს აქტივად, რომელზედაც პორტფელის თითქმის 10% მოდის.

ARK Invest-ის რჩეულ კომპანიებს შორის მეორე ადგილს ამერიკული კრიპტობირჟა Coinbase-ი იკავებს, რომლის აქციების მოცულობა პორტფელის 7.3%-ს შეადგენს.

ვუდის საყვარელ კომპანიებს შორის აგრეთვე ვხედავთ სატელევიზიო პლატფორმა Roku-ს, რომელსაც პორტფელის 7.1% უჭირავს.

გარდა ამისა, ARK Invest-ის საინვესტიციო აქტივების ჩამონათვალში შემდეგი კომპანიების აქციებს შეხვდებით: Square, Roblox, CRISPR Therapeutics, UiPath, Shopify, Palantir Tech და Twist Bioscience.  

საქართველოს ბანკის მობილბანკის მეშვეობით, შესაძლებლობა გაქვთ, შეიძინოთ როგორც ზემოხსენებული კომპანიების აქციები, ასევე ARK Invest-ის მიერ შედგენილი ETF-ები, რომლებიც კონკრეტულ სექტორზე კონცენტრირებულ კომპანიებს აერთიანებენ.

არ გაჩერდე, გააგრძელე კითხვა