რატომ უნდა დაფიქრდე საბანკო-საფინანსო სექტორში ინვესტირებაზე

ცხოვრებაში, ალბათ, ერთხელ მაინც გსმენიათ გამოთქმა, რომ მსოფლიოში საუკეთესო ბიზნესი ბანკია. მართალია, ეს ზედმეტად გადაჭარბებული შეფასებაა, თუმცა ამ დებულებაში ნამდვილად არის სიმართლის მარცვალი.

გლობალურ ეკონომიკურ სისტემაში ბანკები განსაკუთრებულ როლს ასრულებენ. მათი დანიშნულება დოვლათის შექმნის ხელშეწყობაა, გამდიდრებისაკენ სწრაფვა კი ადამიანის ფუნდამენტური მიზანია, რომელიც მომდევნო საუკუნეების განმავლობაშიც უცვლელად დარჩება. გამართული ბანკი ნამდვილად შეიძლება ჩაითვალოს ერთ-ერთ ყველაზე სტაბილურ ბიზნესად, რადგან იმ სერვისებზე მოთხოვნა ყოველთვის იქნება და ისიც მუდმივად შეძლებს შემოსავლების გენერირებას. 

მოგეხსენებათ, ბანკები დახმარებას უწევენ როგორც ფიზიკურ პირებს, ასევე კომპანიებს, ორგანიზაციებს, საერთაშორისო ჰოლდინგებსა და მთავრობებს. საბანკო სერვისების გარეშე თანამედროვე ფინანსური სისტემა უბრალოდ შეწყვეტს ფუნქციონირებას, მსოფლიოს მასშტაბით არსებული მილიონობით კომპანიიდან კი მხოლოდ რამდენიმე მათგანი შეძლებს ბანკების დახმარების გარეშე გადარჩენას.

შეიძლება ითქვას, რომ ბანკი მსოფლიოში ყველაზე მნიშვნელოვანი ბიზნესია, რომელიც უშუალოდაა ჩართული ფაქტობრივად ნებისმიერი სახის პროდუქტისა თუ სერვისის შექმნაში.

ცხადია, ასეთ გავლენასა და პასუხისმგებლობას თან ახლავს ფინანსური სარგებელიც და სწორედ ეს არის ბანკის შექმნის მთავარი მამოტივირებელი ფაქტორი. მსოფლიოს მასშტაბით მილიონამდე დიდი და მცირე ზომის ბანკი ოპერირებს, მათ შორის ყველაზე მაღალშემოსავლიანები კი ამერიკის შეერთებულ შტატებში არიან ბაზირებულნი.

უკვე წლებია, საერთაშორისო საბანკო რეიტინგის სათავეში JPMorgan Chase-ია, რომელიც საფონდო ბირჟაზე 442 მილიარდ დოლარადაა შეფასებული, აღნიშნული ბანკი დაახლოებით 4 ტრილიონი დოლარის აქტივებს აკონტროლებს და მას წლების განმავლობაში არა თუ ფიზიკური პირები და კომპანიები, არამედ სახელმწიფოების მთავრობებიც კი გადაურჩენია გაკოტრებისგან. JPM-ს კოლოსალური გავლენა აქვს გლობალურ საფინანსო სისტემაზე და შეიძლება ითქვას, რომ ის უოლ-სტრიტის უპირობო ლიდერია. ბანკი ყოველწლიურად დაახლოებით $50 მილიარდის მოგების გენერირებას ახერხებს, ეს თანხა კი დივიდენდის სახით ინვესტორებზე ნაწილდება, რომელთა შორის შეგიძლიათ თქვენც იყოთ.

დივიდენდური შემოსავლის მიღების გარდა, თქვენ საშუალება გაქვთ, კაპიტალზე მოგებაც მიიღოთ, რაც იმას ნიშნავს, რომ საფონდო ბირჟაზე JPMorgan-ის აქციების ზრდა თქვენი საინვესტიციო პორტფელის ღირებულებაზე პოზიტიურად აისახება. JPM-ისა თუ სხვა ნებისმიერი საბანკო-საფინანსო ორგანიზაციის აქციების შეძენა საქართველოს ბანკის მობილბანკში მარტივად შეგიძლიათ. BOG-ის საინვესტიციო პლატფორმა სხვა მსხვილი ამერიკული ბანკების აქციების შეძენის საშუალებასაც გაძლევთ, მათ შორისაა: Bank of America, Wells Fargo, Morgan Stanley, Goldman Sachs, Charles Schwab და Citigroup.

თუკი კონკრეტული კომპანიის შერჩევა გიჭრით და გინდათ თქვენი ინვესტიცია მთლიან საბანკო სექტორზე გადაანაწილოთ, მაშინ შეგიძლიათ SPDR S&P Bank ETF (KBE) შეიძინოთ, რომელიც 80 უმსხვილეს ბანკს აერთიანებს.    

უნდა აღინიშნოს, რომ თანამედროვე საფინანსო სისტემაში მხოლოდ ბანკები არ მონაწილეობენ და არანაკლებ საპასუხისმგებლო მისია აკისრიათ ტრანზაქციების გამტარებელ ორგანიზაციებს, მათ შორის, Visa-ს, Mastercard-სა და American Express-ს, რომელთაც ინვესტორები უდიდეს მნიშვნელობას ანიჭებენ, ამას კი ის ფაქტი ცხადყოფს, რომ Visa-ს მსოფლიოს უმსხვილეს ბანკზე, JPMorgan-ზე უფრო მაღალი საბაზრო კაპიტალიზაცია აქვს და ის საფონდო ბირჟაზე $512 მილიარდადაა შეფასებული. Mastercard-ის კაპიტალიზაცია $375 მილიარდია; AMEX-ს კი ინვესტორები $118 მილიარდად აფასებენ.

თუკი ბანკის არა, მაგრამო საფინანსო-საინვესტიციო ჰოლდინგის აქციების შეძენა გსურთ, მაშინ შეგიძლიათ არჩევანი ლეგენდარული უორენ ბაფეტის Berkshire Hathaway-ზე შეაჩეროთ, რომლის აქციების ღირებულება ბოლო 5 წელიწადში 75%-ითაა გაზრდილი, კომპანიის საბაზრო კაპიტალიზაცია კი $780 მილიარდს აღწევს.

ბოლოს კი აუცილებლად უნდა ვთქვათ, რომ გამოცდილი ინვესტორები საბანკო-საფინანსო სექტორში წარმოდგენილი კომპანიების აქციების ინტეგრაციას დაბალანსებული საინვესტიციო პორტფელის შექმნისთვის აუცილებელ წინაპირობად ასახელებენ, რაც იმ მარტივი ფაქტითაა განპირობებული, რომ ბანკი მართლაც კარგი ბიზნესია. 

არ გაჩერდე, გააგრძელე კითხვა