გლობალური ეკონომიკური ზრდის პარალელურად, მსოფლიოს მასშტაბით ყოველწლიურად იზრდება ტურისტული ვიზიტების რაოდენობა. UNWTO-ს ინფორმაციით, საზღვარგარეთ ყოველწლიურად საშუალოდ 1.5 მილიარდი ადამიანი მოგზაურობს, ადგილობრივი ვიზიტების ჩათვლით კი ეს მაჩვენებელი თითქმის 3 მილიარდს აღწევს, რაც იმას ნიშნავს, რომ დასვენებისთვის მოქალაქეები ყველაზე ხშირად ტურისტულ აქტივობებს მიმართავენ.
ანალიტიკოსების პროგნოზით, მომდევნო წლების განმავლობაში საერთაშორისო ტურისტების რაოდენობა 2 მილიარდს მიაღწევს, ადგილობრივი ვიზიტების ჩათვლით კი მოგზაურთა საერთო რაოდენობა 4 მილიარდს გაუტოლდება.
ტურისტების უმრავლესობა უცხო ქვეყანაში ჩასვლისას სტუმარ-მასპინძლობის სექტორში წარმოდგენილი კომპანიების სერვისებით, მათ შორის, სასტუმროებით, რესტორნებითა და გასართობი ცენტრებით სარგებლობს. მართალია, საოჯახო სასტუმროებსა და Airbnb-ის მსგავს სერვისებზე მოთხოვნა საკმაოდ მაღალია, თუმცა ტურისტების უდიდესი ნაწილი ყველაზე ხშირად ტრადიციული სასტუმროების მომსახურებით სარგებლობს, რადგან ადამიანები კომფორტსა და უსაფრთხოებას უდიდეს მნიშვნელობას ანიჭებენ, განსაკუთრებით კი მაშინ, როდესაც ისინი უცხო ქვეყანაში არიან და თან განტვირთვას ცდილობენ.
მაღალი მოთხოვნის ფონზე, სასტუმროები ყოველწლიურად დაახლოებით 500 მილიარდი დოლარის შემოსავლების გენერირებას ახერხებენ, ეს მაჩვენებელი კი ყოველწლიურად თითქმის 9%-ით იზრდება.
უნდა აღინიშნოს, რომ ეკონომიკური ბუმის პერიოდში ტურისტული აქტივობების რაოდენობა და სასტუმროების შემოსავლების განსაკუთრებით იზრდება, რაც იმ ფაქტითაა განპირობებული, რომ მოქალაქეებს დასვენებისათვის მეტი ფინანსური რესურსების გამოყოფა შეუძლიათ. თუმცა რეცესიულ პერიოდში ვითარება იცვლება და სასტუმროების შემოსავლები ეცემა, რაც ინდუსტრიას განსაკუთრებით დამოკიდებულს ხდის გლობალურ მაკროეკონომიკურ და გეოპოლიტიკურ მდგომარეობაზე. ასევე გასათვალისწინებელია ის ფაქტიც, რომ ტურიზმი სეზონური ბიზნესია და სასტუმროები ყველაზე მეტ შემოსავალს ზაფხულისა და ზამთრის პერიოდში იღებენ, მაშინ როცა მსოფლიოს მასშტაბით ტურისტული აქტივობები იზრდება.
სექტორში არაერთი მსხვილი მოთამაშეა წარმოდგენილი, თუმცა მათ შორის ყველაზე ცნობილი და გამორჩეული Marriott International-ია, რომელიც საფონდო ბირჟაზე 65 მილიარდ დოლარადაა შეფასებული. კომპანია მსოფლიოს მასშტაბით 8,700-მდე პრემიუმ-კლასის სასტუმროს აერთიანებს, რაც მას ინდუსტრიის უმსხვილეს მოთამაშედ აქცევს. 2023 წელი Marriott-ისთვის განსაკუთრებით კარგი აღმოჩნდა და მისი აქციების ღირებულება ბირჟაზე დაახლოებით 50%-ით გაიზარდა.
ამერიკულ ბაზარზე რიგით მეორე უმსხვილესი მოთამაშე Hilton-ია, რომელიც მსოფლიოს 121 სახელმწიფოში 7,100-მდე სასტუმროს ფლობს. კომპანიის საბაზრო შეფასება $46 მილიარდს შეადგენს და ის ზრდის დინამიკით გამოირჩევა, რადგან მისმა აქციების ღირებულებამ წელს 43%-ით მოიმატა.
სასტუმროების ინდუსტრიის გიგანტების ტრიადას Las Vegas Sands-ით ვასრულებთ, რომელიც მსოფლიოს მასშტაბით თემატურ სასტუმროებს, სამორინეებსა და გასართობ ცენტრებს ფლობს. კომპანია ბირჟაზე 37 მილიარდ დოლარადაა შეფასებული და მის საკუთრებაში არაერთი ექსტრავაგანტური კომპლექსი შედის, რომელიც დამსვენებლებს მთელი მსოფლიოდან იზიდავს.
სექტორში სხვა მსხვილი კომპანიებიც არიან წარმოდგენილნი და თან მათი საქმიანობის პროფილიც ერთმანეთისგან განსხვავებულია, ზოგიერთი მათგანი პრემიუმ-სეგმენტზეა გათვლილი, ზოგი ბიუჯეტურ სასტუმროებს ქმნის, რამდენიმე კომპანია კი უფრო მეტად გართობაზეა კონცენტრირებული, ვიდრე დასვენებაზე, როგორც, მაგალითად, Las Vegas Sands-ია. სასტუმროების ჩამონათვალში ასევე შეხვდებით შემდეგ კომპანიებს: Oriental Land, Galaxy Entertainment, MGM Resorts, InterContinental Hotels Group, Host Hotels, Hyatt Hotels, Vail Resorts და Wyndham Hotels.
შესაძლოა, არჩევანის ასეთი მრავალფეროვნება დამაბნევლად მოგეჩვენოთ, ამიტომაც, სასტუმროების სექტორით დაინტერესების შემთხვევაში, შეგიძლიათ არჩევანი სასტუმროების ინდუსტრიულ ფონზე, Leisure and Entertainment ETF (PEJ)-ზე შეაჩეროთ, რომელიც მობილბანკშია ხელმისაწვდომი და ის სტუმარ-მასპინძლობის სექტორში წარმოდგენილ ორგანიზაციებთან ერთად, ზემოხსენებულ კომპანიებსაც აერთიანებს.