როგორ იქცა თამარ დე ლეტე-ვაჩნაძის ნამუშევრები SOLO-ს ჯადოსნურ ვიტრინებად

SOLO-ს ვიტრინები, რომლებიც ხშირად იცვლება და სხვადასხვა თემატიკის მიხედვით ფორმდება, ახალი წლის მოახლოებასთან ერთად ტრადიციულად განახლდა. ამჯერად SOLO-ს საახალწლო ვიტრინები თამარ დე ლეტე-ვაჩნაძის ვიზუალებითაა გაფორმებული, რაც გასაკვირი არ არის, რადგან 2023 წელს საქართველომ ამ მხატვრის შემოქმედება ხელახლა აღმოაჩინა. საქართველოს ბანკისა და SOLO-ს სპონსორობით კი ახლახან ეროვნულ გალერეაში თამარ დე ლეტევაჩნაძის პირველი მასშტაბური გამოფენა გაიმართა.

თამარ დე ლეტე-ვაჩნაძე მე-20 საუკუნის მოდისა და თეატრის ინდუსტრიაში საკმაოდ მნიშვნელოვანი დიზაინერი იყო, რომელიც ესკიზებს კრისტიან დიორისთვისაც კი ქმნიდა. ასევე, თამარ დე-ლეტე-ვაჩნაძე თეატრისა და ოპერის დადგმებსაც აფორმებდა, მისი კოსტიუმები კი მაყურებლისთვის სპექტაკლებს დაუვიწყარს ხდიდა. SOLO-ს ვიტრინებიდან ახლა სწორედ თამარ დე ლეტე-ვაჩნაძის ესკიზები, ფიგურები და ვიზუალები გვიმზერენ, რომლებიც Tricolor Studio-სთან თანამშრომლობით შეიქმნა.

“ზოგადად, SOLO-ს ვიტრინები ჩვენთვის ძალიან საყვარელი და მნიშვნელოვანი პროექტია. ცხადია, ყველა თემა თავისებურად საინტერესოა და ესეც თავისებურად განსაკუთრებული იყო, რადგან თამარ დე ლეტე-ვაჩნაძე ძალიან კარგი მხატვარია, რომელიც აქამდე არც ისე ცნობილი იყო. ახლა კი გამოფენა, ალბომი და უკვე SOLO-ს ვიტრინები თამარ დე ლეტე-ვაჩნაძის ცნობადობას გაზრდის”, — ამბობს ნინო კალანდაძე, Tricolor Studio-ს თანადამფუძნებელი.

Tricolor Studio-ს SOLO-ს ვიტრინების დიზაინზე არაერთხელ უმუშავია. თამარ დე ლეტევაჩნაძის ვიზუალები იმითაა გამორჩეული, რომ საახალწლო განწყობასთან ერთად ფიგურები მოძრავია, რისი ნახვაც SOLO-ს ჭავჭავაძის, ყაზბეგისა და ბათუმის ფილიალებშია შესაძლებელი. ასეთი შედეგის მისაღებად კი, მუშაობის პროცესში თითოეული დეტალი დიდი ყურადღებით შეირჩა.

“მუშაობის პროცესში პირველი ის იყო, რომ შევარჩიეთ ნამუშევრები, რომლებიდანაც ვეცადეთ, რომ საახალწლო დეტალების მქონე ვიზუალები ამოგვერჩია, რადგან ვიტრინები თემატურად ახალი წლისთვის კეთდებოდა. ზოგი ნამუშევრიდან ამოვიღეთ ფონი, ზოგი ნამუშევრიდან კი მოცეკვავე ფიგურები, ნაძვის ხის სათამაშოების დეტალები და ა.შ. ბოლოს კი შევკარით კოლაჟი, რომლითაც უკვე საახალწლო განწყობა შევქმენით. ანუ თითოეული ნამუშევრიდან რაღაცა დეტალი გვაქვს აღებული და მერე არის კოლაჟებად შეკრული “, — ამბობს ნინო კალანდაძე.

SOLO-ს ვიტრინების ნახვისას ყველა დარწმუნდება, რომ თამარ დე ლეტე-ვაჩნაძის ესთეტიკა და კომპოზიციები მაქსიმალურად შენარჩუნებულია. გარდა ამისა, ვიზუალების თითოეული დეტალი ისეა დამუშავებული, რომ ორიგინალ ვერსიასთან მაქსიმალურად არის მიახლოებული.

“ნახატების შესაქმნელად შესაბამისი მასალები გამოვიყენეთ, რათა მხატვრის ნამუშევრების ესთეტიკა არ დაგვერღვია. გამოვიყენეთ მუყაო, ქაღალდი, ტექსტილი და ასევე ბევრი დეტალი საღებავებით დავამუშავეთ, რათა ვიზუალები გაცოცხლებულ ნახატს დამსგავსებოდა. თავისთავად ვიტრინის დანიშნულება ის არის, რომ მაყურებელი მიიზიდოს, ქუჩიდან შიგნით შეიყვანოს ან ვიტრინა დაათვალიერებინოს და იმედია, ამ შედეგს მივაღწიეთ. SOLO-ს ვიტრინები თამარ დე ლეტე-ვაჩნაძის ცნობადობას გაზრდის და გამვლელებს საახალწლო განწყობასაც შეუქმნის”, — დასძინა ნინო კალანდაძემ.

საქართველოს ბანკისა და SOLO-ს მხარდაჭერით, ეროვნულ გალერეაში თამარ დე ლეტე-ვაჩნაძის ნამუშევრები 19 ნოემბრიდან 16 დეკემბრის ჩათვლით იყო გამოფენილი. გამოფენაზე მისულებს თამარ დე ლეტე-ვაჩნაძის მიერ შესრულებული თეატრისა და წიგნის მხატვრობა, გრაფიკა, კოლაჟები და აპლიკაციები, ესკიზები და საბავშვო მარიონეტები შეეძლოთ ახლოს ენახათ და დაეთვალიერებინათ. საახალწლოდ კი თამარ დე ლეტე-ვაჩნაძის შემოქმედების ნაწილის ახლოს ნახვას SOLO-ს ვიტრინებიდანაც შეძლებთ.

არ გაჩერდე, გააგრძელე კითხვა