5 ნაბიჯი Miami Ad School EU-ში ნიკა გუჯეჯიანის სახელობის სტიპენდიის მოსაპოვებლად

უკვე 5 წელია საქართველოს ბანკი და MASE კრეატიული ინდუსტრიით დაინტერესებულ ახალგაზრდებს შესაძლებლობას აძლევს, მოიპოვონ ნიკა გუჯეჯიანის სახელობის სტიპენდია ბერლინში, Miami Ad School Europe-ში. სტიპენდია Art Direction-ის ან Copywriting-ის ორწლიანი პროგრამის 100%-იან დაფინანსებას გულისხმობს.

ნიკა გუჯეჯიანის სახელობის სასტიპენდიო პროგრამაზე მიღება უკვე დაიწყო და ის 12 მაისს დასრულდება. აპლიკაციების შესახებ დეტალური ინფორმაციის მისაღებად ეწვიე ვებგვერდს.

თუ კონკურსში მონაწილეობას გადაწყვეტ, გაეცანი 5 მარტივ ეტაპს, რომლებიც სტიპენდიის მოპოვებაში დაგეხმარება.

1. პირველ რიგში, Miami Ad School Europe-ის ვებგვერდზე გაეცანი Art Direction-ისა და Copywriting-ის მიმართულებების შესახებ ვრცელ ინფორმაციას. ასე, ზუსტად გეცოდინება, თუ რას გთავაზობს თითოეული მიმართულება და რას მოითხოვს სკოლა შენგან, როგორც მომავალი სტუდენტისგან.
2. მოამზადე პორტფოლიო, რომლითაც კონკურსის ჟიურის თავს გააცნობ და შენს შესაძლებლობებს აჩვენებ. გახსოვდეს, რომ პორტფოლიო სტიპენდიატების შერჩევისას ერთ-ერთი მთავარი კრიტერიუმია, ამიტომ ეცადე, ისეთი ნამუშევრები გაგზავნო, რომლებიც შენს იდეებსა და კრეატიულობას მაქსიმალურად გამოხატავს.
3. შექმენი მოკლე СV, რომელშიც შენი განათლებისა და სამუშაო გამოცდილების შესახებ მთავარ ასპექტებზე გაამახვილებ ყურადღებას. მნიშვნელოვანია, რომ შენი ცოდნიდან და გამოცდილებიდან გამომდინარე ჩანდეს, თუ რატომ შეარჩიე Miami Ad School Europe-ში კონკრეტული მიმართულება, ამიტომ სწორი აქცენტები უნდა გააკეთო.
4. პორტფოლიო და СV ბმულის სახით უნდა გაგზავნო შემდეგ მეილზე: info@miamiadschool.de, Subject-ში კი nika2024 უნდა მიუთითო. გაითვალისწინე, რომ პორტფოლიო და СV ბმულის სახით უნდა გაიგზავნოს და არა მიმაგრებული ფაილების სახით. მეილის გაგზავნის შემდეგ უკვე პასუხს უნდა დაელოდო.
5. დადებითი პასუხის მიღების შემთხვევაში Miami Ad School Europe-ის მმართველ დირექტორ საბინ გეორგთან და ჟიურის სხვა წევრებთან გასაუბრებისთვის უნდა მოემზადო. ინტერვიუს ეტაპზე 3 კანდიდატიდან 1-ს შეარჩევენ, ამიტომ საკუთარი თავის წარდგენა კონკურსის ყველაზე მნიშვნელოვანი ეტაპია.

საქართველოს ბანკის მხარდაჭერით, 4 სტუდენტი Miami Ad School Europe-ში უკვე სრული დაფინანსებით სწავლობს. შემდეგი სტიპენდიატი კი, რომელიც Miami Ad School Europe-ში 2024 წლის ოქტომბრიდან სრული დაფინანსებით ისწავლის, შენ შეიძლება გახდე.

გახსოვდეს, რომ მსოფლიოს წამყვან კრეატიულ სკოლაში სწავლის შესაძლებლობასთან ერთად, ნიკა გუჯეჯიანის სტიპენდიის მოპოვება პირველი ნაბიჯია, რათა მსოფლიოს წამყვან კომპანიებშიც დასაქმდე.

2024 წლის ნიკა გუჯეჯიანის სასტიპენდიო კონკურსში განაცხადების მიღება 12 მაისამდე გაგრძელდება, სტიპენდიატის ვინაობა კი ივნისის დასაწყისში გახდება ცნობილი.