ერთწლიანი პაუზის შემდეგ წელს სუხიშვილები ისევ დაბრუნდნენ თაკარაზე ნანატრი კონცერტების სერიით, რომელსაც SOLO და Mastercard წარმოგიდგენთ. თაკარა ღია სცენაა, სადაც სუხიშვილები ბოლო რამდენიმე წელია, განახლებულ ქორეოგრაფიულ დადგმებს წარმოგვიდგენენ. თავიდან ღია სივრცის იდეა პანდემიის გამო გაჩნდა და თაკარას განახლებას საქართველოს ბანკმა დაუჭირა მხარი, შემდეგ კი ეს სცენა ექსპერიმენტული დადგმების ინსპირაციის წყაროდ იქცა. დღეს თაკარა მაყურებელსაც მასპინძლობს და ქართული კულტურითა და ტრადიციით დაინტერესებულებს ანსამბლი ყოველთვის სიახლეებით ხვდება.
ღია სცენა თაკარა განსხვავებული გამოცდილებაა როგორც მაყურებლისთვის, ასევე მოცეკვავეებისთვისაც: თავისუფალი გარემო ცეკვებზეც ახდენს გავლენას. სუხიშვილების მოცეკვავე ნუკრი ბოდოკია აღნიშნავს, რომ თითოეული კონცერტი ინდივიდუალურია და თითქოს, ერთი დასამახსოვრებელი კადრია, რომელიც მხოლოდ იმ დღეს, იმ მომენტში და იმ კონკრეტულ მაყურებელთან რჩება. ეს გასაკვირი სულაც არ არის, რადგან სუხიშვილების დადგმებში იმპროვიზაციას საკმაოდ დიდი როლი აქვს, რაც მოცეკვავეს მეტ თავისუფლებას აძლევს, ხოლო მაყურებელს თითოეულ ჯერზე განსხვავებულ სამყაროში ამოგზაურებს.
თაკარა არა მხოლოდ მაყურებლისთვის, არამედ მოცეკვავეებისთვისაც განსაკუთრებულ ადგილად იქცა, რომელსაც ხშირად მეორე სახლსაც უწოდებენ. რაც შეეხება რეპეტიციებსა და კონცერტებს, მოცეკვავე ანა მაისურაძე ამ პროცესს ასე აღწერს: “ცეკვის შესრულების დროს ვერც კი ვგრძნობ, რომ სცენაზე ვდგავარ ან ვინმე მიყურებს, ვარ მხოლოდ ჩემთვის და ჩემს სამყაროში”.
თაკარას სცენაზე სუხიშვილების ანსამბლის წლევანდელი საზაფხულო პროგრამა 6 აგვისტომდე გაგრძელდება. სწორედ ამ სცენაზე ნახულობს მაყურებელი სუხიშვილების ახალ ცეკვებს, რომლებსაც მოგვიანებით თეატრის სცენაზეც დგამენ. ამ წელს საზაფხულო პროგრამის ფარგლებში ხორუმის, სვანურისა და მთიულურის ახალი ვერსიები პირველად თაკარას სცენაზე შესრულდება. გარდა ამისა, მაყურებელი შარშანდელი სეზონიდან იმ კომპოზიციებს იხილავს, რომლებმაც დიდი მოწონება დაიმსახურა. ასე რომ, ქართული ცეკვების მოყვარულებს თაკარას სცენა იმედებს ნამდვილად არ გაუცრუებს.