ჩრდილოეთ ესპანეთში, საფრანგეთის საზღვართან სრულიად თვითმყოფადი კულტურისა და იდენტობის მქონე ბასკეთი მდებარეობს. ამ გამორჩეულ მხარეზე არაერთი კუთხით შეიძლება საუბარი, იქნება ეს მდიდარი ისტორია და ტრადიციები, ანალოგის არმქონე ბასკური ენა თუ მუსიკით, ცეკვითა და მსოფლიოში ცნობილი რესტორნებით სავსე ქალაქები.
სწორედ ამიტომ შეირჩა ეს დანიშნულების ადგილი SOLO tours-ის ფარგლებში, ქვემოთ კი უფრო ვრცლად მოგიყვებით იმ თავისებურებების შესახებ, რომლებიც ბასკეთს აუცილებლად მოსანახულებელ ადგილად აქცევს.
მოდერნული და კლასიკური არქიტექტურის შერწყმა
ბასკური ქალაქები შთამბეჭდავი არქიტექტურით გამოირჩევა, სადაც ისტორიული უბნები და მოდერნისტული სტილი ერთმანეთს ეხამება. ამის ერთ-ერთი საუკეთესო მაგალითი რეგიონის ყველაზე დიდი ქალაქი – ბილბაოა, ყოფილი ინდუსტრიული ცენტრი, რომელიც გასული დეკადების განმავლობაში წარმატებით გარდაიქმნა თანამედროვე არქიტექტურული ექსპერიმენტების ცენტრად. ქალაქში შეხვდებით ფრანკ გერის, სანტიაგო კალატრავას, ფილიპ სტრაკის, სეზარ პელის და სხვა ცნობილი არქიტექტორების ისეთ საკულტო ნამუშევრებს, როგორებიცაა ზუბიზურის საფეხმავლო ხიდი, აზკუნას მულტიფუნქციური კულტურული ცენტრი, იბერდროლას კოშკი და თანამედროვე არქიტექტურის შედევრად აღიარებული – გუგენჰაიმის მუზეუმი. არანაკლებ მომხიბვლელია ბილბაოს ძველი ქალაქი – კასკო ვიეჯო, სადაც ვიწრო და ფერადი ქუჩების ლაბირინთებში არაერთ ისტორიულ შენობას, მოედანსა და კულტურულ ძეგლს შეხვდებით.
თანამედროვე და ისტორიული არქიტექტურის საინტერესო შერწყმას შეხვდებით ბასკეთის კულტურულ ცენტრში – სან სებასტიანშიც. აქ კურსაალის კულტურული ცენტრის მინიმალისტური და მონუმენტური ფასადის გვერდით იხილავთ ნეობაროკოს სტილში გადაწყვეტილ ვიქტორია ეუგენიას თეატრს, წმინდა მარიამის გოტიკურ ბაზილიკას, ბრიტანული და ფრანგული არქიტექტურით შთაგონებულ მირამარის ისტორიულ სასახლეს, რომელიც ქალაქის სანაპიროს პანორამას კლასიკურ შტრიხებს მატებს.
სან-სებასტიანის სანაპიროები
სან-სებასტიანის პლაჟები ევროპის ერთ-ერთი ყველაზე პოპულარული სანაპიროებია. ლა კონჩა ქალაქის ყველაზე პოპულარული სანაპიროა, სადაც ურბანული პანორამული ხედის ფონზე ოქროსფერი ქვიშა და ლურჯი ტალღები განტვირთვისთვის იდეალურ გარემოს ქმნიან. ონდარეტას სანაპიროს ლა კონჩასგან მონტე იგელდოს მთა ყოფს. ინდერატას პლაჟი ლა კონჩასთან შედარებით ნაკლებად ხალხმრავალია და მყუდრო ატმოსფეროთი ხასიათდება. ზურიოლას სანაპირო ხაზი კი, რომელიც მოზრდილი ტალღებითაა ცნობილი, დამწყები და პროფესიონალი სერფერების საყვარელი ადგილია. ამ პლაჟის გასწვრივ სერფინგის სკოლებთან ერთად სხვა საზღვაო სპორტული აქტივობებით დაკავების საშუალებაც გექნებათ.
მრავალფეროვანი მუზეუმები
ბილბაოსა და სან-სებასტიანში თქვენს ინტერესებთან თემატურად ახლოს მყოფი მუზეუმის შერჩევა არ გაგიჭირდებათ. გუგენჰაიმის და ბილბაოს თანამედროვე ხელოვნების მუზეუმები მოდერნისტული მხატვრობისა და სკულპტურის მდიდარ კოლექციას ეძღვნება, ბილბაოს სახვითი ხელოვნების მუზეუმში კი ესპანური და ბასკური ხელოვნების მრავალსაუკუნოვან განვითარებაზე დაკვირვების შესაძლებლობას მოგცემთ – მუზეუმი შუა საუკუნეებიდან თანამედროვეობის ჩათვლით ყველა სახელოვნებო პერიოდის ნიმუშებს აერთიანებს. არანაკლებ საინტერესოა ბილბაოს საზღვაო მუზეუმი, რომელიც ზღვასა და გემთმშენებლობასთან დაკავშირებულ ბასკურ ტრადიციებს ეძღვნება. რაც შეეხება სან სებასტიანს, ქალაქის გამორჩეული საგამოფენო სივრცეებია: სან ტელმოს ისტორიის მუზეუმი, საკულტო დიზაინერის კრისტობალ ბალენსიაგას მუზეუმი და ქალაქის მთავარი აკვარიუმი, სადაც ბისკაის ყურის წყალქვეშა სამყაროს გაეცნობით.
გამორჩეული სამზარეულო
ბასკური სამზარეულო რეგიონის თვითმყოფად ხასიათს არაჩვეულებრივად აირეკლავს, ხოლო ბილბაო ნამდვილი გასტრონომიული სამოთხეა. ტრადიციული ბასკური ხემსის – Pintxos-ს ვარიაციების დაგემოვნებას მთელს ბილბაოში შეძლებთ, როგორც პატარა ბარებში, ისე – მიშელინის ვარსკვლავიან რესტორნებში. სეზონური, ცოცხალი ინგრედიენტებით დამზადებული Pintxos-ები ღვინის იდეალური კომპანიონია. ბასკურ სამზარეულოში ასევე შეხვდებით ზღვის პროდუქტებზე დაფუძნებულ დელიკატესებს, ცხვრის ყველის ადგილობრივ სახეობებს, მრავალფეროვან წვნიანებს, კრემისა და კარამელის პუდინგებს და ა.შ. აღსანიშნავია, რომ პატარა კაფეებთან და ბარებთან ერთად, ბილბაოში მიშელინის ვარსკვლავიანი 13 რესტორანია, ხოლო სან სებასტიანში – 19.
მეღვინეობის ტრადიცია
ბასკური ლანდშაფტისთვის დამახასიათებელ მთიან ტერასებზე გაშენებულ ვენახებში რამდენიმე ენდემური სახეობის ყურძენი მოჰყავთ. ბასკური მეღვინეობის ტრადიცია რამდენიმე საუკუნეს ითვლის. ღვინის დაყენების ბასკური ტექნოლოგიები უპირატესობას ბუნებრივ ფერმენტაციაზეა ორიენტირებული, რაც ბასკურ ღვინოში ლოკალური ყურძნის ჯიშების უნიკალური არომატის ბოლომდე გამომჟღავნებას უწყობს ხელს. ადგილობრივი ყურძნის ჯიშებისგან დამზადებულ თეთრ და წითელ ღვინოებს მდიდარი და ცოცხალი გემოთი ხასიათდება. მაგალითად, Txakoli – მსუბუქი, ცქრიალა თეთრი ღვინო, რომელსაც ცოცხალი, მომჟავო გემო აქვს ზღვის პროდუქტებით დამზადებულ ბასკურ კერძებს იდეალურად ეხამება. მსოფლიოში ცნობილი მეღვინეობა Bodegas Ysios კი არა მარტო ბასკური ღვინის გამორჩეული მახასიათებლების აღმოჩენის, არამედ ულამაზესი ბუნების ფონზე ესპანელი არქიტექტორის სანტიაგო კალავატრას გამორჩეული ძეგლით ტკბობის შესაძლებლობაცაა.
SOLO-ს გასტრონომიული ტური ბილბაოში, სან სებასტიანსა და ბიარიცში
გასტრონომიული ტური 10-15 ოქტომბრის განმავლობაში არა მარტო უგემრიელესი ბასკური კერძებისა და ღვინის დაგემოვნების, არამედ ბილბაოსა და სან სებასტიანის ღირსშესანიშნაობების ნახვის საშუალებასაც მოგცემთ. ტური ბილბაოს არქიტექტურის, რიოხას მევენახეობის რეგიონის, მათ შორის Bodegas Ysios-ის მონახულებასთან ერთად სან სებასტიანის ზღვის პროდუქტების ბაზარში კულინარიულ მოგზაურობასა და მასტერკლასებს, ბასკური სასმლის – სიდრის დეგუსტაციასა და სხვა გემრიელ თავგადასავლებს მოიცავს. ბასკეთში მოგზაურობა სან სებასტიანის მეზობელ ფრანგულ ქალაქში ბარიაცში დასრულდება – ტურის ფინალური ფრანგული შტრიხი.
ტურზე რეგისტრაციისთვის მოგვწერეთ: Hobby@solo.ge