თუ შვებულება არც ისე ახლოსაა და ვერც შაბათ-კვირას ახერხებ ქალაქიდან გასვლას, საუკეთესო გამოსავალი დროის აუზზე გატარებაა. გასაგრილებლად და გასაცურად არაერთი საათით ბათუმამდე მგზავრობა არ არის საჭირო, არც რუჯის მისაღებადაა სოლარიუმში წასვლა რეკომენდებული – გაგრილებაც და რუჯის მიღებაც ისე შეგიძლია, რომ არც ნახევარი დღის გატარება მოგიწევს მანქანაში და არც ჯანმრთელობისთვის საშიში პროცედურის მიღება.
სუფთა და მოწესრიგებული გარემო, კარგი აუზი, სასიამოვნო მუსიკა, მრავალფეროვანი სამზარეულო, გემრიელი სასმელები და სხვადასხვა აქტივობა – ეს ის კრიტერიუმებია, რასაც აუზის არჩევისას დიდ მნიშვნელობას ანიჭებენ. ჩვენ დრო დაგიზოგეთ და ამ კრიტერიუმების გათვალისწინებით თბილისში მდებარე სამი აუზი მოვიძიეთ, სადაც ცურვისა და რუჯის მიღების გარდა სხვა შენთვის საინტერესო გასართობებიც დაგხვდება.
ვაკის საცურაო აუზი, რომელიც 1965 წლიდან არსებობს და ცურვის მოყვარულების ერთ-ერთ საყვარელ ადგილად ითვლება, იმითაა გამორჩეული, რომ აუზის გარდა მომხმარებლებს ველნეს სპას, გამაჯანსაღებელ ზონასა და სპორტულ და ფიტნეს დარბაზებს სთავაზობს. ობიექტზე არსებული ოლიმპიური სტანდარტის აუზის სიგრძე 50 მეტრია, სიგანე – 22 მეტრი, მინიმალური სიღრმე – 1,70 მეტრი, ხოლო მაქსიმალური სიღრმე – 7,20 მეტრია. თუ პროფესიონალი მოცურავე ხარ, ეს ადგილი შენთვის იდეალური ვარიანტია, ხოლო თუ ცურვა არ იცი, ვაკის საცურაო აუზი ცურვის შესასწავლად ტრენერის ინდივიდუალურ მომსახურებას გთავაზობს. ცურვის გაკვეთილები ტარდება ბავშვებისთვისაც.
„ჩვენ ყველაფერი გვაქვს“ – სპორტკომპლექს ნეპტუნში 2 საცურაო აუზის გარდა სპორტული და ფიტნეს დარბაზები, საუნა, ორთქლის ოთახი, აკვა ფიტნესი, მასაჟის კაბინეტი და კაფე დაგხვდება. წვეულებების მოყვარულებისთვის ხშირად იმართება მუსიკალური ღონისძიებები, სადაც დროის სასიამოვნოდ გატარება, ცურვა და რუჯის მიღება მუსიკის ფონზე, სასიამოვნო გარემოში შეგიძლია. თუ დღის გატარებას აუზზე ფიქრობ, მაგრამ ბავშვს ვერსად ტოვებ, ნეპტუნში პატარასთან ერთად მისვლაც შეგიძლია – მეტიც, აქ ცურვის სკოლაცაა, სადაც როგორც უფროსებს, ისე ბავშვებს ცურვას ასწავლიან.
ღია საცურაო აუზი, სავარჯიშო დარბაზი, ბავშვების სათამაშო მოედანი, ბარი სახურავზე, კაფე ტბასთან, რესტორანი, ულამაზესი ბაღი და ტერასა – კრწანისის რეზიდენციის აუზი, ამ ყველაფერთან ერთად, მუსიკალური დღეებითაა გამორჩეული. ყოველ შაბათ-კვირას სტუმრების განწყობაზე მუსიკალური ჯგუფები ზრუნავენ. კრწანისის რეზიდენციის აუზის სიგრძე 21 მეტრი, სიგანე კი 7 მეტრია, ამიტომ, თუ ცურვა გიყვარს, ამ ადგილს აუცილებლად უნდა ესტუმრო. აუზზე ბავშვის წაყვანა და დროის მასთან ერთად გატარებაც შეგიძლია – ობიექტი საოჯახო პაკეტს გთავაზობს. თუ შენთვის გემრიელი და მრავალფეროვანი სამზარეულო პრიორიტეტია, კრწანისის რეზიდენციის აუზზე კონსტანტინე თედელურის საავტორო მენიუ დაგხვდება.
ისღა დაგრჩენია, პრიორიტეტების მიხედვით რომელიმე ობიექტი შეარჩიო და ცხელი დღეები სასიამოვნოდ გაატარო. შეგიძლია, სამივე ობიექტს ესტუმრო, რადგან ივლისის ბოლომდე სპეციალური შეთავაზებით ისარგებლებ – თუ საქართველოს ბანკის Mastercard ბარათით გადაიხდი, თანხის 30%-ს, მაქსიმუმ 50 ლარს შენს ანგარიშზე დაიბრუნებ.