ქუჩიდან მუზეუმში – თბილისი ბენქსის გამოფენას მასპინძლობს!
ქართული სახვითი ხელოვნების მუზეუმის მე-5 დაბადების დღესთან დაკავშირებით, საქართველოში პირველად გაიხსნა საერთაშორისო გამოფენა – „ბენქსი: ლეგენდის დაბადება,“ კურატორი – სტივ ლაზარიდისი. გამოფენის მხარდამჭერები არიან SOLO X და VISA.
გრაფიტის ინგლისელი მხატვრის ნამუშევრების ნახვა ქართული სახვითი ხელოვნების მუზეუმში 18 ოქტომბრიდან 14 თებერვლის ჩათვლით არის შესაძლებელი.
ექსპოზიცია ბენქსის მარჯვენა ხელის, სტივ ლაზარიდისის კურატორობით გაიმართება და თქვენ საშუალება გექნებათ, ბენქსის კერძო კოლექციებში არსებულ ორიგინალ ნამუშევრებთან ერთად, ლაზარიდისის ექსკლუზიური ფოტო და ვიდეო მასალა იხილოთ.
სახვითი ხელოვნების მუზეუმში, ბენქსისთან ერთად, წარმოდგენილი იქნება ქართველი გრაფიტის არტისტების – გაგოშა, მიშიკო სულაკაური, სემიჩკა, KOSKA, SICK ‘N TIRED – ნამუშევრებიც, ელენე კაპანაძის კურატორობით.
გამოფენაზე მოსახვედრად ბილეთების შეძენა შესაძლებელია მხოლოდ მუზეუმის სალაროში. სტანდარტული ბილეთის ფასი 40, ხოლო მოსწავლეებისთვის, სტუდენტებისა და პენსიონერებისთვის 20 ლარია, SOLO-ს Visa ბარათით გადახდის შემთხვევაში კი 15%-იან ქეშბექს მიიღებთ.
ბენქსის ნამუშევრები მსოფლიოს ყველა წერტილში მუდმივად იწვევს ხალხის ინტერესს და საზოგადოებაში ერთმანეთისგან განსხვავებულ ემოციებს აღძრავს, რადგან ბრისტოლელი მხატვრის ნამუშევრები ძირითადად არის სატირა პოლიტიკურ და სოციალურ თემებზე.
სხვადასხვა კედელზე შესრულებული ნამუშევრების გადარჩენა ხშირად საზოგადოების მხარდაჭერით და ძალისხმევით ხდება. და მიუხედავად იმისა, რომ თითქმის შეუძლებელია ბენქსის ორიგინალი ქმნილებების შეძენა, მათ მიმართ აუქციონერებისა და კოლექციონერების ინტერესი მაინც მუდმივად დიდია. 2018 წელს ბენქსის გამორჩეული ქმნილება “გოგონა წითელი ბუშტით” სოთბის აუქციონზე მოხვდა და მილიონ გირვანქა სტერლინგზე მეტად გაიყიდა.
მან “სთრით არტზე” საზოგადოების წარმოდგენა შეცვალა – “ვანდალიზმი” ხელოვნებად აქცია. ბენქსის შემოქმედებითი გზა ქუჩის ხელოვნებიდან მუზეუმის კედლამდე – ახლა არტისტის გამორჩეული და უნიკალური ნამუშევრები თბილისის ცენტრშია და დამთვალიერებლებს ელოდება. ბენქსის ყველაზე მთავარი და მნიშვნელოვანი უპირატესობა ხომ ისაა, რომ ის ყველასთვისაა და ყველას ეხება.