საქართველოს ბანკის მხარდაჭერით 29 ივნისს 500 Georgia-ს მე-4 ნაკადის დემო დღე გაიმართა, სადაც ტექნოლოგიური სტარტაპების დამფუძნებლებმა დაინტერესებულ საზოგადოებას თავიანთი ინოვაციური პროდუქტები წარუდგინეს. მათ შორის ერთ-ერთი იყო Fortu Wealth.
Fortu Wealth საინვესტიციო საკონსულტაციო სერვისია, რომელიც აერთიანებს ფინანსურ სერვისებს შეძლებული კლიენტების საჭიროებების დასაკმაყოფილებლად.
აზამატ სულთანოვმა დემო დღეზე თავისი გამოსვლა კონკრეტული მაგალითით გახსნა – მან ისაუბრა ანტრეპრენერზე, რომელსაც თავისი დანაზოგის დაბანდება ინვესტირების გზით განიზრახა, თუმცა საამისოდ მას არც ფინანსური განათლება და არც საინვესტიციო შესაძლებლობები ჰქონდა.
სწორედ ამგვარი პრობლემის მოსაგვარებლად შექმნა აზამატმა თავის თანამოაზრესთან ერთად Fortu Wealth – ფინტექ აპლიკაცია, რომელიც არც თუ ისე გამოცდილ ინვესტორებს საშუალებას აძლევს, მართონ თავიანთი ფინანსები ინტუიციური, მომხმარებლისთვის მოსახერხებელი პლატფორმით.
როგორც აზამატმა განაცხადა, სტარტაპის პილოტ ვერსია წარმატებულად ჩაეშვა დიდ ბრიტანეთში და დამფუძნებლებს სურთ, რომ ეს პროდუქტი სხვა ბაზრებზეც დაინერგოს. სწორედ ამიტომ Fortu Wealth ცოტა ხნის წინ გახდა CBH ბანკის პარტნიორი, რომელიც სტარტაპის პროდუქტს თავის მომხმარებლებამდე მიიტანს.
„ჩვენ ვახდენთ ინვესტიციების ტრანსფორმაციას განვითარებად ბაზრებზე,“ – აზამატ სულთანოვი.