ქართული ნაციონალური ბალეტის, სუხიშვილების საშემოდგომო ტური დაიწყო – ევროპის ქვეყნებსა და ქალაქებში 70 მოცეკვავე და ორკესტრი გაემგზავრა. საფრანგეთი, პოლონეთი, ჩეხეთი, ბელგია, გერმანია, ავსტრია, შვეიცარია, იტალია და თურქეთი – ესაა სწორედ იმ ქვეყნების ჩამონათვალი, რომელთა ქალაქებშიც თანამედროვე ქართული კულტურის გამორჩეულად მნიშვნელოვანი ფენომენის, ქართული ცეკვის სანახავად მივლენ ადგილობრივი სტუმრები.
ტური 12 ოქტომბერს ტრიუმფალურად გაიხსნა და დაიწყო საფრანგეთის დედაქალაქ პარიზიდან, იმავე წარმატებით გაგრძელდა ბელგიის ქალაქ ჰასელტშიც და მოგზაურობა დღემდე გრძელდება. საშემოდგომო ტურის ბოლო ქალაქი 9 და 10 დეკემბერს მეზობელი თურქეთის სტამბოლი იქნება.
ევროპული ტურის 70 მოცეკვავეში ერთ-ერთია ლაშა ქოქაშვილი, რომელიც ამ დატვირთული ორ თვეზე გადანაწილებული გასტროლების შესახებ გვიყვება – ფიზიკური და ფსიქოლოგიური მზაობა, ამბები, ადამიანები და ემოციები უშუალოდ მოცეკვავის მზერითა და გამოცდილებით – მოცეკვავე ლაშა ქოქაშვილის ევროპული ტურის დღიური:
„მოგესალმებით ანსამბლ სუხიშვილების შესანიშნავი გრძელვადიანი ევრო-ტურიდან. როდესაც მშობლებს ვთხოვე, რომ ცეკვაზე ვეტარებინე, სულ რაღაც 5 წლის ვიყავი და მათაც დაუყოვნებლივ შემისრულეს სურვილი. პირველივე რეპეტიციაზე ქართული ცეკვის ცოცხალმა მუსიკალურმა გაფორმებამ თუ ილეთების ნაირსახეობამ ჩემზე დიდი შთაბეჭდილება მოახდინა.
რამდენიმე წელიწადში, როცა უკვე ქართული ხალხური ცეკვის შესწავლის საწყისი ეტაპი გადავლახე, შევიგრძენი პირადი შრომის ნაყოფიც. ეს იყო რაღაც უცნაური და საიდუმლოებით მოცული შეგრძნება. ძველებურ შავ-თეთრ ეკრანზე ვიხილე ანსამბლ სუხიშვილების გასაოცარი და სულში ჩამწვდომი სანახაობა, რომელსაც დიდებული ადამიანები პირადად მე გადმომცემდნენ და მიხსნიდნენ, თუ როგორ შეიძლება თავი იგრძნო თავისუფალ ადამიანად. ეს კადრები ჩემთვის იმდენად ემოციური აღმოჩნდა, რომ ჩემი ცხოვრების სამომავლო გეგმები მეტად ნათელი და მყარი გახადა, რომ გავმხდარიყავი საოცრების – „სუხიშვილების“ პატარა ნაწილი. ახლა კი აქ ვარ ამ შესანიშნავ ოჯახთან ერთად ევრო-ტურში.
ევრო-ტურში ანსამბლთან ერთად მოგზაურობა ჩემთვის ორმაგად საპასუხისმგებლოა, ვგრძნობ უდიდეს პასუხისმგებლობას, რათა სათანადოდ და ღირსეულად წარმოვადგინო როგორც სუხიშვილების ტექნიკური, არტისტული, ინტელექტუალური თუ ფიზიკური მონაცემები, ასევე ჩემი ქვეყნის შეუფასებელი კულტურული მემკვიდრეობა, როგორც რიგითმა ჯარისკაცმა.
ჩვენი საგასტროლო რეჟიმი ძალიან დატვირთული და დამღლელია, რადგანაც რთული რეჟიმით ვცხოვრობთ – ერთბაშად ბევრ ნიუანსზე ფიქრი გვიწევს. აუცილებელია, დავიცვათ სწორი კვების რაციონი, ძილის რეჟიმი, რათა ვიყოთ როგორც ფიზიკურად, ასევე ფსიქოლოგიურად ჯანმრთელად. არსებობს უამრავი დეტალი, რის ჩამოთვლასაც არ დავიწყებ, რაზეც გვიწევს უარის თქმა, რათა ჩვენი პასუხისმგებლობა, როგორც უკვე აღვნიშნე, ერისა თუ პირადი ცხოვრებისეული მიზნის წინაშე პირნათლად ერთიანად შევასრულოთ. რაც მთავარი და მნიშვნელოვანია, ვაკეთებ იმას, რაც მინდოდა, რომ მეკეთებინა.
როდესაც მოსაღამოვდება და მოახლოვდება კონცერტისთვის სამზადისი პროცედურები, ყველანაირი დაღლილობა და საფიქრალი დავიწყებას მიეცემა ხოლმე და იგრძნობა კვლავ ზღაპრულად განუმეორებელი თავისუფლების განცდა სიამოვნების თანხლებით.
კონცერტის შესრულების ხარისხს რაც შეეხება, ყოველთვის მაქსიმალურად ვცდილობთ, იყოს წინანდელ შესრულებულ კონცერტზე უკეთესი, რათა არ შევწყვიტოთ განვითარება. ზოგჯერ რთულია ამისი გაანალიზება კონცერტამდე დამღლელი გზის გავლის შემდეგ, როდესაც ორგანიზმი კოლაფსურ და მიძინებულ მდგომარეობაშია. რა თქმა უნდა, ეს ფიქრები ამაოა, რადგან ანსამბლში ვერ მოხვდები ისე, თუ არ შეგიძლია ბრძოლა განვითარებისთვის.
საბოლოო ჯამში ვიღებთ იმ ძვირფას ემოციებსა და ნეტარებას, რომელსაც მაყურებელი გადმოგვცემს თავისი მხურვალე აპლოდისმენტებით, გახარებული და ბედნიერი სახეებით, ადამიანური ღიად დაღლილობისგან განთავისუფლებული ოვაციებით, განკურნებული გულებით. ამის შემდეგ ვერასოდეს იფიქრებ, რომ რამე დაგღლის ან დაგასუსტებს, რადგან სიყვარულს უდიდესი ძალა და შეგრძნება აქვს – გადმოცემა უცხო ქვეყნის საერთაშორისო აუდიტორიისაგან, ჩვენი სამშობლოს მონატრებულ ემიგრანტებთან ერთად უდიდეს სიამოვნებას გვანიჭებს, რაც უკეთესი და ჯანსაღი მომავლის იმედს მისახავს.“
ევროპული ტურის დასრულებისთანავე, დეკემბრის ბოლოს (22, 23, 24 და 25 დეკემბერს) სუხიშვილები ამჯერად სამშობლოში ქართველი მაყურებლის წინაშე წარდგება კლასიკური თუ ახალი ქორეოგრაფიული კომპოზიციებით.