ქართველი ჯუდოკების წარმატება ავსტრიის გრან-პრიზე – ტურნირის მიმოხილვა

ორი ოქრო და ერთი ვერცხლი!

7 მარტს ავსტრიაში ჯუდოს გრან პრიმ აიღო სტარტი და სამი დღე გაგრძელდა. ქართველი ჯუდოკებისთვის განსაკუთრებით წარმატებული აღმოჩნდა ტურნირის მესამე დღე – საერთო ჯამში ქართველებმა 2 ოქროსა და 1 ვერცხლის მოპოვება მოახერხეს:

🥇გურამ თუშიშვილი (+100 კგ.) – ოქრო

🥇გიორგი ჯაბნიაშვილი (90 კგ.) – ოქრო

🥈ტატო გრიგალაშვილი (90 კგ.) – ვერცხლი

ზაფხულის ოლიმპიურ თამაშებზე ტედი რინერთან ცნობილი ინციდენტის შემდეგ დისკვალიფიკაციიდან ტატამზე დაბრუნდა მსოფლიო ჩემპიონი და ოლიმპიური თამაშების ვიცე ჩემპიონი – გურამ თუშიშვილი და პირველივე შეჯიბრზე მოახერხა ოქროს მედლის მოპოვება.

მძიმე წონოსანმა ჯუდოკამ ავსტრიის სახელით მოასპარეზე მოვლი ბორჩაშვილი, კვიპროსელი იანის ანტონიუ და ნახევარფინალში უკრაინელი იევჰენი ბალიევსკი სულ რაღაც 5 წამში დაამარცხა. ფინალში გურამი კარგად ნაცნობ მეტოქეს, ჩეხ ლუკაშ კრპალეკს შეხვდა და დაამარცხა კიდეც. ტურნირს მოწყურებულ ქართველ ჯუდოკას ეტყობოდა დასვენება, კარგი სპორტული ფორმა და რაც ყველაზე მთავარია მონდომება – საკმაო პაუზისა და დაბრუნების შემდეგ ძალიან სწრაფად მოეგო ტურნირი და ოქროს მედალი.

რაც შეეხება 90 კილოგრამ წონით კატეგორიას, უნდა შემდგარიყო ქართული ფინალი – გიორგი ჯაბნიაშვილსა და ტატო გრიგალაშვილს შორის, თუმცა ტატომ ტრავმის გამო ვერ იჭიდავა ფინალი და ოქროს მედალიც ავტომატურად გიორგის დარჩა.

მსოფლიოს სამ გზის ჩემპიონმა, ტატო გრიგალაშვილმა ფრანგი ტეო ერბიე, იაპონელი ჰიდეტოში ტოკუმოჩი, ავსტრიელი თომას შარფეტერი და სერბი მილიან რადული დაამარცხა. გიორგიმ კი სერბი ისლამ სოგენოვი, უკრაინელი სტანისლავ გუნჩენკო, იაპონელი რიკუ ოკადა და ბრაზილიელი მარსელო ფრონცკოვიაკი დაამარცხა. მართალია, ქართული ფინალი არ შედგა, თუმცა ამ კონკრეტულ წონაში ქართველი ჯუდოკების უპირატესობა კიდევ ერთ გრან პრიზე გამყარდა. უნდა ითქვას ისიც, რომ ტატო გრიგალაშვილმა იმავე წონაში ორი კვირის წინ ევროპის ღია პირველობაზე მოახერხა პირველი ადგილის დაკავება. სიმბოლურია, რომ ავსტრიის გრან პრიზე ოქროს მედალი ახალგაზრდა (21 წლის) და ძალიან ნიჭიერ ქართველ ჯუდოკას, გიორგი ჯაბნიაშვილს ერგო. დიდი მოლოდინები და საერთო განწყობა, რომ ქართული ჯუდო და ქართველი ჯუდოკები ყველა ტურნირზე უმაღლესი სინჯის მედლებისთვის უნდა იბრძოდნენ, რჩება უცვლელი! საქართველოს ოლიმპიური ნაკრების მთავარი სპონსორია საქართველოს ბანკი. საუკეთესო წინ არის!