რა უნდა იცოდეთ, თუ ინდოეთში მოგზაურობა გინდათ

უძველესი ტრადიციები, ეგზოტიკური ბუნება, მრავალფეროვანი კულტურა, გამორჩეული არქიტექტურა და სხვა მახასიათებლები ინდოეთს ბევრი მოგზაურისთვის საოცნებო დანიშნულების ადგილად აქცევს. თუმცა ამ გამორჩეულ ქვეყანაში მოგზაურობა სათანადო მომზადებას მოითხოვს, განსაკუთრებით იმ შემთხვევაში, თუ პირველად მიდიხართ. იმისათვის, რომ თქვენი მოგზაურობა უფრო სასიამოვნო და კომფორტული იყოს, ინდოეთის შესახებ ქართველი მოგზაურის, სერგი ტკაჩუკის, რჩევებს გიზიარებთ. სერგი ახლახან დაბრუნდა ანდამანის და ნიკობარის კუნძულების ექსპედიციიდან, რომელიც SOLO-ს მხარდაჭერით მოეწყო. შთაბეჭდილებებით სავსე ექსპედიციასა და პირად გამოცდილებაზე დაყრდნობით, მოგზაური ყველაზე მნიშვნელოვან კითხვებზე გვპასუხობს:

“ინდოეთი კულტურულად და ტრადიციულად საკმაოდ განსხვავებული და ამავდროულად, მსოფლიოში ყველაზე ხალხმრავალი ქვეყანაა. ასე რომ, ინდოეთთან პირველი შეხება, დიდი ალბათობით, კულტურული შოკის მომტანი შეიძლება გახდეს, რაც ჩემი აზრით, საინტერესოცაა, მოგზაურობის ხიბლიც ხომ ეს არის.

თუ ინდოეთში მოგზაურობას პირველად აპირებთ, გამოვყოფდი ყველაზე მნიშვნელოვან საკითხებს: დროულად და სწორად შეავსეთ ონლაინ ვიზა, გაიკეთეთ ტეტანუსის და დიფთერიის აცრა, არ დაგავიწყდეთ სამოგზაურო დაზღვევის დამზადება და წინასწარ დაჯავშნეთ სასტუმროები. როდესაც უკვე ინდოეთში აღმოჩნდებით, მაქსიმალური ყურადღება მიაქციეთ იმ საკვებისა და წყლის ხარისხს, რომელსაც მოიხმართ. ასევე, გირჩევთ, ადგილობრივი სიმ ბარათი აიღოთ, რომ კავშირზე იყოთ” — ამბობს სერგი.

გამომდინარე იქიდან, რომ ინდოეთი კულტურულად და გეოგრაფიულად მრავალფეროვანი ქვეყანაა, ადგილების შერჩევა დიდწილად თქვენს გემოვნებაზეა დამოკიდებული. მოსანახულებელი რეგიონი თუ ქალაქი თქვენს ინტერესებს უნდა დაუკავშიროთ, თუმცა დარწმუნებული იყავით, რომ ეს შთამბეჭდავი ქვეყანა თქვენს გაოცებას ნებისმიერ შემთხვევაში შეძლებს. აუცილებლად სანახავ ადგილებთან დაკავშირებით კი სერგის რჩევები ასეთია:  “თუკი ისტორიით და არქიტექტურით ხართ გატაცებული, რაჯასტანის რეგიონი არ უნდა გამოტოვოთ. სპირიტული გამოცდილებისთვის ვარანასის უძველესი ქალაქი შეგიძლიათ მოინახულოთ. ჰიმალაების და ტიბეტის პლატოს სანახავად ჰიმაჩალის და ლადახის რეგიონებს გირჩევთ. სანაპიროების მხრივ კი, საუკეთესოა გოა კერალა ან ანდამანის კუნძულები, სადაც სიმშვიდესა და საოცარ პეიზაჟებს ნამდვილად იპოვით”.

ინდოეთი კულინარიული ტრადიციების მრავალფეროვნებითა და მდიდრული არომატებით გამოირჩევა, რაც მოგზაურებსაც იზიდავს. როგორც სერგი აღნიშნავს, ინდური სამზარეულო განსაკუთრებით გემრიელია, თუმცა ე.წ. სტრიტ ფუდისგან თავის შეკავებას გვირჩევს. მისივე თქმით, ნებისმიერი კერძის დაგემოვნება საშუალო ან მაღალი დონის რესტორნებშიცაა შესაძლებელი. “ჩემი საყვარელი კერძია Tanduri Chicken. ქათამი მთელი ღამის განმავლობაში იოგურტში და სანელებლებში მარინადდება, შემდეგ კი თიხის ღუმელში (ტანდურში) მზადდება. ასევე, აუცილებლად უნდა გასინჯოთ Samosa და Puri, რომელიც რაც უნდა უცნაური იყოს, ინდურადაც პურის ერთ-ერთი სახეობაა”, — ამბობს სერგი.

“ინდოეთში ბუნების სილამაზით ჩემთვის ყველაზე შთამბეჭდავი ნუბრას ხეობაა, რომელიც 4000 მეტრის სიმაღლეზე, ლადახის რეგიონში, მდებარეობს. ტიბეტის პლატოს ამ საოცარი მასშტაბის და სილამაზის მქონე ადგილმა შეუძლებელია გაწბილებული დაგტოვოთ. ასევე, აუცილებლად გამოვყოფდი ჩვენს ახალ აღმოჩენას — კუნძულ მცირე ანდამანის ველურ, უკაცრიელ და ჯუნგლებში ჩაფლულ სანაპიროებს, პლანეტაზე ასეთი ადგილები ნამდვილად ცოტაა”, — აღნიშნავს სერგი ტკაჩუკი.

გეოგრაფიული მდებარეობის გამო, ინდოეთში მოგზაურობის დაგეგმვისას სეზონიც აუცილებლად უნდა გაითვალისწინოთ. სერგის თქმით, ინდოეთის მოსანახულებლად საუკეთესო პერიოდი ზამთრის სეზონია, რომელიც ქვეყანაში, როგორც წესი, ნოემბრიდან თებერვლამდე გრძელდება. ამ პერიოდში სასიამოვნო ტემპერატურა და შედარებით გრილი ამინდია, რაც ქვეყნის მრავალფეროვანი ლანდშაფტებისა და კულტურული ღირსშესანიშნაობების შესწავლისთვის იდეალურ გარემოს ქმნის.

“ამ თვეებში ჩრდილოეთ დაბლობები და უდაბნოს რეგიონები, როგორებიცაა რაჯასტანი და დელი, კომფორტულ ტემპერატურას გვთავაზობს, ხოლო სამხრეთის რეგიონებში, როგორებიცაა კერალა და გოა, ზღვისპირა დასვენებისთვის იდეალური ამინდია. გარდა ამისა, ამ პერიოდში იმართება უამრავი ფესტივალი, მათ შორის, დივალი, რაც მოგზაურობას კულტურულად უფრო მრავალფეროვანს ხდის. გირჩევთ, რომ ცენტრალურ და სამხრეთ ინდოეთში მოგზაურობას ზაფხულის თვეებში მოერიდოთ, რადგანაც ამ პერიოდში ჰაერის ტემპერატურა 40 გრადუსს ცდება და გადაადგილება არცთუ ისე მარტივია. თუმცა თუკი ტიბეტის პლატოზე მიდიხართ, ზაფხულის პერიოდი ჰიმალაების აღმოსაჩენად კარგი პერიოდია”, — დასძინა სერგიმ.

“ადგილობრივებთან ურთიერთობისას გირჩევთ, რომ თავმდაბლობა და უბრალოება გამოიჩინოთ. ინდოელები ერთმანეთს ნამასტეთი ესალმებიან, რაც ხშირად შეგიძლიათ გამოიყენოთ. ასევე, მნიშვნელოვანია პატივისცემით და გაგებით მოეკიდოთ ინდურ წეს-ჩვეულებებსა და მათ ადათ-წესებს. მაგალითად, სალოცავში საჭიროა ფეხსაცმლის გახდა და გარკვეული დრესკოდის დაცვა. მეგობრების შეძენაში გულწრფელი ღიმილიც დაგეხმარებათ. ინდოელები მეგობრული და სტუმართმოყვარე ხალხია და როგორც ჩვენს კულტურაში, ისე მათ ადათ-წესებშიც სტუმარი ღვთისაა. პატივისცემას და კეთილგანწყობას კარმა აუცილებლად დაგიფასებთ”, — აღნიშნა სერგიმ.

მოგზაურობის შესახებ სრული ვიდეო იხილეთ ქვემოთ: