რატომ შეიძლება იყოს სამედიცინო-ფარმაცევტულ სექტორში ინვესტირება მომგებიანი

მსოფლიოს მასშტაბით მოსახლეობის რაოდენობა ყოველწლიურად იზრდება, გაეროს პროგნოზით, 2030 წლისთვის პლანეტაზე მცხოვრებთა რაოდენობა 8.5 მილიარდს გადააჭარბებს. რაოდენობის ზრდის პარალელურად, იმატებს მოსახლეობის საშუალო ასაკიც და ხანდაზმულთა რაოდენობა, რაც საცხოვრებელი პირობების გაუმჯობესებით და მედიცინის განვითარებითაა განპირობებული.

მოსახლეობის რაოდენობისა და მათი საშუალო ასაკის ზრდა იმაზე მიუთითებს, რომ მსოფლიოს მასშტაბით მედიკამენტებზე, სამედიცინო სერვისებზე, ვაქცინებსა და პრეპარატებზე მოთხოვნა გაიზრდება, რადგან ხანდაზმულებს თითქმის ხუთჯერ მეტი სამედიცინო პრეპარატი სჭირდებათ, ვიდრე ახალგაზრდებს. არსებული ვითარება გვაძლევს იმის ვარაუდის საშუალებას, რომ სამედიცინო-ფარმაცევტულ კომპანიებს მომავალში მეტი შემოსავლის მიღება შეეძლებათ, რაც ამ სექტორს საინვესტიციოდ განსაკუთრებით მიმზიდველს ხდის.

ამ მიმართულებით რამდენიმე მსხვილი ფარმაცევტული კომპანია ლიდერობს, მათ შორისაა: Eli Lilly, Novo Nordisk, Johnson & Johnson, Merck, AbbVie, Rosche, AstraZeneca, Novartis, Pfizer და Amgen.

უნდა აღინიშნოს, რომ სამედიცინო სექტორში წარმოდგენილი კომპანიები ინოვაციურობის განსაკუთრებით მაღალი მაჩვენებლით გამოირჩევიან და ისინი აქტიურად მუშაობენ ექსპერიმენტული მედიკამენტების შექმნაზე. მაგალითად, 2020 წელს ფაქტობრივად ყველა ფარმაცევტული კომპანიის ფოკუსში კორონავირუსი იყო და სწორედ ამის გამო, რეკორდულ დროში შექმნილი ვაქცინები და პრეპარატები ვიხილეთ, რამაც მილიონობით ადამიანის სიცოცხლის გადარჩენა გახადა შესაძლებელი.

მართალია, პანდემია დასრულდა, თუმცა ბიოტექნოლოგიურ კომპანიებს ახალი პროდუქტების შექმნაზე მუშაობა არ შეუწყვეტიათ. მაგალითად, მიმდინარე 2023 წელი თამამად შეიძლება ჩაითვალოს წონაში კლების მედიკამენტების ეპოქად, რაც Novo Nordisk-ის მიერ Wegovy-ის წარდგენასთანაა დაკავშირებული. სწორედ Wegovy-სა და Ozempic-ის წყალობით, წელს Novo Nordisk-ის საბაზრო კაპიტალიზაციამ $453 მილიარდს მიაღწია და ის ევროპის მასშტაბით უმსხვილეს კომპანიად იქცა, რომელმაც დანია რეცესიიდან გამოყვანა.

ცოტა ხნის წინ, წონაში კლების მედიკამენტების ბაზარზე ამერიკული გიგანტი, Eli Lilly-იც შევიდა, რომელმაც აშშ-ის მარეგულირებელი ორგანოსგან პრეპარატ Zepbound-თან დაკავშირებით ავტორიზაცია მიიღო. კლინიკური კვლევებიდან ჩანს, Eli Lilly-ს პრეპარატი უფრო ეფექტიანია, ვიდრე Novo Nordisk-ის მიერ შექმნილი Wegovy და თან მისი კურსი თითქმის 200 დოლარით უფრო იაფი ღირს. ამ ახალი პრეპარატის წარდგენის ფონზე, Eli Lilly-ს აქციების ღირებულება 62%-ით გაიზარდა და მისმა კაპიტალიზაციამ $562 მილიარდს მიაღწია. ამ მაჩვენებლით ის მსოფლიოს უმსხვილესი კომპანიების ათეულში შევიდა, ტექნოლოგიური გიგანტების (Apple, Microsoft, Google, Amazon) გვერდით.     

უნდა აღინიშნოს, რომ ჯანდაცვის სექტორი მხოლოდ ფარმაკოლოგიურ კომპანიებს არ მოიცავს, აქ უხვად არიან წარმოდგენილნი სამედიცინო დაწესებულებები, სადაზღვევო კომპანიები, კვლევითი ლაბორატორიები და ჰოსპიტლები, მათ შორისაა: UnitedHealth, Elevance Health, CVS Health, HCA და Siemens Healthineers.

გამოცდილი ინვესტორები ჯანდაცვის სექტორზე განსაკუთრებით დიდ აქცენტს აკეთებენ, რაც იმ ფაქტითაა განპირობებული, რომ ამ ინდუსტრიაში წარმოდგენილ კომპანიებს სტაბილურობასა და ინოვაციურობას შორის ოქროს შუალედი აქვთ დაცული. უფრო მარტივად რომ ვთქვათ, მაგალითად, Johnson & Johnson-ის პროდუქციას მთელი მსოფლიოს მასშტაბით მილიონობით მომხმარებელი ყოველდღიურად მოიხმარს, რაც კომპანიას სტაბილური შემოსავლის მიღების საშუალებას აძლევს. მიუხედავად ამისა, J&J-ის კვლევითი დეპარტამენტი უწყვეტ რეჟიმში მუშაობს ახალი და ინოვაციური პრეპარატების შექმნაზე. როგორ ცნობილია, ახლა კომპანიის ფოკუსში წონაში კლების პრეპარატის შექმნაა და თუ ეს პროექტი წარმატებული იქნება, მაშინ Eli Lilly-სა და Novo Nordisk-ის მსგავს წარმატებას, სავარაუდოდ, J&J-ის ინვესტორებიც გაიზიარებენ.

თუკი სამედიცინო-ფარმაცევტული სექტორი ზედმეტად რთულად გეჩვენებათ და არ იცით, თუ რომელ კომპანიებზე შეაჩეროთ არჩევანი, მაშინ შეგიძლიათ საქართველოს ბანკის საინვესტიციო მოდულში SPDR S&P Pharmaceuticals ETF (XPH) ან iShares US Healthcare ETF (IYH) აირჩიოთ, რაც სექტორში წარმოდგენილ 100-მდე კომპანიაში ინვესტირების საშუალებას მოგცემთ.  

ეს არ არის ფინანსური რჩევა.

არ გაჩერდე, გააგრძელე კითხვა