ლეო კარაქსის დაბრუნება და ადამ დრაივერის ტრიუმფი

ნესტან ნენე კვინიკაძე
 
ლეო კარაქსზე ხუმრობენ, თითქოს, ის ერთ ფილმს გადაიღებს და შემდეგ, დიდი ხნით იკარგება. ასე იყო ამ შემთხვევაშიც, ლეო კარაქსი ათწლიანი პაუზის შემდეგ, კანის  74-ე კინოფესტივალზე პოპ-ოპერით დაბრუნდა.
 
“ანეტი”  ჯგუფ “Sparks”-ის საუნდრეკით მოყოლილი ანას (მარიონ კოტიარი და ჰენრის (ადამ დრაივერი იუმორნარევი ტრაგიკული ამბავია, რომელიც რეჟისორისთვის დამახასიათებელი არაპირდაპირი მინიშნებით თანამედროვეობაში არსებულ არაერთ პრობლემას ეხმიანება.

 
ჰენრი, კალიფორნიული თეატრის კომედიანტია და  წარმოდგენის დროს, სასტიკ ამბებს უყვება ხუმრობის მოყვარულ მაყურებელს. ანა ცნობილი სოპრანოა, რომელსაც კოშმარული სიზმრები ტანჯავს. კარაქსის შესანიშნავ, ატმოსფერულ სამყაროში გამომწყვდეული წყვილი სიმღერებით გვიყვება თუ როგორ უყვართ ერთმანეთი.
რა შეიძლება დაემართოთ შეყვარებულ ადამიანებს? შესაძლებელია თუ არა, ეს სიყვარული, იმავდროულად, ერთმანეთის განადგურების ინსტრუმენტი აღმოჩნდეს? რას შეცვლის ბავშვი, რომელიც გაჩნდება და რომლის როლსაც შემზარავი იმიჯებით და სიურეალიზმით მოთამაშე ლეო კარაქსი ხის მარიონეტს მიანდობს.

ესაა ერთდროულად, მომნუსხველი და შემზარავი ამბავი, სადაც ადამ დრაივერი ბრწყინავს. ის იხელთებს ყველა საშუალებას და პლასტიკით, მზერით, საუცხოო სამსახიობო ოსტატობით, ამ ხელოვნების შესაძლებლობის ტერიტორიას აფართოებს.

 
“ანეტით” გაიხსნა პანდემიის მიზეზით შარშან გაუქმებული კანის კინოფესტივალი, რომელმაც კარაქსის ნამუშევარი ნიშანდობლივად, სწორედ გახსნის ფილმად შეარჩია, – კინოს შესაძლებლობები ამოუწურავია!  ესაა ფილმი, რომელიც ბევრი გამოწვევის წინაშე მდგარ თანამედროვე კინოს ახალ სუნთქვას უხსნის.
 
გახდით SOLO

არ გაჩერდე, გააგრძელე კითხვა