„ბრუნტეტი არის ქვესკნელი“ – Kordz-ის მუსიკალური სპექტაკლის ქართული ტური

„მე ვლაპარაკობ ბატონ ბტუნტეტულ ენაზე…“ – ამბობს 4 წლის ალექსანდრე კორძაია (იგივე ‘Kordz’) 1999 წლის ჩანაწერში, რომელიც უკვე ზრდასრულმა მუსიკოსმა ხელახლა აღმოაჩინა და როგორც მისთვის, ასევე რეჟისორ სანდრო კალანდაძისთვის ახალი მუსიკალურ-თეატრალური პროექტის „ბრუნტეტი – დაბრუნება“ მთავარ შთაგონებად იქცა.

„როგორც ბავშვობის ხმა ამბობს, ბრუნტეტი არის ქვესკნელი, სადაც ჩემი ფანტასტიური მეგობრები ცხოვრობენ. იქ რაღაცნაირად უნდა მიხვიდე. აი, როცა იძინებ და საბნის ქვეშ მიდიხარ, ნელ-ნელა ბრუნტეტში ჩადიხარ. ბრუნტეტი არის სამყარო, სადაც ეს წარმოსახვითი მეგობრები ცხოვრობენ… ეს მეგობრები ჩემთან ერთად ვერ წამოვლენ, რადგან ამ ქვესკნელშიც არსებობს საზღვარი, საიდანაც ვერ გამოვლენ…“

ასე განმარტავს Kordz ბავშვობის ამ შორეულ მოგონებას, რომელიც მამიდის მიერ გაკეთებულ ორმოცწუთიან აუდიოჩანაწერში მუსიკოსის ცხოვრების დავიწყებულ ეპიზოდს ინახავს. Kordz-ის ფანტასტიკური მეგობრებით დასახლებული წარმოსახვითი სამყაროს მუსიკალურ და თეატრალურ ექსპერიმენტში გაცოცხლების პროცესი ინტენსიური, პირადი ამბებით, წინააღმდეგობრივი ემოციებით, ეჭვებით და დილემებით სავსე აღმოჩნდა. ამის მიუხედავად, სანდრო კალანდაძესა და „ჰარაკის“ თეატრალურ გუნდთან ერთად პროექტზე მუშაობას მუსიკოსი ამაღელვებელ ემოციურ თავგადასავლად იხსენებს.

საბოლოოდ, შეიძლება თუ არა ზუსტად იმის თქმა, მაინც რა არის „ბრუნტეტი“? Kordz-ის თქმით:

„…მარტო მუსიკალური სპექტაკლი არ არის, ოპერის ასპექტებიც აქვს. თან თეატრალური კონცერტია და თან – აუდიოწიგნი არის… ზუსტად მუსიკის თეატრიც არ არის – მაგრამ ალბათ ყველაზე მიახლოებითი განმარტება ესაა. რაც მასზე მუშაობა დავიწყეთ, ყოველდღე ამ ჩემს ჩანაწერებს ვუსმენ… რამდენიმე დღეს ცუდ ხასიათზეც ვიყავი, მაგრამ მერე მუსიკა გაცოცხლდა… საბოლოო ჯამში, სამუშაო პროცესი თავისებური ფსიქოთერაპია იყო, მაგრამ თან ინტენსიური… ერთთვიანი… ინტენსიური…“

Kordz -მა აუდიოჩანაწერები მუსიკალურ პროექტად პირველად 2021 წელს აქცია, როცა ჰოლანდიური ანსამბლის Kluster 5-ისთვის ნაწარმოები „1999“ დაწერა. „1999“-ც და „ბრუნტეტი – დაბრუნებაც“ ბავშვობის ხმების, სიმღერების, შთაბეჭდილებების, ფანტაზიების გადააზრების მცდელობაა, რომელიც მაყურებელსაც საკუთარ წარსულში, თავის ბავშვობის ყველაზე ღრმა მოგონებებთან აბრუნებს:

„მე სულ ეჭვი მეპარებოდა. ვფიქრობდი, რომ ეს მაინც ჩემი პირადი ისტორიაა და ამის ცოტა მეშინოდა, მაგრამ კონცერტების შემდეგ, აქაც და შვეიცარიაშიც, საერთოდ შემეცვალა შეგრძნება. ვგრძნობდი, რომ ყველა თავის თავს ხედავდა ამ ჩანაწერებში და ჩემი ბავშვობის ამბებში. ყველა მსმენელს თავისი ასოციაციები ჰქონდა. საქართველოში კიდევ უფრო განსაკუთრებული გამოვიდა, რადგან ყველას თითქოს მსგავსი გამოცდილებები გვაქვს ბავშვობის. ეს იყო ყველაზე ემოციური – ყველა ერთად ვგრძნობდით თავს.“ – ამბობსKordz.

როგორც მუსიკოსი აღნიშნავს, მუსიკალური თეატრი თუ თეატრალური კონცერტი არა მხოლოდ არტისტების, არამედ მაყურებლისთვისაც სრულიად ახლებული და განსხვავებული გამოცდილება იყო, რაც სამომავლოდ მსგავს პროექტებზე მუშაობისთვის მთავარი მოტივაციაა:

„ერთ-ერთი საუკეთესო განცდაა ხელოვნებაში, რომ შეგიძლია ხალხთან, მსმენელთან იმუშავო, თითქოს ერთმანეთს რაღაცნაირად უგებთ. ცხადია, რომ ეს სულ გაგრძელდება, სანამ ცოცხლები ვართ…“

 „ბრუნტეტი – დაბრუნება“ საქართველოს თეატრებში 27 სექტემბრიდან გადის. Kordz-ის, Kluster 5-ისა და „ჰარაკის“ კოლაბორაციის ნახვა ქართველ მაყურებელს 29 სექტემბერს თბილისში (მარჯანიშვილის თეატრი), 2, 4 და 6 ოქტომბერს კი გორში (ერისთავის თეატრი), ქუთაისსა (მესხიშვილის თეატრი) და ბათუმში (ზაფხულის თეატრი) შეეძლებათ. პროექტის მთავარი მხარდამჭერია SOLO, რის გამოც SOLO მომხმარებლები სპექტაკლის ბილეთების შეძენას 20%-იანი ფასდაკლებით შეძლებენ.

გახდით SOLO

არ გაჩერდე, გააგრძელე კითხვა