საერთაშორისო გამოცემა Global Finance-ის ორგანიზებით, 2 ოქტომბერს ლონდონში გაიმართა ყოველწლიური დაჯილდოება Global Finance’s 2024 World’s Best Digital Bank Awards Ceremony. ესაა მსოფლიოსა და რეგიონში საუკეთესო სამომხმარებლო თუ კორპორაციული ციფრული ბანკების გამოვლინების ღონისძიება, რომელიც უკვე 25-ე წელია, იმართება და წლიდან წლამდე იზრდება მისი პრესტიჟი და მნიშვნელობა.
ინფორმაციისთვის, Global Finance 1987 წელს დაარსდა, 160 ქვეყანაში ოპერირებს და ათწლეულების განმავლობაში ფინანსურ სამყაროში სანდოობის სტანდარტად იქცა.
სწორედ ამ დონისა და მნიშვნელობის ღონისძიებაზე საქართველოს ბანკი მსოფლიოში საუკეთესო ციფრულ ბანკად დასახელდა. ჟიურიმ გამარჯვებულის გამოვლენის პროცესში რამდენიმე კრიტერიუმით იხელმძღვანელა:
- ციფრული მომხმარებლების მოზიდვისა და მომსახურების სტრატეგიის სიძლიერე;
- ციფრული შეთავაზებების მრავალფეროვნებისა და მოხმარების მაჩვენებელი;
- ციფრული მომხმარებლების რაოდენობის ზრდა და მათი კმაყოფილება;
- მომხმარებელზე ორიენტირებული მიდგომები;
- ციფრული ბანკის ფუნქციურობა.
ამ და სხვა მნიშვნელოვანი გარემოებების გათვალისწინებით, საქართველოს ბანკი გამოარჩიეს როგორც მსოფლიოში, ისე ცენტრალურ და აღმოსავლეთ ევროპაში, გადასცეს კიდეც ძალიან პრესტიჟული ჯილდო და, რაც მთავარია, სტატუსი – საუკეთესო სამომხმარებლო ციფრული ბანკი.
ფინტექის მიმართულებით ციფრული ტექნოლოგიების მუდმივი განვითარება და კიბერუსაფრთხოების მნიშვნელობის ზრდა სრულად ცვლის ციფრული საბანკო სერვისების მიმართულებას. Global Finance-ის საუკეთესო ციფრული ბანკის ჯილდო კი იმ ფინანსური ინსტიტუტების აღიარებას ემსახურება, რომლებიც ფინტექის სფეროში ახალ სტანდარტებს ქმნიან, – აღნიშნავს ჯოზეფ ჯიარაპუტო, Global Finance-ის დამფუძნებელი და სარედაქციო დირექტორი.
გამოსარჩევია საქართველოს ბანკის მიერ განხორციელებული რამდენიმე პროექტი, რომლებმაც განსაკუთრებით შეუწყო ხელი ამ საერთაშორისო აღიარებას:
Business Manager – პლატფორმა, რომელიც ბიზნესებს შესაძლებლობას აძლევს, განვითარებისთვის საჭირო ტექნოლოგიური პროდუქტები [გადახდების მენეჯერი, API მენეჯერი და Ads მენეჯერი] საერთო სივრციდან მართოს;
გემიფიკაცია – თამაში, რომელშიც 500 000-ზე მეტმა მომხმარებელმა მიიღო მონაწილეობა.
ასევე წარმატებულ და აღიარებულ პროექტად ითვლება ინვესტიციები – პროდუქტი, რომელიც მომხმარებელს მსოფლიოს ორ ყველაზე დიდ და პოპულარულ საფონდო ბირჟაზე [ნიუ იორკისა და ნასდაქის] ათასობით სხვადასხვა კომპანიისა თუ ფონდის აქციებში ინვესტირების შესაძლებლობას აძლევს.
Global Finance-ის აღიარება და საქართველოს ბანკის საუკეთესოდ დასახელება ისეთ ბანკებს შორის, როგორიც არის Citi, DBS, Bank of America, თუ სხვა, დიდი მიღწევაა, რომელიც გვაძლევს მოტივაციას, არ გავჩერდეთ. მინდა, მადლობა გადავუხადო ჩვენი გუნდის თითოეულ წევრს ამ პროცესში შეტანილი წვლილისათვის. ჩვენ ერთად ვქმნით საუკეთესო ციფრულ ბანკს მსოფლიოში! – აღნიშნავს ლევან გომშიაშვილი, მარკეტინგის, ციფრული საბანკო მომსახურებისა და მომხმარებელთა გამოცდილების მართვის მიმართულების ხელმძღვანელი.
აღსანიშნავია ისიც, რომ საერთაშორისო გამოცემამ საქართველოს ბანკი გამარჯვებულად სულ 9 ნომინაციაში დაასახელა. მნიშვნელოვანია საერთაშორისო დონეზე აღიარება და უდიდესი შრომის დაფასება, თუმცა წარმატებული კომპანიისთვის ეს მხოლოდ და მხოლოდ ახალი მოტივაციაა! წინაა კიდევ ბევრი ახალი პროექტი და აღიარება, რადგანაც არგაჩერება და საუკეთესოს ლოდინია წარმატების მთავარი ფორმულა!