Spotlight Tech 2024 ტექნოლოგიებით დაინტერესებულ ადამიანებს ახალი თემით — “გაკვეთილებით” უბრუნდება. ღონისძიება, რომლის მთავარი წარმდგენი წელს საქართველოს ბანკია, 1-2 ივნისს Raddison Blu Iveria-ში ჩატარდება. Spotlight Tech 2024-ის სტუმრები 50-მდე სპიკერს მოუსმენენ, რომლებიც ტექნოლოგიების განვითარების გზაზე მათთვის ყველაზე მნიშვნელოვან გაკვეთილებსა და ისტორიებს გაგვიზიარებენ. Spotlight Tech 2024-ის მოწვეულ სპიკერებს შორის ერთ-ერთი Forum.ge-ს დამფუძნებელი თემურ ხაინდრავაა.
Forum.ge-ს ისტორია ქართული ინტერნეტის განვითარებასთან ერთად იწყება. სწორედ Forum.ge იყო პირველი ქართული ინტერნეტ ფორუმი, სადაც მომხმარებლებს მათთვის საინტერესო თემებზე მსჯელობა და იდეების გაცვლა კომფორტულ გარემოში შეეძლოთ. როგორც თემურ ხაინდრავა გიყვება, თავიდან Forum.ge ერთ-ერთი ინტერნეტ პროვაიდერის თანამშრომელთა საკომუნიკაციოდ შეიქმნა, თუმცა ამ ფარგლებს მალევე გასცდა.
“ფორუმის შექმნის იდეა გაჩნდა მაშინ, როცა ქართული ინტერნეტი ჯერ კიდევ განვითარების საწყის ეტაპზე იყო. მაშინ ინტერნეტთან წვდომა ძვირი ღირდა, Dial-UP-ით საათი დაახლოებით 1 ლარი. გარდა ამისა, არ არსებობდა ისეთი ვებგვერდი, სადაც შესაძლებელი იქნებოდა სხვადასხვა თემისა და საკითხების განხილვა გარდა უცხოური რესურსების და ერთი-ორი განვითარების ეტაპზე მყოფი საიტისა. სულ თავიდან ფორუმი შევქმენი ჩემი თანამშრომლებისთვის, როცა ერთ-ერთ პატარა ინტერნეტ პროვაიდერში ვმუშაობდი, მაგრამ სულ მალე ის გასცდა ჩვენს კოლექტივს და ფორუმის მომხმარებლების რაოდენობა ყოველდღე მატულობდა. ერთ მომენტში მომხმარებლების რაოდენობამ მიაღწია ე.წ. კრიტიკულ ზღვარს, რის შემდეგ ფორუმის ზრდის პროცესი შეუქცევადი გახდა”, — ამბობს თემურ ხაინდრავა.
Forum.ge-ს წარმატების მიღწევაში ის უპირატესობები დაეხმარა, რომელსაც ქართული ინტერნეტის განვითარების საწყის ეტაპებზე პლატფორმა ფლობდა. იმის მიუხედავად, რომ დღეს ინტერნეტი სადისკუსიოდ არაერთ ვებგვერდს გვთავაზობს, Forum.ge კვლავ რჩება იმ ადგილად, სადაც ფორუმის წევრებს მათთვის საინტერესო საკითხების განხილვა ნაცნობ სივრცეში შეუძლიათ.
“მაშინ ფორუმი იყო მოსახერხებელი იმ თვალსაზრისით, რომ ინტერნეტს ზომიერად ხარჯავდა, შეგეძლო დილით დაგესვა შენთვის საინტერესო კითხვა და რამდენიმე საათში მიიღებდი პასუხს, ინტერნეტში dial-up-ით მორიგი შემოსვლის დროს. ჩემი აზრით, ფორუმმა წარმატებას იმიტომ მიაღწია, რომ კარგად იყო შერჩეული ძირითადი განყოფილებები და კვალიფიციური და მოტივირებული მოდერების დახმარებით, ფორუმზე იყო შექმნილი მეგობრული, სასიამოვნო სიტუაცია პრობლემების მოგვარებისა ან მომხმარებლებს შორის ურთიერთობებისათვის. ფორუმის მომხმარებლებს ახლაც სასიამოვნო და მეგობრული სიტუაცია დახვდებათ, სადაც მათ შეუძლიათ განიხილონ სხვადასხვა საკითხი პოლიტიკიდან დაწყებული, კულტურითა და ტექნოლოგიებით დამთავრებული. ასევე, მომხმარებლებს ფორუმის დისკუსიებში ანონიმურობის დაცვით შეუძლიათ ჩაერთონ”, — აღნიშნავს თემურ ხაინდრავა.
Spotlight Tech 2024-ზე თემურ ხაინდრავა სწორედ Forum.ge-ს — საქართველოში ერთ- ერთ უმსხვილეს ინტერნეტ ფორუმს და მასთან დაკავშირებულ საკითხებს განიხილავს. Spotlight Tech 2024-ის სტუმრებს კი შესაძლებლობა ექნებათ, Forum.ge-ს დამფუძნებლის გამოცდილება გაიზიარონ და ასევე შეხვდნენ ტექ.სფეროს სხვა წარმომადგენლებს, რაც ნეთვორქინგის გაფართოებაში დაეხმარებათ.
“ტექნოლოგიების განვითარების გზაზე ჩემთვის ერთ-ერთი მნიშვნელოვანი გაკვეთილი იყო ის, რომ სასურველია არჩევანი გააკეთო ე.წ. ღია კოდის (open source) მქონე კომპონენტებსა და პროდუქტებზე, რომლებსაც შენს პროექტებში იყენებ. სამომავლოდ სწორედ ასე შეგეძლება მათი მხარდაჭერა და სასურველი მოდიფიკაციების შეტანას”, — დასძინა თემურ ხაინდრავამ.
საქართველოს ბანკი უკვე 10 წელზე მეტია, რაც Spotlight-ს მხარს უჭერს, წელს კი Spotlight Tech 2024-ის მთავარი წარმდგენი და გენერალური სპონსორია. თემურ ხაინდრავას თქმით კი, ფინანსური ინსტიტუტი Forum-ge-ს განვითარებაშიც აქტიურად იყო ჩართული.
“მე ვფიქრობ, რომ საქართველოს ბანკი, როგორც ერთ-ერთი მოწინავე ბანკი, დაინტერესებულია საქართველოში ტექნოლოგიების განვითარებით და ამ ღონისძიებაში ჩართულობით ამას ხელს უწყობს. მე პირადად, წლების განმავლობაში ვთანამშრომლობდი საქართველოს ბანკთან ჩემი პროექტით და პირადი გამოცდილებიდან გამომდინარე შემიძლია ამის თქმა. საქართველოს ბანკმა ფორუმს მნიშვნელოვანი დახმარება აღმოუჩინა განვითარების გარკვეულ ეტაპზე, რისთვისაც დღესაც მადლობელი ვარ”, — ამბობს თემურ ხაინდრავა.
Spotlight Tech 2024-ის ფორმატისა და სპიკერების შესახებ სრულ ინფორმაციას აქ შეგიძლიათ გაეცნოთ, უფრო ვრცლად კი გაეცანით ჩვენს ბლოგს.